Page Text
________________
(३) ठाणं प. अ. पंचद्वाणं उ २ (४९) कप्पति पंच दत्तीओ भोयणस्स पडिगाहेत्तते, पंच पाणगस्स । ४२५. पंचविधे उवघाते पन्नत्ते, तंजहा उग्गमोवघाते उप्पायणोवघाते एसणोवघाते परिकम्मोवघाते परिहरणोवघाते । पंचविधा विसोधी पन्नत्ता, तंजहा उग्गमविसोधी उप्पायणविसोधी एसणाविसोधी परिकम्मणविसोधी परिहरणविसोधी । ४२६. पंचहिं ठाणेहिं जीवा दुल्लभबोधियत्ताए कम्मं पगकरेति, तंजहा अरहंताणं अवन्नं वदमाणे, अरहंतपन्नत्तस्स धम्मस्स अवन्नं वदमाणे, आयरियउवज्झायाणं अवन्नं वदमाणे, चावण्णस्स संघस्स अवन्नं वयमाणे विवक्कतवबंभचेराणं देवाणं अवन्नं वदमाणे । पंचहिं ठाणेहिं जीवा सुलभबोधियत्ताए कम्मं पगरेति, तंजहा अरहंताणं वन्नं वदमाणे जाव विवक्कतवबंभचेराणं देवाणं वन्नं वदमाणे । ४२७. पंच पंडिसंलीणा पन्नत्ता, तंजहा सोतिदियपडिसंलीणे जाव फासिदियपडिसंलीणे। पंच अप्पडिसंलीणा पन्नत्ता, तंजहा सोतिदियअप्पडिसंलीणे जाव फासिंदियअप्पडिसंलीणे। पंचविधे संवरे पन्नत्ते, तंजहा सोतिदियसंवरे जाव फासिदियसंवरे । पंचविधे असंवरे पन्नत्ते, तंजा सोतिदिय असंवरे जाव फासिदियअसंवरे । ४२८. पंचविधे संजमे पन्नत्ते, तंजहा सामातितसंजमे छेदोवद्वावणियसंजमे परिहारविसुद्धितसंजमे सुहुमसंपरायसंजमे अहक्खायसंजमे । ४२९. एगिदिया णं जीवा असमारभमाणस्स पंचविधे संजमे कज्जति, तंजहा पुढविकातितसंजमे जाव वणस्सतिंकातितसंजमे । एगिदिया णं जीवा समारभमाणस्स पंचविहे असंजमे कज्जति, तंजहा पुढविकातित असंजमे जाव वणस्सतिकातितअसंजमे । ४३०. पंचिंदिया णं जीवा असमारभमाणस्स पंचविधे संजमे कज्जति, तंजहा सोतिदितसंजमे जाव फासिदितसंजमे । पंचिदिया णं जीवा समारभमाणस्स पंचविधे असंजमे कज्जति, तंजहा सोतिंदिय असंजमे जाव फासिंदियअसंजमे | सव्वपाण- भूत- जीव-सत्ता णं असमारभमाणस्स पंचविधे संजमे कज्जति, तंजहा एगेदितसंजमे जाव पंचेदितसंजमे । सव्वपाण-भूतजीव-सत्ता णं समारभमाणस्स पंचविधे असंजमे कज्जति, तंजहा- एगेंदित असंजमे जाव पंचेदितअसंजमे । ४३१. पंचविधा तणवणस्सतिकातिता पन्नत्ता, तंजा अग्गबीया मूलबीया पोरबीया खंधबीया बीयरूहा । ४३२. पंचविधे आयारे पन्नत्ते, तंजहा णाणायारे दंसणायारे चरित्तायारे तवायारे वीरियायारे । ४३३. पंचविधे आयारपकप्पे पन्नत्ते, तंजहा मासिते उग्घातिते, मासिए अणुग्धातिए, चाउम्मासिए उग्घाइए, चाउम्मासिए अणुग्घातिते, आरोवणा। आरोवणा पंचविहा पन्नत्ता, तंजहा पट्ठविया, ठविया, कसिणा, अकसिणा, हाडहडा । ४३४. जंबुद्दीवे दीवे मंदरस्स पव्वयस्स पुरत्थिमेणं सीयाते महानदीते उत्तरेणं पंच वक्खारपव्वता पन्नत्ता, तंजहा मालवंते चित्तकूडे पम्हकूडे णलिणकूडे एगसेले १ । जंबुमंदरपुरत्थिमेणं सीताते महाणदीते दाहिणेणं पंच वक्खारपव्वता पन्नत्ता, तंजहा तिकडे वेसमणकूडे अंजणे मातंजणे सोमणसे २ । जंबुमंदरपच्चत्थिमेणं सीओताते महाणदीते दाहिणेणं पंच वक्खारपव्वता पन्नत्ता, तंजहा विज्जुप्पभे अंकावती म्हावती आसीविसे सुहावहे ३ | जंबुमंदरपच्चत्थिमेणं सीतोताते महानदीते उत्तरेणं पंच वक्खारपव्वता पन्नत्ता, तंजहा चंदपव्वते सूरपव्वते नागपव्वते देवपव्वते गंधमादणे ४ । जंबुमंदरदाहिणेणं देवकुराए कुराए पंच महद्दहा पन्नत्ता, तंजहा निसहदहे देवकुरूदहे सूरदहे सुलसदहे विज्जुप्पभदहे ५ | जंबुमंदरउत्तरेण उत्तरकुराते कुराए पंच महद्दहा पन्नत्ता, तंजहा नीलवंतदहे उत्तरकुरूदहे चंददहे एरावणदहे मालवंतदहे ६ । सव्वे वि णं वक्खारपव्वया सीया-सीओयाओ महाणदीओ मंदरं वा पव्वतं तेणं पंच जोयणसताइं उडुंउच्चत्तेणं पंच गाउयसताइं उव्वेहेणं ७ । धायइसंडदीवपुरत्थिमद्धे णं मंदरस्स पव्वतस्स पुरत्थिमेणं सीताते महाणतीते उत्तरेणं पंच वक्खारपव्वता पत्ता, तंजा मालवंते एवं जधा जंबुद्दीवे तधा जाव पुक्खरवरदीवड्डपच्चत्थिमद्धे वक्खारा दहा य वक्खारपव्वयाणं उच्चत्तं भाणितव्वं । समयखेत्ते णं पंच भरहाई पंच एरवताइं, एवं जधा चउट्टाणे बितीयउद्देसे तथा एत्थ वि भाणियव्वं जाव पंच मंदरा पंच मंदरचूलिताओ, णवरं उसुयारा णत्थि । ४३५. उसमे णं अरहा कोसलिए पंच धणुसताइं उखंउच्चत्तेणं होत्था १ । भरहे णं राया चाउरंतचक्कवट्टी पंच धणुसयाइं उडुंउच्चत्तेणं होत्था २ । बाहुबली णमणगारे एवं चेव ३, बंभी णमज्जा एवं चेव ४, एवं सुंदरी वि ५ । ४३६. पंचहिं ठाणेहिं सुत्ते विबुज्झेज्जा, तंजहा सद्देणं फासेणं भोयणपरिणामेणं णिद्दक्खएणं सुविणदंसणेणं । ४३७. पंचहिं ठाणेहिं समणे णिग्गंथे णिग्गंथिं गिण्हमाणे वा अवलंबमाणे वा णातिक्कमति, तंजहा निग्गंथिं च णं अन्नयरे पसुजातिए वा पक्खिजातिए वा ओहातेज्जा, तत्थ णिग्गंथे णिग्गंथिं गेण्हमाणे वा अवलंबमाणे वा नातिक्कमति १, णिग्गंथे णिग्गंथिं दुग्गंसि वा विसमंसि वा पक्खलमाणि वा पवडमाणि वा गिण्हमाणे वा अवलंबमाणे वा णातिक्कमति श्री आगमगणमंजषा १४७
Education
SOYOK
ॐॐॐॐॐॐॐॐ
| SR No. | 002601 |
| Book Title | Agam Guna Manjusha |
| Original Sutra Author | N/A |
| Author | Gunsagarsuri |
| Publisher | Jina Goyam Guna Sarvoday Trust Mumbai |
| Publication Year | 1999 |
| Total Pages | 1868 |
| Language | Prakrit, Gujarati, Hindi, English |
| Classification | Book_Devnagari, Agam, & Canon |
| File Size | 85 MB |