Page Text
________________
२५६
मणोरमा-कहा
पडिवत्तीए सोहिस्सामि रायविरुद्धं पि न भविस्सइ । जओ न ममाओ अण्णो को वि एवं वियाणइ ।" धणचंदेण भणियं-"न मह इमिणा अत्थेण पओयणं । अज्जेव मए तुह भिण्णण होयव्वं ।” धणावहेण भणियं-"एगं ताव निव्ववसाओ, बीयं भिण्णभवणे ण भायसि । भवसु, न कोई निवारेइ ।" अलिय-धण-विढत्त-दविणमगिण्हतो चेव भिण्णो ठिओ धणचंदो सच्चाभिभासी कालं गमेइ । इओ य पारद्धा राइणा मूलगवेसणा । केण सा परचक्कालियंवत्ता कया? परंपरएण तत्थागया जत्थ धणावहो चिट्टइ । तत्थ भणिओ धणावहो रायपुरिसेहिं-“तुम पि अण्णं कहितगं दंसिऊण चिट्ठसु निराकुलो ।" न सो सक्केइ अण्णं दंसि । तओ नीओ रायउले । दंसिओ रणो । साहिओ असंहतएहि समग्धभंड-गहण-वइयरो। तओ 'कुकम्मकारी एसो' ति संजायनिच्छएण राइणा दढं कयत्थाविऊण विविहाकय]-कत्थणाहिं छिण्णा जीहा । पच्छा विगयजीविओ पक्खित्तो नपरबाहि । मरिऊण समुप्पण्णो सक्करपभाए पुढवीए मज्झिमाउ नेरइओ । संपूइओ मंती । समप्पिया महा । धणचंदो वि जहागहिरवय-परिपालणासत्तमाणसो साह-साहम्मियसुस्सुसणापरायणो कालं गमेइ ।
अण्णया सज्जणजणमाण[से] सु व निम्मलीभूएसु, सप्पुरिसपरंपरासु व मज्जायावट्ठियासु गिरिनईसु, कुलीणजणसंतईसु व फलभरेण नमंतीसु पिक्कसालीसु, सयलजलयावरुद्धपयावं समं दट्ठण पमुइयं जयं, तित्तिअभिनिवेसेण व संपावियावसरं खरंतमेइणीतलं दिवायरे, जलय-कालकालिमाकसणी कयं नहयलं धवलं व कुणते अलण्हजोहानियरेण मयलंछणे, रिक्खगहगण-ससिरेहिरनहयलसोहं व समणुकरिते, सियसयवत्तसहस्सवत्तपुंडरियदूपुरपूरिए य पउमायरनियरे, दुग्गयजणपियरनियरे व्व अलद्धठाणे इओ तओ परियडते गयणंगणे घणविसरे, अकज्जायरणसज्जस[इ]रिणी जणं इव वइ उप्पि गयक्खिए इक्खवाडे, चक्कंगसंगसंगया साहेसु सरूच्छंगे सुपहसिहिकुलसंतोसे हरियपूट्रसंतद्रवप्पनयंतगोविसेसभागए सरयसमये गंधवारणं समारुहिऊण समं धणचंदेण विणिग्गओ समरसेण राया । पत्तो सिरिसुंदरनामउज्जाणं । विविहकीलाहिं कीलंतो निसण्णो सहयार-छायाए ।
एत्थंतरे वियंसिओ तण-सक्कराइयमवणयंतो सुरहिमारुओ। विमुक्कवेराणुबंध-सहाव-विरुद्धा वि सप्प-नउल-मज्जारमूसगाइपसुगणा परोप्परं कीलिउमारद्धा । सव्वोउय-कुसुमेहि कुसुमिया उज्जाण-पायवा । मणहरुत्ताल-रमणीयगुंजियारवभरिय-दियंतरा पमोय-भर-निन्भरा पयाहिणगई जाया विहंगमगणा । सरीरसुहपयावं उज्जोइउं पयत्तो तमुद्देसं दिवायरो। तओ पुच्छिओ राइणा समासण्णा निसण्णो धणचंदो-“अज्ज किं पुण एयं अच्छेरब्भूयं व उज्जाणं पडिहाइ ?"धणचंदेण भणियं-"महाराय ! अहं पि न सम्म वियाणामि।"
एत्यंतरे पुव्वदिसाविभागाओ पभूयकिरण-नियर-परिवेढियं तरुण-तरणिबिंब व [चव]लाओ अवराभिमुहिमुन्वलियं पंचवण्णरयणरासिचिंचइयं, सहरिसामर-नियरमुहर-विणिग्गय-जयजयाराव-भरिय-भुवणोदरं, सजलहरगहिरासंख-संखवज्जताउज्ज-सह-सवण-संजाय-घण-धणिय-संक-संतुट्ठ-सिहि-सरय-समारद्ध-तंडवं, सुरसुंदरीसंदोह-गिज्जंत-पवरमंगलं, सरससुगंध-पारियाय-पमुह-तरु-विसर-गहिय-कुसुमुक्केराणुसार-संवलिय-छप्पयावलि-संछण्ण-नहंगणं, अणेगदेवकोडि-परिवारियं विज्जिय-चाउरंत-संसार-मंडलं, सरणागयभविय-जणनिक्कारणबंधुणो धम्मवरचाउरत-चक्कवट्टि य धम्मवरतित्थस्स जुगबाहुणो तित्थय रस्स दिह्र राइणा सहावसुंदरे सिरिसुंदरे उज्जाणे समोयरंतं धम्मचक्कं । तयणंतरं च पंचमहव्वयधुर-भार-धरण-धोरेयकंधरो अप्पेगइया तीयाणागय-वट्टमाण-वत्थु-वित्थर-वियाणण-पवण-केवलनाणधारिणो, अप्पेगइया माणुसुत्तर-गिरि-मज्झवत्तिसत्तमणोगयदव्वाविभावणसमत्थमणपज्जवनाणधारिणो, अप्पेगइया रूवि-पयत्थगोयर
ओहिनाण-संगया, अप्पेगइया सुयसायर-पारया दुवालसंग-धारिणो, अप्पेगइया एक्कारसंगसंगया, अण्णे अक्खीणमहाणसलद्धिणो, पुलायलद्धिसालिणो, विउव्वियलद्धिमतो, जंघाचारणा, आमोसहिणो, तेउस्सिय-धरियडिंडीर-पिंडपंडुरायवत्तो पहट्ठामरकरताडिय-दुंदुहि-निनाय-भरिय-बंभंडो, चउद्दिसिविरायंत-भूरिभामंडल-मज्झट्ठिओ, सव्वेयर-पासट्ठिय-सयचामीयरसक्क-दोधुव्वमाण-चारुचामरो, विणएण य सुरासुर-समारद्ध-सब्भूयगुणकित्तणो, डझंत-पवर-कप्पूरागरु-कुंदरुक्क-सुगंधधूव-धूमधयारिय-दिसामंडलो, अच्चंत-सोम-दंसणो, निरुवमरूव-संपयासमण्णिओ, देव-विणिम्मिय-नव-कणय-कमलोवरि
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |