________________
चतुर्दशमिषुकारीयाध्ययनम्
इह पूर्वाध्ययने निदानदोष उक्तोऽत्र तु प्रसङ्गतो निनिदानतागुणो वाच्य इत्यनेन सम्बन्धेनायातस्य चतुर्दशस्येषुकारीयाध्ययनस्य प्रस्तावनार्थं पूर्वमिषुकारवक्तव्यता तावदुच्यते। तथाहि
चतुर्वयस्यमध्यस्थौ प्रागुक्तौ गोपदारकौ । यौ तदा प्राप्तसम्यक्त्वौ साधोभक्त्यनुभावतः ॥१॥ मृत्वोत्पन्नौ सुरौ नाके बान्धवौ तौ ततश्च्युतौ । क्षितिप्रतिष्ठिते द्रङ्गे जाताविभ्यगृहे सुतौ ॥२॥ युग्मम् तत्रान्येषां महेभ्यानां चत्वारश्चतुराः सुताः । प्रीतास्तयोः सुहृत्त्वेन समानवयसोऽभवन् ॥३॥ ते षडप्यद्भुतान् भोगान् भुञ्जानाः स्नेहला मिथः । सकर्णा धर्ममाकर्ण्य प्राव्रजन गुरुसन्निधौ ॥४॥ प्रतिपाल्य चिरं दीक्षां तपस्तप्त्वा यथाविधि । कृत्वा चानशनं तेऽन्तेऽकार्युः कालं समाधिना ॥५॥ ततः सौधर्मकल्पे ते भेजुः षडपि देवताम् । विमाने पद्मगुल्माख्ये चतुःपल्योपमायुषः ॥६॥ इतश्च गोपवर्जा ये चत्वारो निर्जरास्तके । च्युत्वाऽभवन् कुरुक्षेत्र इषुकारपुरे क्रमात् ॥७॥ एको राजेषुकारोऽभूद् देवस्तस्य प्रियाऽपरः । पद्मावती तृतीयस्तु भृगू राज्ञः पुरोहितः ॥८॥ संजज्ञे निर्जरस्तुर्यो जाया तस्य पुरोघसः । यशाभिधाना वाशिष्ठगोत्री च द्विजपुत्रिका ॥९॥ युग्मम्
___Jain Education International 2010_02
For Private & Personal Use Only
www.jainelibrary.org
