Page Text
________________
सम्मत्त-लंभो णाम बीओ अवसरो तत्थ य तेयसारनिवकहा
२१५
आणंद भिराए पयंपियं [ कुमरी महु परिणीया ] जं वरमाया वि इहं मनचितिया झत्ति संपत्ता ॥ जइ तुह रोयइ ता भणसु जेण एणामुही कुमारस्स । दिज्जइ किज्जइ संपइ विवाह - सामग्गिया सयला ॥ तं अमिय-रस-सरिसं वयणं सोऊण तीए सा तुट्टा । भणइ लहुं सहि ! कीरउ को कल्लाणे विरोहो त्ति । ४१५ । तत्तो दोणि विवग्गा हरिसियचित्ता कुणंति कज्जाई । जा पत्तो अनुकूलो विवाह - दियहो सुहेणे व ।। ४१६ ॥ आणंद - निब्भराई कर-गह समयम्मि ताई जायाई । सेय-सलिल-छलेणं वम्मह-रस- सित्त हत्थाई ॥ ४१७ ।। अण्णोण्णहत्थ-संफास- सोक्खा पसरत- बहल- पुलयाई । निमिसेक्क - मुहालोयणलज्जाभ [र] मंथर-मुहाई || अण्णोणकरावीडण- पमुक्क- सिक्कार - मणहरिल्लाई । आयारमेत्त- पिसुणिय-निरुवम पेमाणुबंधाई ॥। ४१९ ।। भमिऊण मंडलाई तत्तो उचियासणे निसण्णाई । जणणीहिं तओ दाणं दिण्णं आणंदियमणाहि ||४२० || वरमायाए हुए चत्तालीसं सुवण्ण - कोडी [ ओ] । बहु मायाए वरस्स वि तेत्तियमेत्ताओ दिण्णाओ ।। ४२१ ।। वर-मुहल-हारा पंचविह-विचित्त- रयण-रासीओ । वत्थाह [र]ण-विलेवणजाईओ बहुप्पयाराओ ।।४२२।। दिणाओ परियो वि यवत्थाइ - पयाण- पमुइओ विहिओ । वित्तं पाणिग्गहणं वोलीणा वासरा केवि ॥४२३॥
इओ य कित्तिवम्मराइणा रहसि भणिओ विहप्फई नाम नियमंती-- "अज्ज मए रयणिचरिमजामे दिट्ठी अप्पा सीहासणाओ निवडिओ सुमिणम्मि ।" मंतिणा भणियं -- “ कीरंतु संतिकम्माणि न सोहणो सुमिणओ ।" विसज्जिऊण मंति समाहूओ नेमित्तिओ । पूयापुरस्सरं पुच्छिओ सुमिण फलं । तेण वि सुइरं निरूविऊण सविसायं जंपियं-"देव ! कि पियं पयंपेमि जहट्टियं वा ?" रण्णा भणियं - " जहट्टियं ।" इयरेण भणियं - " परिमियदिणाण मज्झे चेव छत्तभंगं पासामि ।" तओ दुस्सुमिणदंसणेणं दढधम्माण गमण [जा] य-संको संपूइऊण नेमित्तियं, उट्ठिओ सहासणाओ । पेसिया दढधम्म- गवसणत्थं तेण मग्गेण पुरिसा । कइवयदिणावसाणे समागया । पुच्छिया राइणा । कहिउमाढत्ता -- "देव ! इओ तओ परिभमंता पत्ता अम्हे सालाडवि । दिट्ठो य देवकुमारोत्रमो तरुण-तरुणि सरिसच्छवी अहिणवारुहंत - नवजोव्वणो अहरिय-सुरसुंदरिरूव सो[ह]ग्गाए वरतरुणीएस [मं] महासर-परिसरे कीलंतो एगो पुरिसो । तस्स णं गच्छंतस्स सयमेव सिरोवरी संठियं वच्चइ सियायवत्तं विणा वि किंरवग्गं । उभयपासेसु निवडति नहयले चारुचामराणि । पेच्छंताणं चेव सो अम्हाणं समंतओ वेढिओ वणदेवयाहि । एत्यंतरे सप्पणयं पणमिऊण भणिया तेणेगा इत्थिया -- "अम्मो ! दरिसिओ तए पुत्तसिणेहो । कयं जं कायव्वं । संपयं सट्टाणमलं करेसु ।” तीए भणियं -- “पुत्त ! नियपुण्णेहि पट्टिओ तुमं । तह वि कुलीणा एरिसाणि जंपति ।" अणाए भणियं -- " कुमार ! सत्तरत्तमज्झे कित्तिधम्मरायरज्जे तुहाभिसेओ भविस्सइ । तं कल्लाणं पि दट्ठण गच्छउ तुम्ह जणणी । एयं सोऊण ससोगाउरियवयमागया, साहियं जहा दिट्ठ सुयं च देव -पायाणं । संपयं सामी पमाणं" ति भणिय मो[म] सिया । कित्तिवम्मो वि एवं सुणिय चउरंगबल- परिवारिओ कइवयदिणेहिं पत्तो सालाडवि । आवासिओ सरतीरसंठिए काणणे । दिट्ठो सरतीर-संठिएण तेयसारेण । गहिऊणः खग्ग- रयणं उठतो पुच्छिओ ताराए -- “ कहिं तुमं पत्थिओ ?” कुमारेण भणियं - काणणोवद्दव-निवारणत्थं ।” तीए भणियं -- "अलं ते परिस्समेण । अहमेवेयं निक्कारणवइरिणं कयंतातिहिं करिस्सामि "त्ति पयंपिऊण गया गयणंगणे । पेच्छंताण चेव सामंतामच्च भड - भोइयाणं पाविओ पंचतं कित्तिधम्म नराहिवो । गयणगणगयाए भेसिया अमच्चादओ । भणिया य-- “ जइ तेयसारं सामियं न करेह ता नत्थि भे जीवियं । " पडिवण्णमणेह | अहिसित्तो मिलिऊण रज्जे तेयसारो । पणया सामंतादओ । पमुइय - माणसा गया सट्टाणे सुतारा, तेयसारराया वि कित्तिवम्मरायहाणि । मुणिय- वृत्तंतं समागयं पंपापुरीओ विजयसिरिपमुहमंतेउरं सामंतामच्चवग्गो य । रज्जमनुपालेमाणस्स तिवग्गसारं विसयसुहाणुहवंतस्स सुहंसुहेण वच्चइ कालो ।
अण्णा सहा मंडवगस्स विण्णायवृत्तंता पेइयरज्जाओ पहाण- पुरिसा पेसिया । समागया पुरिसा । पच्चभिण्णाया तेयसारेण । पुच्छिया य कुसलं तायस्स । तेहि भणियं -- "कुसलं जसेण न सरीरेण ।" एयं सुणिय बाह-जल भरियलोणेण जंपियं तेयसारराइणा -- “ किमत्थमिओ नियकुल नहयल - चंदमा सुगहिय-नामधेओ ताओ ?" तेहि भणिय-
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |