Agam 45 Anuogdaraim Beiya Chuliya Mulam PDF File

SR No.: 003789
Original Sutra Author: N/A
Author: Dipratnasagar, Deepratnasagar
Publisher: Deepratnasagar
Publication Year: 2012
Total Pages: 68
Language: Prakrit
Classification: Book_Devnagari, Agam, Canon, Agam 45, & agam_anuyogdwar
File Size: 2 MB

Page 14

सव्वलोए होज्जा ? नो संखेज्जइभागे होज्जा नो असंखेज्जइभागो होज्जा नो संखेज्जेसु भागेसु होज्जा नो असंखेज्जेसु भागेसु होज्जा नियमा सव्वलोए होज्जा, एवं दोन्नि वि, संगहस्स आणुपुव्विदव्वाइं लोगस्स कत्ति भागं फुसंति- किं संखेज्जइभागं फुसंति जाव सव्वलोगं फुसंति ? नो संखेज्जइभागं फुसंति नो असंखेज्जइभागं फुसंति नो संखेज्जे भागे फुसंति नो असंखेज्जे भागे फुसंति नियमा सव्वलोगं फुसंति, एवं दोन्निव ।
संगहस्स आणुपुव्विदव्वाइं कालओ केवच्चिरं होंति ?, सव्वद्धा, एवं दोन्नि वि, संगहस्स आणुपुव्विदव्वाणं अंतरं कालओ केवच्चिरं अंतरं होइ ?, नत्थि अंतरं, एवं दोन्नि वि, संगहस्स सुत्तं-१०८
आणुपुव्विदव्वाइं सेसदव्वाणं कइ भागे होज्जा - किं संखेज्जइभागे होज्जा जाव असंखेज्जेसु भागे होज्जा ?, नो संखेज्जइभागे होज्जा, नो असंखेज्जइभागे होज्जा, नो संखेज्जेसु भागेसु होज्जा नो असंखेज्जेसु भागेसु होज्जा, नियमा तिभागे होज्जा, एवं दोन्नि वि, संगहस्स आणुपुव्विदव्वाइं कयरंमि भावे होज्जा ?, नियमा साइपारिणामिए भावे होज्जा, एवं दोन्नि वि, अप्पाबहुं नत्थि । से तं अनुगमे, से तं संगहस्स अणोवणिहिया दव्वाणुपुव्वी से तं अणोवणिहिया दव्वाणुपुवी ।
[१०९] से किं तं ओवणिहिया दव्वाणुपुव्वी ? ओवणिहिया दव्वाणुपुव्वी तिविहा पन्नत्ता, तं जहा- पुव्वाणुपुव्वी पच्छाणुपुव्वी अणाणुपुव्वी ।
[११०] से किं तं पुव्वाणुपुव्वी?, पुव्वाणुपुव्वी - धम्मत्थिकाए अधम्मत्थिकाए आगासत्थिकाए जीवत्थिकाए पोग्गलत्थिकाए अद्धासमए से तं पुव्वाणुपुव्वी । से किं तं पच्छाणुपुव्वी? पच्छाणुपुव्वी- अद्धासमए जाव धम्मत्थिकाए, से तं पच्छाणुपुव्वी । से किं तं अणाणुपुव्वी ? अणाणुपुव्वीएयाए चेव एगाइयाए एगुत्तरियाए छगच्छगयाए सेढीए अन्नमन्नब्भासो दुरूवणो, से तं अणाणुपुव्वी । [१११] अहवा ओवणिहिया दव्वाणुपुव्वी तिविहा पन्नत्ता तं० पुव्वाणुपुव्वी पच्छाणुपुव्वी अणाणुपुव्वी, से किं तं पुव्वाणुपुव्वी ?, पुव्वाणुपुव्वी - परमाणुपोग्गले दुपएसिए तिपएसिए जाव दसपएसिए संखेज्जपएसिए असंखेज्जपएसिए अनंतपएसिए, से तं पुव्वाणुपुव्वी । से किं तं पच्छाणुपुव्वी?, अनंतपएसिए जाव दुपएसिए परमाणुपोग्गले, से तं पच्छाणुपुव्वी । से किं तं अणाणुपुव्वी ?, एयाए चेव एगाइयाए अएगुत्तरियाए अनंतगच्छगयाए सेढीए अन्नमन्नब्भासो दुरूवणो, से तं अणाणुपूव्वी, से तं ओवणिहिया दव्वाणुपुव्वी, से तं जाणगसरीर भवियसरीर-वतिरित्ता दव्वाणुपुव्वी, से तं नोआगमओ दव्वाणुपुव्वी, से तं दव्वाणुपुव्वी ।
[११२] से किं तं खेत्ताणुपुव्वी ?, खेत्ताणुपुव्वी दुविहा पन्नत्ता तं जहा - ओवणहिया अणोवहिणिया य ।
[११३] तत्थ णं जा सा ओवणिहिया सा ठप्पा, तत्थ णं जा सा अणोवणिहिया सावि पन्नत्ता तं जहा- नेगम-ववहाराणं संगहस्स य ।
[११४] से किं तं नेगम-ववहाराणं अनोवणिहिया खेत्ताणुपुव्वी ?, नेगम-ववहाराणं अणोवणिहिया खेत्ताणुपुव्वी पंचविहा पन्नत्ता तं जहा - अट्ठपयपरूवणया भंगसमुक्कित्तणया भंगोवदंसणया समोयारे अनुगमे, से किं तं नेगम-ववहाराणं अट्ठपयपरूवणया ? नेगम-ववहाराणं अट्ठपयपरूवणयातिपएसागाढे आणुपुव्वी जाव दसपएसोगाढे आणुपुव्वी, संखेज्जपएसोगाढे आणुपुव्वी असंखेज्जपएसोगा आणुपुव्वी, एगपएसोगाढे अणाणुपुव्वी, दुपएसोगाढे अवत्तव्वए, तिपएसोगाढा आणुपुव्वीओ जाव [दीपरत्नसागर संशोधितः ]
[13]
[४५-अनुओगदाराई]