Page Text
________________
जयंती ! सव्वे वि णं भवसिद्धीया जीवा सिज्झिस्संति । १७ (१) जइ णं भंते! सव्वे भवसिद्धीया जीवा सिज्झिस्संति तम्हा णं भवसिद्धीयविरहिए लोए भविस्सड़ ?
णो इणठ्ठे समठ्ठे । (२) से केणं खाइ णं अट्ठेणं भंते ! एवं वच्चइ सव्वे वि णं भवसिद्धीया जीवा सिज्झिस्संति, नो चेव णं भवसिद्धीयविरहिते लोए भविस्सति ? जयंती ! से जहानामए सव्वागाससेढी सिया अणादीया अणवदग्गा परित्ता परिवुडा, सा णं परमाणुपोग्गलमेत्तेहिं खंडेहिं समए समए अवहीरमाणी अवहीरमाणी अणंताहिं ओसप्पिणि-उस्सप्पिणीहिं अवहीरंती नो चेव णं अवहिया सिया, सेतेणट्ठेणं जयंती ! एवं वुच्चइ सव्वे वि णं जाव भविस्सति । [सु. १८-२०. सुत्तजागर - बलियत्त दुब्बलियत्त दक्खत्त आलसियत्ताइं पडुच्च साहु-असाहुपरूवणा] १८. (१) सुत्तत्तं भंते! साहू, जागरियत्तं साहू ? जयंती ! अत्थेगतियाणं जीवाणं सुत्तत्तं साहू, अत्थेगतियाणं जीवाणं जागरियत्तं साहू । (२) से केणद्वेणं भंते ! एवं युच्चइ 'अत्थेगतियाणं जाव साहू' ? गयंती ! जे इमे जीवा अहम्मिया अहम्माणुया अहम्मिट्ठा अहम्मक्खाई अहम्मपलोई अहम्मपलज्जणा अहम्मसमुदायारा अहम्मेणं चेव वित्तिं कप्पेमाणा विहरंति, एएसि णं जीवाणं सुत्तत्तं साहू । एए
वात्समानो बहुणं पाणाणं भूयाणं जीवाणं सत्ताणं दुक्खणयाए सोयणयाए जाव परियावणयाए वट्टंति। एए णं जीवा सुत्ता समाणा अप्पाणं वा परं वा तदुभयं वा नो बहूहिं अहम्मियाहिं संजोयणाहिं संजोएत्तारो भवंति । एएसि णं जीवाणं सुत्तत्तं साहू । जयंती ! जे इमे जीवा धम्मिया धम्माणुया जाव धम्मेणं चेव वित्तिं कप्पेमाणा विहरंति, एएसि णं जीवाणं जागरियत्तं साहू । एए णं जीवा जागरा समाणा बहूणं पाणाणं जाव सत्ताणं अदुक्खणयाए जाव अपरियावणयाए वट्टंति । एते णं जीवा जागरमाणा अप्पाणं वा परं वा तदुभयं वा नो बहूहिं अहम्मियाहिं संजोयणाहिं संजोएत्तारो भवंति । एएसिं णं जीवाणं सुत्तत्तं साहू । जयंती ! जे इमे जीवा धम्मिया धम्माया जाव धम्मेणं चेव वितिं कप्पेमाणा विहरंति, एएसि णं जीवाणं जागरियत्तं साहू । एए णं जीवा जागरा समाणा बहूणं पाणाणं जाव सत्ताणं अदुक्खणयाए जाव अपरियावणयाए वट्टंति। एते णं जीवा जागरमाणा अप्पाणं वा परं वा तदुभयं वा बहूहिं धम्मियाहिं संजोयणाहिं संजोएत्तारो भवंति । एए णं जीवा जागरमाणा धम्मजागरियाए अप्पाणं जागरइत्तारो भवंति । एएसि णं जीवाणं जागरियत्तं साहू । से तेणट्टेणं जयंती ! एवं वुच्चइ 'अत्थेगतियाणं जीवाणं सुत्तत्तं साहू, अत्थेगतियांणं जीवाणं जागरियत्तं साहू । १९. (१) बलियत्तं भंते! साहू, दुब्बलियत्तं साहू ? जयंती ! अत्थेगतियाणं जीवाणं बलियत्तं साहू, अत्थेगतियाणं जीवाणं दुब्बलियत्तं साहू । (२) से केणट्टेणं भंते ! एवं वुच्चइ 'जाव साहू' ? जयंती ! जे इमे जीवा अहम्मिया जाव विहरंति एएसि णं जीवाणं सुब्बलियंत्तं साहू । एए णं जीवा एवं जहा सुत्तस्स (सु. १८ २ ) तहा दुब्बलियस्स वत्तव्वया भाणियव्वा । बलियस्स जहा जागरस्स (सु. १८२) तहा भाणियव्वं जाव संजोएत्तारो भवंति, एएसि णं जीवाणं बलियत्तं साहू । से तेणट्टेणं जयंती ! एवं वुच्चइ तं चेव जाव साहू । २०. (१) दक्खत्तं भंते ! साहू, आलसियत्तं साहू ? जयंती ! अत्थेगतियाणं जीवाणं दक्खत्तं साहू, अत्थेगतियाणं जीवाणं आलसियत्तं साहू । (२) से केणट्ठेणं भंते ! एवं वुच्चति तं चेव जाव साहू ? जयंती ! जे इमे जीवा अहम्मिया जाव विहरंति, एएसि णं जीवाणं आलसियत्तं साहू, एए णं जीवा अलसा समाणा नो बहूणं जहा सुत्ता (सु० १८ २ ) तहा अलसा भाणियव्वा । जहा जागरा सु० १८२ ) तहा दक्खा भाणियव्वा जाव संजोएत्तारो भवंति । एए णं जीवा दक्खा समाणा बहूहिं आयरियवेयावच्चेहिं, उवज्झायवेयावच्चेहिं, थेरवेयावच्चेहिं, तवस्सिवेयावच्चेहिं, गिलाणवेयावच्चेहिं, सेहवेयावच्चेहिं, कुलवेयावच्चेहिं, गणवेयावच्चेहिं, संघवेयावच्चेहिं, साहम्मियवेयावच्चेहिं अत्ताणं संजोएत्तारो भवंति । एतेसि णं जीवाणं दक्खत्तं साहू। सेतेणद्वेणं तं चेव जाव साहू। सु. २१. इंदियवसट्टे जीवे पडुच्च संसारभमणपरूवणा २१. (१) सोइंदियवसट्टे णं भंते! जीवे किं बंधति ? एवं जहा कोहवसट्टे (स० १२ उ० १ सु० २६) तहेव जाव अणुपरियट्टा । (२) एवं चक्खिदियवसट्टे वि। एवं जाव फांसिदियवसट्टे जाव अणुपरियदृइ । [ सु. २२. जयंतीए पव्वज्जागहणं सिद्धिगमणं च] २२. तए णं सा जयंती समणोवासिया समणस्स भगवओ महावीरस्स अंतियं एयमहं सोच्चा निसम्म हट्टतुट्टा सेसं जहा देवाणंदाए (स० ९ उ० ३३ सु० १७-२०) तहेव पव्वइया जाव सव्वदुक्खप्पहीणा । सेवं भंते ! सेवं भंते ! त्ति० । । १२.२ ।। ★ ★ ★ ततिओ उद्देसओ 'पुढवी'
ॐ श्री आगमगुणमंजूषा - ३९२
| SR No. | 003255 |
| Book Title | Agam 05 Ang 05 Bhagvati Vyakhya Prajnapti Sutra Shwetambar Agam Guna Manjusha |
| Original Sutra Author | N/A |
| Author | Gunsagarsuri |
| Publisher | Jina Goyam Guna Sarvoday Trust Mumbai |
| Publication Year | 1999 |
| Total Pages | 394 |
| Language | Prakrit |
| Classification | Book_Devnagari, Agam, Canon, & agam_bhagwati |
| File Size | 35 MB |