Page Text
________________
सम्मत्त-बीय-लंभो णाम पढमो अवसरो तत्थ य धणदेवकहाणगे सोमसेट्ठीणो खेमंकरभवो
७५
कमलेहि।" कय पहाण-भोयणा विदिण्ण-पवरवत्थाहरणा संझा समए भणिया राइणा--"गच्छह ताव तुम्हे। पुण पच्छा समागमिस्सामो।" तेहि भणियं--"न कालक्खयमेयं पओयणं । ता सिग्घं पयट्टउ देवो।" नाऊण ताण निच्छयं चउरंगबलसहिओ पयट्रो महया विच्छड्डण खेमकर-निवो। पत्तो कइवयपयाणएहि विस्सपुरीए । गंतूण साहियं विस्ससेणनरवइणो। चित्तविचित्तेहि दसिया राइणा आवास-भूमी। कयाओ उचियपडिवत्ती। पेसियं पाण-भोयणाइयं। बीयदिवसे य समाहूया सव्वे राइणो। सयंवरामंडवे निसण्णा दंसियासणेसु ।
एत्थंतरे नियंसिय-सियपट्ट-वत्थोवसोहिया हारहार-एगावलि-कणगावलि-रयणावलि-कुंडल-अंगय-कणय-कंकणया-अंगुलीयय-मेहलापमुह-महामहग्याहरण-विराइय-सरीरा, मणिरयणनेउराराव-भरिय-सयल-सहामंडवा, वाम-करगहिय-लीलारविंदा, चंद-चंदिम व्व समाणंदिय-सयलजणमणा, सयल-नरवइ-गुणगण-बियाणणचउराए चउरियाभिहाणाए अंब-धाईए पुरो पर्यसिज्जमाणमग्गा, पविट्ठा सयंवरामंडवे मलयसुंदरी । पडिपुण्ण-पुण्णिमाचंदव्व निवडिया सयलनरिंदाण तीए मुहयंदे दिट्ठी। रायहंसि व्व सलील गंतूण निसण्णा जणय-समासण्ण-विदिण्ण-भद्दासणे। एत्थंतरे आणिया पुरिसेण पहाणवीणा। सज्जिया राय-दुहियाए। समासप्णीकओ गयवरो। उवण्णत्थो कवलो भोइएण। गहिऊण करेण करिणा जावऽज्ज वि न आसगम्मि पक्खिवइ ताव पवाइआ वीणा मलयसुंदरीए । वीणा सर-हय-हियओ चित्तलिहिओ व्व ठिओ करी न भुत्तो कवलो। विम्हिया सव्वे वि रायाणो । पयासिया मलयसुंदरीए पूरओ सव्वेसिं राईण गणगणा। चउरियाए मलयसुंदरीए भणियं--"अम्मो ! हत्थे कंकणे कि दप्पणेण? समप्पेहि पत्तेयमिमेसि वीणं । पच्छा सयमेव पायडी भविस्सइ गणगणो।" तहेव समप्पिया बाइया य, परं न केण विरंजिया मलयसंदरी।
तओ समप्पिया खेमकर-राइणो। सविसेसं सज्जिऊण वाइया तेण । पसुत्तो करिवरो। पडिओ कराओ कवलो। हरिसिओ विण्णाणाइसएण विस्ससेण-राया। सरय-निसायर-कर-निकरकरंबियं व कुमुयं वियसियं मलयसंदरीए महं। "अहो ! विण्णाणं, अहो! विण्णाणं" ति, समच्छलिओ सयंवर-मंडवे कोलाहलो । विसण्ण-वयणा जाया सेसरायाणो। हरिस-भर-निब्भराए पक्खित्ता खेमंकरमहारायसिरोहराए सयंवरमाला मलयसुंदरीए । अहो ! सुवरियं । मेह-विमुक्कसरयनिसायरं समस्सिया चंदिमा। अणुरूवं रयणायरमोइण्णा जण्हुकण्णया लच्छि व्व । पुरिसोत्तम-पइ परिग्गहेण वड्डत्तणं पत्ता ॥४१०।।
___एस कयत्थो विही अज्ज संजाओ अणुरूव-वहू-वर-समागम-करणेण । समुट्ठिया लोयाण एवमाइसमुल्लावा । संपूइऊण पवर-वत्थाहरणेहिं विसज्जिया सेसरायाणो विस्ससेणेण । गहाय खेमंकर-रायाणं पविट्ठो नयरं । कारावियं पाणिग्गहणं । वित्तो महाविच्छड्डेण वीवाहो । ठिओ थेव दिणाणि तत्थेव खेमंकरराया। कइवयदिणावसाणे समं विस्ससेणेण चलिओ नियनयराभिमुहं ।।
इओ य ते सव्वे वि रायाणो मच्छरभर-भरिय-माणसा खेमंकरं पइ पओसमावण्णा मग्गं रोहिऊण ठिया । सुओ एस वइयरो विस्ससेणेण। विसण्णो माणसेण। कहियं खेमंकरस्स । तेण भणियं--"संपयं किं जुत्तं?" विस्ससेणेण भणियं''नियत्तिज्जउ जाव एएवि संसरिज्जति ।" तेण भणियं--"लज्जाकरमेयं सनगर-पत्थियाणमम्हाण । तुमं पुण नियत्तस्।" सो वि न नियत्तो। दिण्णं पयाणयं । तइयदियहे पत्ता राईण समासण्णे। गहिओ आवासो। सयल-राईहिं मिलिऊण पेसिओ सुमइनाम दूओ। भणिओ य वत्तव्वो तए खेमंकरनिवो--"पढम ताव एस विस्ससेणो दुम्मई जेण निमंतिऊण सयलमहीवालचक्कं, पच्छा अवमाणियं । बीयं पुण तुम जेण अवियारिऊण कज्जपरिणामं सहसा चेव परिणीया मलयसुंदरी। अज्ज वि न कि पि नळं। समप्पेसु तुम मलयसुंदरी अम्हाण। जस्स अम्हे देमो तस्स भवउ । अह एवं न करेसि तो सयल-नरवइ-कोवानलजालावली-पयंगत्तणं पाविहसि ।" एवं भणिऊण विरमिओ दूओ । भणियं विस्ससेणेण"भो! दूय ! जइ सयंवरामंडवे वच्छाए मलयसुंदरीए हिअय-इच्छिओ वरो वरिओ का सामंतचक्कस्स अवमाणणा? गरुयण-विदिण्णं कण्णयं परिणयंतस्स को उवालंभो खेमंकरमहारायस्स?"
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |