Page Text
________________
तइओ वक्खारो
४६७ लेसाहिं विसुज्झमाणीहिं-विसुज्झमाणीहिं ईहापोह-मग्गण-गवेसणं करेमाणस्स तयावरिज्जाणं कम्माणं खएणं कम्मरयविकिरणकरं अपुव्वकरणं पविट्ठस्स अणंते अणुत्तरे कसिणे पडिपुण्णे निव्वाघाए निरावरणे केवलवरनाणदंसणे समुप्पण्णे ॥
२२४. तए णं से भरहे केवली सयमेवाभरणालंकारं ओमुयइ, ओमुइत्ता सयमेव पंचमुट्टियं लोयं करेइ, करेत्ता आदंसघराओ पडिणिक्खमइ, पडिणिक्खमित्ता अंतेउरं मज्झमज्झेणं णिग्गच्छइ, णिग्गच्छित्ता दसहिं रायवरसहस्सेहि सद्धिं संपरिवडे विणीयं रायहाणिं मज्झंमज्झेणं णिग्गच्छइ, णिग्गच्छित्ता मज्झदेसे सुहंसुहेणं विहरइ, विहरित्ता जेणेव अट्टावए पव्वते तेणेव उवागच्छइ, उवागच्छित्ता अट्ठावयं पव्वयं सणियं-सणियं दुरुहइ, दुरुहित्ता मेघघणसण्णिकासं देवसण्णिवायं पुढविसिलापट्टगं पडिलेहेइ, पडिलेहेत्ता संलेहणा-झूसणा-झूसिए भत्तपाणपडियाइक्खिए पायोवगए कालं अणवकंखमाणे-अणवकंखमाणे विहरइ॥
२२५. तए णं से भरहे केवली सत्तत्तरि पुव्वसयसहस्साइं कुमारवासमज्झावसित्ता, एग वाससहस्सं मंडलियरायमज्झावसित्ता, छ पुव्वसयसहस्साई वाससहस्सूणगाई महारायमज्झावसित्ता, तेसीइं पुव्वसयसहस्साई अगारवासमज्झावसित्ता, एगं पुव्वसयसहस्सं देसूणगं केवलिपरियायं पाउणित्ता, तमेव बहुपडिपुण्णं सामण्णपरियायं पाउणित्ता, चउरासीइं पुव्वसयसहस्साइं सव्वाउयं पालइत्ता, मासिएणं भत्तेणं अपाणएणं सवणेणं" णक्खत्तेणं जोगमुवागएणं खीणे वेयणिज्जे आउए णामे गोए कालगए वीइक्कते समुज्जाए छिण्णजाइजरामरणबंधणे सिद्धे बुद्धे मुत्ते परिणिव्वुडे अंतगडे सव्वदुक्खप्पहीणे ॥
२२६. भरहे य एत्थ देवे महिड्ढीए महज्जुईए 'महाबले महायसे महासोक्खे महाणुभागे । पलिओवमट्ठिईए परिवसइ । से एएणठेणं गोयमा! एवं वुच्चइ-भरहे वासे भरहे वासे ॥ अदुत्तरं च णं गोयमा ! भरहस्स वासस्स सासए णामधेज्जे पण्णत्ते-जंण कयाइ ण आसि ण कयाइ णत्थि ण कयाइ ण भविस्सइ, भुवि च भवइ य भविस्सइ य धुवे णियए सासए अक्खए अव्वए अवट्ठिए णिच्चे भरहे वासे ।
१. ईहापूह (अ.क,ख.स); ईहावूह (पुर्व)। २. मुयई (ब)। ३. सिलावट्टयं (प)। ४. भरहे राया (क,ख,स)।
५. मज्झे वसित्ता (ख,त्रि,प,शाव,हीव) सर्वत्र । ६. पाउणित्ता (क,प)। ७. समणेणं (अ,ब)। ८. सं० पाo-महज्जुईए जाव पसिओवमट्टिईए।
Jain Education International
For Private & Personal Use Only
www.jainelibrary.org
| SR No. | 003555 |
| Book Title | Uvangsuttani Part 05 |
| Original Sutra Author | N/A |
| Author | Tulsi Acharya, Mahapragna Acharya |
| Publisher | Jain Vishva Bharati |
| Publication Year | 1989 |
| Total Pages | 1178 |
| Language | Prakrit |
| Classification | Book_Devnagari, Agam, & Canon |
| File Size | 22 MB |