________________
(i) से किं तं इंदियपडिसंलीणया ?
इंदियपडिलीणया पंचविहा पण्णत्ता । तं जहा - १. सोइंदियविसयप्पयारनिरोहो वा, सोइंदियविसयपत्तेसु अत्थेसु रागदोसनिग्गहो वा, २. चक्खिदियविसयप्पयारनिरोहो वा, चक्खिंदियविसयपत्तेसु अत्थेसु रागदोसनिग्गहो वा, ३. घाणिंदियविसयप्पयारनिरोहो वा, घाणिंदियविसयपत्तेसु अत्थेसु रागदोसनिग्गहो वा, ४. जिब्भिंदियविसयप्पयारनिरोहो वा, जिब्भिंदियविसयपत्तेसु अत्थेसु रागदोसनिग्गहो वा, ५. फासिंदियविसयप्पयारनिरोहो वा, फासिंदियविसयप्पयारपत्तेसु अत्थेसु रागदोसनिग्गहो वा ।
सेतं इंदियपडिलीणया ।
(ii) से किं तं कसायपडिसंलीणया ?
कसायपडिसंलीणया चउव्विहा पण्णत्ता । तं जहा - १. कोहस्सुदयनिरोहो वा, उदयपत्तस्स वा कोहस्स विफलीकरणं, २. माणस्सुदयनिरोहो वा उदयपत्तस्स वा माणस्स विफलीकरणं, ३. मायाउदयणिरोहो वा, उदयपत्तस्स वा मायाए विफलीकरणं, ४. लोहस्सुदयणिरोहो वा उदयपत्तस्स वा लोहस्स विफलीकरणं ।
सेतं कसायपडिलीणया ।
(iii) से किं तं जोगपडिसंलीणया ?
जोगपडिसंलीणया तिविहा पण्णत्ता । तं जहा - १. मणजोगपडिसंलीणया, २. वयजोगपडिसंलीणया, ३. कायजोगपडिसंलीणया ।
से किं तं मणजोगपडिसंलीणया ?
१. अकुसलमणणिरोहो वा, २. कुसलमणउदीरणं वा, से तं मणजोगपडिसंलीणया । से किं तं वयजोगपडिसंलीणया ?
१. अकुसलवयणिरोहो वा, २. कुसलवयउदीरणं वा, से तं वयजोगपडिसंलीणया । से किं तं कायजोगपडिसंलीणया ?
कायजोगपडिसंलीणया जं णं सुसमाहियपाणिपाए कुम्मो इव गुत्तिंदिए
सव्वगायपडिली चिट्ठइ |
सेतं कायजोगपडिलीणया ।
Aslesh
समवसरण अधिकार
Jain Education International
(89)
For Private & Personal Use Only
Samavasaran Adhikar
www.jainelibrary.org
