________________
निज्जाण-मग्गेणं जोयणसाहस्सिएहिं विग्गहेहिं तहा आगया जहा सूरियाभो, धम्मकहा समत्ता, तए णं सा बहुपुत्तिया देवी दाहिणं भयं पसारेइ- देवकुमाराणं अट्ठसयं० देवकुमारियाण य वामाओ भुयाओ अट्ठसयं तयानंतरं च णं बहवे दारगा य दारियाओ य डिभए य डिभियाओ य विउव्वइ, नट्ठविहिं जहा सूरियाभो अज्झयणं-४
उवदंसित्ता पडिगया, भंते! त्ति भगवं गोयमे समणं भगवं महावीरं वंदइ नमसइ० कूडागारसाला दिदंतो, बहुपुत्तियाए णं भंते! देवीए सा दिव्वा देविड्ढी पुच्छा जाव अभिसमन्नागया ?|
एवं खल गोयमा! तेणं कालेणं तेणं समएणं वाणारसी नामं नयरी, अंबसालवने चेइए, तत्थ णं वाणारसीए नयरीए भद्दे नामं सत्थवाहे होत्था, अड्ढे जाव अपरिभूए, तस्स णं भद्दस्स सुभद्दा नामं भारिया सूमाला वंझा अवियाउरी जानुकोप्परमाया यावि होत्था, तए णं से सुभद्दाए सत्थवाहीए अन्नया कयाइ पुव्वरत्तावरत्तकालसमयंसि कुडुंबजागरियं० इमेयारुवे जाव संकप्पे समुप्पज्जित्था- एवं खलु अहं भद्देणं सत्यवाहेणं सद्धिं विउलाइं भोगभोगाइं भुंजमाणी विहरामि, नो चेव णं अहं दारगं वा दारियं वा पयामि, तं धन्नओ णं ताओ अम्मयाओ सुलद्धे जाव णं तासिं अम्मयाणं मणुए जम्मजीवियफले जासिं मन्ने नियगकुच्छिसंभूयगाई थणदुद्धलुद्धगाइं महुरसमुल्लावगाणि मंजुलमम्मणपजंपियाणि थणमूला कक्खदेसभागं अभिसरमाणाणि पण्हयं पियंति, पुणो य कोमलकमलोवमेहिं हत्थेहिं गिण्हिऊणं उच्छंगनिवेसियाणि देंति समुल्लवाए सुमहरे पुणो-पुणो मंजुलमम्मणप्पभणिए अहं णं अधन्ना अपुन्ना अकयपुण्णा एत्तो एगमवि न पत्ता ओहय जाव झियाइ ।
तेणं कालेणं तेणं समएणं सुव्वयाओ णं अज्जाओ इरिया समियाओ भासा समियाओ एसणा समियाओ आयाण-भंडमत्त-निक्खेवणा समियाओ उच्चार-पासवण-खेलजल्ल-सिंघाण-पारिट्ठावणिया समियातो मण गुत्ताओ वय गुत्ताओ काय गुत्ताओ गुतिंदियाओ गुत्तबंभचारिणीओ बहुस्सुयाओ बहुपरियाराओ पुव्वाणुपुव्विं चरमाणीओ गामाणुगामं दूइज्जमाणीओ जेणेव वाणारसी नयरी तेणेव उवागयाओ अहापडिरूवं उग्गहं उग्गिण्हिता संजमेण तवसा जाव विहरंति, तए णं तासिं सुव्वयाणं अज्जाणं एगे संघाडए वाणारसीए नयरीए उच्चनीयमज्झिमाइं कुलाइं घरसमुदानस्स भिक्खायरियाए अडमाणे भद्दस्स सत्थवाहस्स गिहं अनुपविढे ।
तए णं सा सुभद्दा सत्थवाही ताओ अज्जताओ एज्जमाणीओ पासइ पासित्ता हतुट्ठा खिप्पामेव आसनाओ अब्भुढेइ अब्भुढेत्ता सत्तट्ठपयाइं अनुगच्छइ अनुगच्छित्ता वंदइ नमसइ नमंसित्ता विउलेणं असनपानखाइमसाइमेणं पडिलाभित्ता एवं वयासी- एवं खल अहं अज्जाओ! भद्देणं सत्थवाहेणं सद्धिं विउलाइं भोग-भोगाइं भुंजमाणी विहरामी, नो चेव णं अहं दारगं वा दारियं वा पयामि, तं धन्नाओ णं ताओ अम्मयाओ जाव एत्तो एगमवि न पत्ता तं तुब्भे णं अज्जाओ बणायाओ बहुपढियाओ बहूणि गामागर नगर जाव सण्णिवेसाई आहिंडह बहणं राईसर तलवर-जाव सत्थवाहप्पभिइणं गिहाई अनुपविसइ अत्थि से केइ कहिं चि विज्जापओए वा मंतप्पओए वा वमनं वा विरेयणं वा वत्थिकम्मं वा ओसहे वा भेसज्जे वा उवलद्धे जेणं अहं दारगं वा दारियं वा पयाएज्जा ?
तए णं ताओ अज्जाओ सुभदं सत्थवाहिं एवं वयासी- अम्हे णं देवाणुप्पिए! समणीओ निग्गंथीओ इरियासमियाओ जाव गुत्तबंभचारिणीओ नो खलु कप्पइ अम्हं एयमद्रं कण्णेहिं वि निसामेत्तए, किमंग पुण उवदंसित्तए वा समायरित्तए वा ? अम्हे णं देवाणुप्पिए! पुणं तव विचित्तं केवलिपन्नत्तं धम्म परिकहेमो, तए णं सा सुभद्दा सत्थवाही तासिं अज्जाणं अंतिए धम्म सोच्चा निसम्म [दीपरत्नसागर संशोधितः]
[8]
[२१-पुप्फियाणं]