________________
मयंकलेहाचरियं
सा सागरचंदेणं, दिट्ठा सव्वंगदिव्वनेवच्छा । ससि-सूर-सरिस-मणिमय-झलज्झलायंतताडंका ॥४६१ ।। अहह । इमा अप्पडिमा, सरपडिमा का वि चिंतिउं एवं । सा सागरचंदेणं, नमिया पाएसु पडिऊणं ॥४६२ ।। हसियं सहत्थयालं, तत्तो मित्तेहिं तस्स सव्वेहिं । सो आह हसह किं खल ? नमणिज्जा देवया सव्वा ॥४६३॥ मित्ता बिंति न एसा, सर-पडिमा किंतु लडह-सव्वंगा । धणसार-सिट्ठि-धूया, मयंकलेह त्ति सुपसिद्धा ॥४६४॥ जल-निहि-जल-महण-दुहं, महुमहणो नो सहिज्ज लच्छिकए । होज्जा पव्वुप्पन्ना, जइ एसा चंग-सव्वंगा ॥४६५॥ जइ एसा न वि दिट्ठा, अपारसंसारमारवपहम्मि । अमय-सरिया सरिच्छा, मूढ ! तए कहस किं दिटुं ? ||४६६।। अह सो चिंतइ निप्फलमेयं मह जोव्वणं च जीयं च । जिय सुरतरुणी तरुणी, जइ एसा हवइ न वि दइया ॥४६७॥ अह पत्तस्स सगेहं, इमस्स उद्दाम-काम-जरियस्स । सासा वयणे जाया, अरुई अनम्मि सव्वम्मि ॥४६८॥ आही वा वाही वा, तुह देहं दहइ कहसु को ? वच्छ ! इय जणएहिं पुट्ठो, न किं पि पडिजंपिओ एसो ॥४६९।। मित्तमुह-मुणियतत्तो, सिट्ठिसंठावए नियं पुत्तं ।। चयसु विसायपिसायं, होही तुह चेव सा तरुणी ॥४७०॥ पत्तो य तत्थ नयरे, सायरदत्तेण आसि कारवियं । विलसिरसिहरसहस्सं, मणिभवणं उसहनाहस्स ॥४७१॥ जिण-बिंबाण दसाहियमहामहे तयणु दसमदिवसम्मि । सायरदत्तेण इमो, धणसारो तत्थ आहविओ ॥४७२।। अभयप्पयाण-बहुधणवियरणजिणसंघभत्तिपमुहेहिं । वित्ते दसाहियमहे, सायरगेहम्मि ते पत्ता ॥४७३।।
Jain Education International 2010_04
For Private & Personal Use Only
www.jainelibrary.org
