Page Text
________________
२८८
मणोरमा कहा
अण्णम्मि दिणे भणिओ भाणुप्पहाए सुभाण--"पिययम ! कि कारणं तुमं मंदसिणेहो विय लक्खीयसि ?" तेण भणियं--"एरिसं चेव तुह सीलं जेण संतो वि सिणेहो परिगलइ ।" एयं सोऊण संकिया सा चितियमणाए-विण्णायाहमणेण । ता मारेमि केण वि उवाएण एयं । पच्छा भाणुणा सद्धि विगयसंका विसयसुहमणुभवामि' त्ति परिभाविऊण लद्धावसराए दिण्णं भोयणे विसं । विण्णायं सुभाणणा। साहियं तक्खणा वेज्जस्स । कया तेण वमणाइया चिगिच्छा। पउणि[क]ओ कहकहवि सुभाणू । संपूइऊण वत्थाइणा विसज्जिओ वेज्जो । तओ चितिउमारद्धो--'अहो णं इमीए पावाए चिर-काल-रूढमवि मए सह पणयं परिहरिऊण परपुरिसासत्तमाणसाए पावमेयमायरियं । अज्ज वि अत्थि में धण्णया, जमकयपरलोगसंबलो न पंचत्तं पाविओ। अलं मे इत्थीयणसंगमेण ।
इत्थियाहि नाम नावेक्खइ दक्खिण्णं, न गणेइ परिचयं, न पालेइ पडिवण्णं, पम्हसइ पुव्वपण[यं] न सरइ सुयणत्तणं, विस्सरइ उवयारपरंपरं, उभयपास-पज्जलंतमुम्म[रग्गि] व न बिज्झायइ, दीविय व्व नेहपूरिया वि पज्जलणसीला, पवणायपडाग व्व चंचला सरूवेण, वंसलि व्व सुवंसजाया वि बहुजणवाइज्जंतछिद्दा, गंति व्व बहुभारक्खमा वि अणेगमग्गचारिणी, संपइ व्व घरमंडणा वि सव्वओ []तिसंकणीया, दीवयसिह व्व सुनिम्मला वि मालिण्णकारिणी, कुसिव्व घणसंघिघडणा वि तुडतिक्खत्तणेण दुक्खावणी, संझ व्व पयडियागुरागा वि भयकारिणी, कहाल व्व मुलमुहपूरिया वि गरुयसमुल्लाविरी, तिलकुट्टि व्व दंसियनेहगुणा, वि पयइ-कडुयत्तणेण विगारगारिगा, घंचियघाणिय व्व पढमदावियतिलसंबंधा वि कमेण नेह-विमोयणेण पज्जंतपयडियक्खलभावाअंतो विसस्स भरिया बहिलण्हा सप्पिणि व्व दो जीहा । कुडिलगई कुडिलमई परछिद्दगवेसगा महिला ।४३६। बहु कूड-कवड-भरियाण विगयसोगाण सव्व-रहियाण । जे न वसे महिलाणं नमो नमो ताण पुरिसाण ।४३७।
तओ संवेगसमावण्णेण पुणो वि चितियमणेण--"न मे कज्जं कलत्तेण, न वा वयंसेण। केवलं नइकूलुग्गयदुम व्व सयमेव विणासं पाविस्संति अणायारकारिणो। घेत्तूण सारधणं गामंतरगमणमिसेण निग्गओ सुभाणू । भाणू वि तीए सद्धि निस्संको विल[सं]तो दिट्ठो आरक्खियपुरिसेहिं । गाढं बंधिऊण दंसिओ राइणो । माराविओ कुमारेण । अट्टज्झाणेण मरिऊण विरइविराहणाजणियकम्मेण उववण्णो सत्तमपुढवीए उक्कोसाऊ नारओ। सुभाणू वि परिपालिऊण साबगधम्म जहागहियवयपरिपालणेण पवढमाणपरिणामो विणिओइऊण सत्तसु ठाणएसु दविणजायं समाहिमरणेण मरिऊण सम्मुप्पण्णो लंतयकप्पे मज्झिमाऊ वेमाणिओ। तओ चुओ नेव्वाणं गमिस्सइ । ता भो-- उवभोगे परिभोगे परिमाणं जे कुणंति संतुटा । ते इह भवे वि सुहिया परभवे जंति निश्वाणं ।४३८ । जे पुण्ण इंदियवसगा मोक्कलमण-वय-काय-वावारा । ते पावकम्म-निरया उभयभव-विराहगा नेया ।४३९। तइय गुणव्वयं।
तइयगुणव्वयं अणत्थदंडाओ विरमणं सो पूण चउम्विहो । तं जहा-अवज्झाणायरिओ पमायायरिओ हिंसपयाणायरिओ पावोवएसायरिओ एस चउब्विहो वि पडिवण्णवालसविहसावगधम्मेण सावगेण परिहरियव्वो । तहा एयं गुणव्वयं पडिवज्जिऊण सव्वत्थ उवओगपुरस्सरं जयणाए वट्रियव्वं । संपइ इमस्स चेव गुणव्वयस्स आराहगविराहगा दंसिज्जंति ।
अत्थि इहेव भारहेवासे दक्खिणावहे वरया-नईतीरे मंडणकुंडिणं नाम नयरं । तम्मि य धणगुत्तो सावयपुत्तो परिवसइ । मित्तो य तस्स ईसरदत्तसेट्ठि । सुओ सिवो नाम । सो पुण धणरक्खणपरायणो चेव न अप्पणा भुंजइ न अण्णस्स देइ । केवलं विढविऊण धणं धरणीए निहणइ । तओ लोएहि 'धणजक्खो'त्ति नामं कयं । तं चेव पसिद्धिगयं । अण्णया मरणधम्मयाए सरीराणं मओ धणजक्खपिया । काऊण संखेवेण मयकिच्चाणि धणोवज्जणं काउमारद्धो धणजक्खो। आढत्ता अणेगे अत्थोवज्जणोवाया । विढत्तं भरिदविणजायं । समुप्पण्णा पुत्ता । धणजक्खो धम्मस्स नामं पि न गिण्हइ । अण्णम्मि दिणे भणिओ धणगुत्तेण-"वयंस ! धम्मेण चेव [धणागमो भवइ । धम्मेण धणं विउलं धम्मेण यसग्गमोक्खसंपत्ती । किं बहुणा धम्मेणं सव्वं सुंदरं होइ । ता पडिवज्जसु कि पि धम्माणदाणं ।" धणजक्खेण भणियं"कि धम्मेण ? धम्मिया वि धणवंताण घरंगणे भिक्खं भमंता दीसंति। अत्थो चेव एत्थ पुरिसत्थो । जओ
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |