Page Text
________________
ए
[३३]
(१३) रायपसेणियं [ (२) उवंगसुतं ] ****** जेणेव जोतिभायणे तेणेव उवागच्छइ जोइभायणे जोइं विज्झायमेव पासति तए णं से पुरिसे जेणेव से कट्ठे तेणेव उवागच्छइ त्ता तं कट्ठे सव्वओ समंता समभिलोएति नो चेव णं तत्थ जोइं पासति तए णं से पुरिसे परियरं बंधड़ फरसुं गिण्हइं तं कट्टं दुहाफालियं करेइ सव्वतो समंता समभिलोएइ णो चेव णं तत्थ जोइं पासइ एवं जाव संखेज्जफालियं करेइ सव्वतो समंता समभिलोएइ नो चेव णं तत्थ जोइं पासइ तए णं से पुरिसे तंसि कटुंसि दुहाफालिए वा जाव संखेज्जफालिए वा जोई अपासमाणे संते तंते परिसंते निव्विण्णे समाणे परसुं एगंते एडेइ त्ता परियरं मुयइ त्ता एवं व० अहो ! मए तेसिं पुरिसाणं असणे० नो साहिएत्तिकट्टु ओहयमणसंकप्पे चिंतासोगसागरसंपविट्टे करयलपल्हत्थमुहे अट्टज्झाणोवगए भूमिगयदिट्ठिए झियाइ, तए णं ते पुरिसा कट्टाई छिंदंति त्ता जेणेव से पुरिसे तेणेव उवागच्छंति त्ता तं पुरिसं ओहयमणसंकप्पं जाव झियायमाणं पासंति त्ता एवं व० - किन्नं तुमं देवाणुप्पिया ! ओहयमणसंकप्पे जाव झियायसि ?, तए णं से पुरिसे एवं व० - तुज्झे णं देवाणुप्पिया ! कट्ठाणं अडविं अणुपविसमाणा ममं एवं व० - अम्हे णं देवाणुप्पिया ! कट्ठाणं अडविं जाव पविट्ठा तए णं अहं तत्तो मुहुत्तंतरस्स तुज्झं असणं० साहेमित्तिकट्टु जेणेव जोई जाव झियामि, तए णं तेसिं पुरिसाणं एगे पुरिसे छेए दक्खे पत्तट्ठे जाव उवएसलद्धे ते पुरिसे एवं व०-गच्छह णं तुज्झे देवाणुप्पिया ! ण्हाया कयबलिकम्मा जाव हव्वमागच्छह जा णं अहं असणं० साहेमित्तिकट्टु परियरं बंधइ त्ता परसुं गिण्हइ त्ता सरं करेइ सरेण अरणि महेइ जोइ पाडेइ ता जोई संधुक्खेइ तेसिं पुरिसाणं असणं० साहेइ तए णं ते पुरिसा ण्हाया कयबलिकम्मा जाव पायच्छित्ता जेणेव से पुरिसे तेणेव उवागच्छंति तए णं से पुरिसे तेसिं पुरिसाणं सुहासणवरगयाणं तं विउलं असणं पाणं खाइमं साइमं उवणेइ तए णं ते पुरिसा तं विउलं असणं० आसाएमाणा वीसाएमाणा जाव विहरंति जिमियभुत्तुत्तरागयाविय णं समाणा आयंता चोक्खा परमसुइभूया तं पुरिसं एवं व० - अहो णं तुमं देवाणुप्पिया ! जड्डे मूढे अपंडिए णिव्विण्णाणे अणुवएसलद्धे जेणं तुमं इच्छसि इंसि दुहाफालियंसि वा० जोतिं पासित्तए, से एएणद्वेणं पएसी ! एवं वुच्चइ मूढतराए णं तुमं पएसी ! ताओ तुच्छतराओ ८।७१। तए णं पएसी राया केसिकुमारसमणं एवं व० - जुत्तए णं भंते! तुब्भं इयच्छेयाणं दक्खाणं बुद्धाणं कुसलाणं महामईणं विणीयाणं विण्णाणपत्ताणं उवएसलद्वाणं अहं इमीसाए (ए) महालियाए महच्चपरिसाए मज्झे उच्चावएहिं आउसेहिं आउसित्तए उच्चावयाहिं उद्धंसणाहिं उद्धंसित्तए एवं निब्भंछणाहिं निच्छोडणाहिं० ?, तए णं केसीकुमारसमणे पएसिं रायं एवं व०जाणासि णं तुमं पएसी ! कति परिसाओ पं० १, भंते! जाणामि चत्तारि परिसाओ पं० तं० खत्तियपरिसा गाहावइपरिसा माहणपरिसा, इसिपरिसा जाणासि णं तुम पएसी ! एयासिं चउण्हं परिसाणं कस्स का दंडणीई पं० ?, हंता ! जाणामि जे णं खत्तियपरिसाए अवरज्झइ से णं हत्थच्छिण्णए वा पायच्छिण्णए वा सीसच्छिण्णए वा सूलाइ वा एगाहच्चे कूडाहच्चे जीवियाओ ववरोविज्जइ, जे णं गाहावइपरिसाए अवरज्झइ से णं तएण वा वेढेण वा पलालेण वा वेढित्ता अगणिकाएणं झामिज्जइ, जेणं माहणपरिसाए अवरज्झइ से णं अणिट्ठाहिं अकंताहिं जाव अमणामाहिं वग्गूहिं उवालंभित्ता कुंडियालंछणए वा सुणगलंछणए वा कीरइ, निव्विसए वा आणविज्जइ, जेणं इसिपरिसाए अवरज्झइ से णं णाइअणिट्ठाहिं जाव णाइअमणामाहिं वग्गूहिं उवालब्भइ, एवं च ताव पएसी ! तुमं जाणासि तहावि णं तुमं ममं वामंवामेणं दंडंदंडेणं पडिकूलंपडिकूलेणं पडिलोमंपडिलोमेणं विवच्चासंविवच्चासेणं वट्टसि, तए णं पएसी राया केसिं कुमारसमणं एवं व० एवं खलु अहं देवाणुप्पिएहिं पढमिल्लुएणं चेव वागरणेणं संलत्ते तए णं ममं इमेयारूवे अब्भत्थिए जाव संकप्पे समुप्पज्जित्था जहा जहा णं एयस्स पुरिसस्स वामंवामेणं जाव विवच्चासंविवच्चासेणं हिस्सामि तहा तहाणं अहं नाणं च नाणोवलंभं च करणं च करणोवलंभं च दंसणं च दंसणोवलंभं च जीवं च जीवोवलंभं च उवलभिस्सामि, तं एएणं अहं कारणेणं देवाणुप्पियाणं वामंवामेणं जाव विवच्चासंविवच्चासेणं वट्टिए, तए णं केसीकुमारसमणे पएसीरायं एवं व० - जाणासि णं तुमं पएसी ! कइ ववहारगा पं० ?, हंता जाणामि, चत्तारि ववहारगा पं० तं० देइ नामेगे णो सण्णवेइ सन्नवेइ नामेगे नो देइ एगे देइवि सन्नवेइवि एगे णो देइ णो सण्णवेइ, जाणासि णं तुमं पएसी ! एएसिं चउण्हं पुरिसाणं के ववहारी के अव्ववहारी ?, हंता जाणामि, तत्थ णं जे से पुरिसे देइ णो सण्णवेइ से णं पुरिसे ववहारी तत्थ णं जे से पुरिसे णो देइ सण्णवे से पुरिसे ववहारी तत्थ णं जे से पुरिसे देइवि सन्नवेइवि से पुरिसे ववहारी तत्थ णं जे से पुरिसे णो देइ णो सन्नवेइ से णं अवववहारी, एवामेव तुमंपि ववहारी, णो चेव श्री आगमगुणमंजूषा - ८३७
Hero
OORN
| SR No. | 003263 |
| Book Title | Agam 13 Upang 02 Rajprashniya Sutra Shwetambar Agam Guna Manjusha |
| Original Sutra Author | N/A |
| Author | Gunsagarsuri |
| Publisher | Jina Goyam Guna Sarvoday Trust Mumbai |
| Publication Year | 1999 |
| Total Pages | 46 |
| Language | Prakrit |
| Classification | Book_Devnagari, Agam, Canon, & agam_rajprashniya |
| File Size | 5 MB |