________________
गाहा-११८
[११८] उवही-नियडिपइट्ठो सोहिं जो कुणइ सोगईकामो |
माई पलिकंचंतो करेइ बुंटुछियं मुढो || [११९] आलोयणाए दोसे दस दोग्गइबंधणे परिहरंतो ।
तम्हा आलोएज्जा मायं मुत्तूण निस्सेसं ।। [१२०] जे मे जाणंति जिणा अवराहा जेसु जेसु ठाणेसु ।
ते तह आलोएमी उवट्ठिओ सव्वभावेणं ।। [१२१] एवं उवट्ठियस्स वि आलोएउं विसुद्धभावस्स |
जं किंचि वि विस्सरियं सहसक्कारेण वा चुक्कं ।। [१२२] आराहओ तह वि सो गारव-परिकंचुणा-मयविहूणो ।
जिनदेसियस्स धीरो सद्दहगो मुत्तिमग्गस्स ।। [१२३] आकंपण अनुमानन जं दिळं बायरं च सुहुमं च ।
छन्नं सद्दाउलगं बहुजन अव्वत्त तस्सेवी ।। [१२४] आलोयणाइ दोसे दस दुग्गइवड्ढणा पमुत्तूणं ।
आलोइज्ज सुविहिओ गारवमायामयविहूणो ।। [१२५] तो परियागं च बलं आगम कालं च कालकरणं च ।
पुरिसं जीअं च तहा खित्तं पडिसेवणविहिं च ।। [१२६] जोग्गं पायच्छितं तस्स अ दाऊण बिंति आयरिया । दंसण-नाण-चरिते तवे य कुणमप्पमायति ।। [१२७] अनसनमूणोयरिया वित्तिच्छेओ रसस्स परिचाओ ।
कायस्स परिकिलेसो छट्ठो संलीनया चेव ।। [१२८] विनए वेयावच्चे पायच्छिते विवेग सज्झाए ।
अभिंतरं तवविहिं छठं झाणं वियाणाहि ।। [१२९] बारसविहम्मि वि तवे अभिंतरबाहिरे कुसलदिढे ।
नवि अत्थि नवि य होही सज्झाय समं तवोकम्मं ।। [१३०] जे पयणुभत्तपाना सुयहेऊ ते तवस्सिणो समए ।
जो अ तवो सुयहीणो बाहिरयो सो छुहाहारो ।। [१३१] छठ्ठट्ठमदसमदुवालसेहिं अबहुसुयस्स जा सोही ।
ततो बहुतरगुणिया हविज्ज जिमियस्स नाणिस्स ।। [१३२] कल्लं कल्लंपि वरं हारो परिमिओ अ पंतो अ |
न य खमणो पारणए बहु बहुतरो बहुविहो होइ ।। [१३३] एगाहेण तवस्सी हविज्ज नत्थित्थ संसओ कोइ ।
एगाहेण सुयहरो न होई धंतंपि तूरमाणो ।। [१३४] सो नाम अनसनतवो जेण मनो मंगुलं न चिंतेइ । जेण न इंदियहानी जेण य जोगा न हायति ।।
दीपरत्नसागर-संशोधितः
[9]
[३३/१|मरणसमाहित
