Page Text
________________
मणोरमा-कहा
चित्तं चंपिज्जउ पव्वएण सलसलइ जेण न ह किंचि । न तहा नयणेहि अहं कयत्थिओ जह य चित्तण ।।३०४।। खणट्ठिनट्ठदुल्लहलोयकए हिययकिलकिलम्मिहसि । मुंच विसायं संपइ पडियसहं होह कि बहुणा ॥३०५।। वामे विहिम्मि संपइ अइदुस्सहदुक्खभारभरियं पि । किं हिययवज्जघडियं जं न वि सय-सक्करं जासि ।।
एमाइबहवियप्पं विलवमाणस्स विज्जुसेहरस्स अपडिपुण्ण-पइण्णस्स पुरओ संठियस्स सुंदरस्स किं कायव्वया विमहस्स मेहरहस्स, ईसि वियसियवयणा, वियडपइक्खेव-संजाय-सेय-बिंदु-संदोह-मंडियगंडस्थला, परितोस-विसप्पमाणवयण-कमला, समागया जयमंगला । दिण्णासणा सुहनिसण्णा भणिया सुंदरेण-"सागयं भहे ! संतुट्ठा विय लक्खीयसि ?" तीए भणियं--"वयणमेत्तेण न उण कज्जसिद्धीए।" मेहरहेण भणियं-“पढ़मं ताव वयणमेव पच्छा कज्जसिद्धी भवइ ।” संदरेण भणियं--"कहेह ताव केरिसं वयणं ।" तीए भणियं--सावहाणो सुण, दठ्ठण वरण-वइयरं पुच्छिया हं कणगमंजरीए-हले जयमंगले ! संपइ किं कायव्वं?' मए भणियं-'जं गुरुयणो समाइस्संति ।" तओ सकोवं जंपियमिमाए-"तुम पि एवमुल्लवसि ? अहो ते समचित्तया ! मोत्तुं विज्जुसेहरं जइ परं जलणो मे सरीरे लग्गइ।" तओ सा सहीजणेण समासासिज्जमाणा वि परमजोगिणि व्व मंतं हिययट्ठियं विज्ज्सेहरकुमारं झायंती निच्चेट्ठा हवइ । पुणो जक्खाइट्ट व्व विमक्क-गरुय-हुंकारा खणं गायइ, खणं नच्चइ, खणं वेवइ खणं रोयइ, इच्चाइअसमंजसाणि कुणमाणी खणं पि न विरमेइ। तओ मए गंतूण साहियं तज्जणणीए रयणमंजरीए जहट्ठिअं । तीए भणियं-'जं वच्छाए रोयइ तं मए कायव्वं, कि एत्थ वि बलामोडी। भणसु गंतूण तहा जहा न सा अधिई करेइ।' अहं पि जणणी भणियंतीए कहिऊण तुम्ह समीवमागय ति।" सुंदरेण भणियं-"जइ अणुकूलो विही ता एवं पि भविस्सइ ।” पुप्फतंबोलाइणा सम्माणिऊण विसज्जिया जयमंगला । तव्वयणसमासासियमाणसो ठिओ कइवयदिवसाणि विज्जसेहरो । साहिओ रयणमंजरीए भत्तुणो सव्वो वि निय-सुया-वइयरो। न पडिवण्णमणेण । विण्णायमेयं कणयमंजरीए । विगलिया सा बंधणा घणियं धीइविरलिया जाया । निरुद्धसई रुयमाणीए वोलीणो वासरो । समागया रयणी। वियंभिया कणयमंजरीए अरई। वित्थरिओ रणरणओ। एगागिणी चेव जंपिउमारद्धा-"अहो तायस्स निरवेक्खया! अहो ! निन्नेहया जेण जणणीवयण न पडिवण्णं ! अहवा वि नत्थि दोसो तायस्स विसू-रणवसगस्स सव्व-जणाण वयणं कळं खलु भिच्चभावो त्ति । जओओसरइ पहूण परव्वसाण तावियपराण वि पयावो। पडिबिबगओ तिव्वो वि हुयवहो निप्फलो चेव ।।३०७।।
एवं ठिए मरणमेव एत्थ पडियारो त्ति चितिऊण निग्गया सणियं कणयमंजरी। दिट्ठा निग्गच्छंती जयमंगलाए । संजायसंका सा वि तयणुमग्गेण पट्टिया । गया कणयमंजरी पच्चासण्णज्जाणे । घण-पायव-अंतरिया भुल्ला जयमंगला। कणयमंजरी वि पत्ता वंजुलविडविहेटुओ । निरूवियाओ दिसाओ। समारूढा तत्थेव बद्धो साहाए उत्तरिज्जेण पासओ। कओ नियकंधरापण ई । बाहजलभरियलोयणा सगग्गयक्खरं जंपिउमाढत्ता-“अंब ! अवच्चवच्छले ! आजम्माओ दुन्विणय-कुलहर-भयाए सच्छंदकारिणीए जं मए अवरद्धं संपयं खमियव्वं । सायर-गंभीर-हिययताय ! तुम पि मरिसेज्जसू मे परलोयपत्थियाए दुन्विलसियं । जणणीसमहियनेहे जयमंगले खमसु जं किंचि मए अवरद्धं । तहाहिययभंतरसंठिय-सुवियड्ढ-गुणड्ढ-सुहयर-सुरूव ! पत्थेमि कि पि सामिय पाणच्चायं करेमाणी ।।३०८।। तुह संगम-रहियाए वोलीणो जइवि एस मह जम्भो । जम्मंतरे वि मह तह वि सुहय तं वल्लहो होज्ज ॥३०९।। अण्णं पि कि पि भणिमो भणंतं जइवि निट्ठरं तहवि । नीहर मह हिययाओ रुद्ध कंठे न निस्सारो॥३१०।। मण्णे न किंपि अण्णं विहिणा मह मरण-कारणं लद्धं । तेणाचितियमेयं तुमए सह सणं विहियं ॥३११॥
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |