________________
३२३
5
जयन्तीप्रकरणवृत्तिः । गाथा ४।५।६
अवरावरपणयमहानरिंदमणिमउडकिरणकब्बुरियं । तुह चरणजुयं संसइ जयम्मि मुणिराय ! रायत्तं ॥५५॥ एयम्मि गच्छगहणे तुमम्मि मुणिसीह संचरन्तम्मि । मयकलहवियारेणं भवियव्वं होइ दूरेण ॥५६॥ सच्चपइन्ना गरुया उत्तम कुलसंभवा भवन्ति त्ति । एसा जए पसिद्धी तुमए सच्चीकया धीर ! ॥५७।। नियकुलकमलदिवायर ! विहरसि तं जत्थ जत्थ सुपयावो । न हवइ तत्थ पओसो तमभरपोसो किमिह चोज्जं ? ॥५८॥ सुदिट्ठगुरुपक्खवाओ दियराओ कहवि तं न बद्धोऽसि । हिययजिणगुरुव्वहणो बन्धवमोहेण पासेण ॥५९॥ पवणो व्व अपडिबद्धो अवरावरविसयदरगमणो वि । अम्हाण बोहणत्थं इत्थ पुणो दंसणं देज्ज" ॥६०॥ इच्चाइयवयणेहिं गच्छइ सो कण्डरीयमुणिवसहो । चोइज्जन्तो पवयणसारेहिं अन्नदेसेसु ॥६१॥ दुक्करतवचरणेणं तिविहेणं कण्डरीयरायरिसी। निप्पडिकम्मो जाओ कमा किसीभूयसव्वंगो ॥६२॥ पव्वज्जागहणओ तस्स वसंतस्स गच्चगहणम्मि । गुरुमूलसुयक्खंधे सज्झायज्झाणपुप्फफले ॥६४॥ वरिससहस्सन्ते सहयारवणम्मि मंजरिज्जन्ते । रिउरायम्मि वसन्ते संकन्ते सव्वजियकन्ते ॥६५॥ पसरन्ति चच्चरिओ वणे सुझंकारमहुरभमरीओ । कोइलकलावकलकलरमणीयउज्जाणराईसु ॥६६॥ उद्दामकामकामिणिचरणपहारेण डोहले पुन्ने । किंकिल्लितरू सोहइ वियसियसुमणाणुभावेण ॥६७॥ कुरुबयवच्छा विलयापरिरंभारंभसेयसरस व्व । सोहंति कुसुमनिविडिरमयरन्दामन्दसुन्देरा ॥६८॥
Jain Education International 2010_02
For Private & Personal Use Only
www.jainelibrary.org
