________________
द्वितीय स्थानपद]
[२०३
ईसीपब्भारा णं पुढवी सेता संखदलविमलसोत्थिय-मुणाल-दगरय-तुसार-गोक्खीर-हारवण्णा उत्ताणयछत्तसंठाणसंठिता सव्वज्जुणवण्णमई अच्छा सण्हा लण्हा घट्ठा महानीरया निम्मला निप्पंका निक्कंकडच्छाया सप्पभा सस्सिरीया सउज्जोता पासादीया दरिसणिज्जा अभिरूवा पडिरूवा।
ईसीपब्भाराए णं सीताए जोयणम्मि लोगंतो। तस्स णं जोयणस्से जे से उवरिल्ले गाउए तस्स णं गाउयस्स जे से उवरिल्ले छब्भागे एत्थ णं सिद्धा भगवंतो सादीया अपज्जवसिता अणेगजातिजरा-मरण-जोणिसंसारकलंकलीभाव-पुणब्भवगब्भवासवसहीपवंचसमतिक्कंता सासयमणागतद्धं कालं चिटुंति।
तत्थ वि य ते अवेदा अवेदणा निम्ममा असंगा य। संसारविप्पमुक्का पदेसनिव्वत्तसंठाणा ॥१५८॥ कहिं पडिहता सिद्धा? कहिं सिद्धा पइट्ठिता ?। कहिं बोंदि चइत्ता णं ? कहिं गंतूण सिझई?॥१५९॥ अलोए पडिहता सिद्धा, लोयग्गे य पइट्ठिया। इहं बोंदि चइत्ता णं तत्थ गंतूण सिज्झई ॥१६०॥ दीहं वा हस्सं वा जं चरिमभवे हवेज्ज संठाणं। तत्तो तिभागहीणा सिद्धाणोगाहणा भणिया॥१६१॥ जं संठाणं तु इहं भवं चयंतस्स चरिमसमयम्मि। आसी य पदेसघणं तं संठाणं तहिं तस्स ॥१६२॥ तिण्णि सया तेत्तीसा धणुत्तिभागो य होति बोधव्वो। एसा खलु सिद्धाणं उक्कोसोगाहणा भणिया॥१६३॥ चत्तारि य रयणीओ रयणितिभागूणिया य बोद्धव्वा। एसा खलु सिद्धाणं मज्झिम ओगाहणा भणिया॥१६४॥ एगा य होइ रयणी अद्वेव य अंगुलाई साहीया। एसा खलु सिद्धाणं जहण्ण ओगाहणा भणिता॥१६५॥ ओगाहणाए सिद्धा भवत्तिभागेण होंति परिहीणा। संठाणमणित्थंथं जरा-मरणविप्पमुक्काणं ॥१६६॥ जत्थ य एगो सिद्धो तत्थ अणंता भवक्खयविमुक्का। अण्णोण्णसमोगाढा पुट्ठा सव्वे वि लोयंते ॥१६७॥ फुसइ अणंते सिद्धे सव्वपएसेहिं नियमसो सिद्धा। ते वि असंखेज्जगुणा देस-पदेसेहिं जे पुट्ठा॥ १६८॥
