Page Text
________________
पढ में अज्झयणं
७२७
७३. तए णं से कणिए राया चेल्लणं देवि एवं वयासी-घाएउकामे णं अम्मो ! ममं सेणिए राया, "मारेउकामे णं अम्मो ! ममं सेणिए राया, बंधेउकामे णं अम्मो ! ममं सेणिए राया, निच्छुभिउकामे णं अम्मो ! ममं सेणिए राया, तं कहं णं अम्मो ! मम सेणिए राया अच्चंतनेहाणुरागरत्ते ?।।
७४. तए णं सा चेल्लणा देवी कूणियं रायं' एवं वयासी एवं खलु पुत्ता ! तुमंसि ममं गब्भे आभूए समाणे तिण्हं मासाणं बहुपडिपुण्णाणं ममं अयमेयारूवे दोहले पाउन्भए.--- धण्णाओ णं ताओ अम्मयाओ जाव' जाओ णं सेणियस्स रण्णो उयरवलिमसेहि सोल्लेहि य तलिएहि य भज्जिएहि य सुरं च महुं च मेरगं च जाइं च सीधुं च पसण्णं च आसाएमाणीओ विसाएमाणीओ परिभाएमाणीओ परिभुजेमाणीओ दोहलं विणेति जाव अहं सेणियस्स रण्णो तेहिं उयरवलिमसेहिं सोल्लेहि य तलिएहि य भज्जिहि य सुरं च महुं च मेरगं च जाइं च सीधुं च पसण्णं च आसाएमाणी विसाएमाणी परिभाएमाणी परिभुजेमाणी दोहलं विणेमि ॥
७५. तए णं अहं संपुण्णदोहला सम्माणियदोहला वोच्छिण्णदोहला तं गब्भं सुहंसुहेणं परिवहामि ॥
७६. तए णं ममं अण्णया कयाइ पुव्वरत्तावरत्तकालसमयंसि अयमेयारूवे अज्झत्थिए चितिए पत्थिए मणोगए संकप्पे समुप्पज्जित्था जइ ताव इमेणं दारएणं गब्भगएणं चेव पिउणो उयरवलिमसाइं खाइयाई, तं सेयं खलु मे एयं गब्भं साडित्तए वा पाडित्तए वा गालित्तए वा विद्धंसित्तए वा--एवं संपेहेमि, संपेहेत्ता तं गब्भं बहूहिं गब्भसाडणेहि य गब्भपाडणेहि य गब्भगालणेहि य गब्भविद्धंसणेहि य इच्छामि तं गब्भं साडित्तए वा पाडित्तए वा गालित्तए वा विद्धंसित्तए वा, नो चेव णं से गब्भे सडइ वा पडइ वा गलइ वा विद्धंसइ वा ॥
७७. तए णं अहं तं गब्भं जाहे नो संचाएमि बहूहि गब्भसाडणेहि य जाव' गब्भविद्धंसणेहि य साडित्तए वा जाव विद्धंसित्तए वा ताहे संता तंता परितंता निविण्णा समाणी अकामिया अवसवसा अट्टदुहट्टवसट्टा तं गब्भं परिवहामि ।।
७८- तए णं अहं नवण्हं मासाणं बहुपडिपुण्णाणं अट्ठमाण राइंदियाणं वीइक्कंताणं सूमाल सुरूव दारगं पयामि ॥
७६. तए णं ममं इमे एयारूवे अज्झत्थिए चितिए पत्थिए मणोगए संकप्पे समुप्पज्जित्था --जइ ताव इमेणं दारएणं गब्भगएणं चेव पिउणो उयरवलिमसाई खाइयाई, तं न नज्जइ णं एस दारए संवड्डमाणे अम्हं कुलस्स अंतकरे भविस्सइ, तं सेयं खलु अम्हं एवं दारगं एगते उक्कुरुडियाए उज्झावित्तए-एवं संपेहेमि, संपेहेत्ता दासचेडि सद्दावेमि,
१. सं० पा० ---एवं मारेउ बंधेउ । २. कुमारं (ख,ग)। ३. सं० पा०.--अम्मयाओ जाव अंगपडिचारि- याओ निरवसेसं भाणियब्वं जाव जाहे वि य णं तुमं वेयणाए अभिभूए महया जाव
तुसिणीए। ४. उ०१३४ । ५. उ० ११३५-४८ । ६. उ० ११५१ । ७. उ० ११५१ ।
Jain Education International
For Private & Personal Use Only
www.jainelibrary.org
| SR No. | 003555 |
| Book Title | Uvangsuttani Part 05 |
| Original Sutra Author | N/A |
| Author | Tulsi Acharya, Mahapragna Acharya |
| Publisher | Jain Vishva Bharati |
| Publication Year | 1989 |
| Total Pages | 1178 |
| Language | Prakrit |
| Classification | Book_Devnagari, Agam, & Canon |
| File Size | 22 MB |