________________
२५७
10
जयन्तीप्रकरणवृत्तिः । गाथा ४।५।६
पसरइ महातमो हीही मन्नेमि मिहिरमुत्तीओ । सुकुलुग्गया जमेसा जंपइ लज्जाकरं वयणं ॥१६॥ ते धन्ना कयपुन्ना बालत्तणम्मि गहियसामन्ना । जे समियकामपामा गुरुपयसेवोसहिरसेण ॥१७॥ एवं वियारसारो सिट्ठिसुओ अरिहमित्तनामेसो। तव्वयणेहिं अकम्पो गुंजापवणेहिं मेरु व्व ॥१८॥ भणइ मह भाउजाया माया एगन्तवच्छला चेवं । अववायघरे मग्गं कहं तुमं मं पवत्तेसि ? ॥१९॥ अम्हाण कुले धवले गुणलच्छीए विलासगेहम्मि । मसिकुच्चउ व्व एसो अहिलासो होइ किज्जन्तो ॥२०॥ आवाय च्चिय महुरा एए विसया विसं व परिणामे । सेविज्जन्ता दारुणदुहदन्दोलिं पयच्छन्ति ॥२१॥ सरिसवमित्तं सुक्खं अकज्जकारीण होइ जीवाणं । तप्पच्चइयं दुक्खं नरए मेरूवमं होइ ॥२२॥ परमहिमगोत्तनिग्गया रयणायरगामिणी विसुया वि । गंग व्व तुमं भद्दे ! कहमपवित्तं पयं देसि ? ॥२३।। सव्वगुणाण हारं निल्लज्जे ! जयवि चयसि भत्तारं । तहवि अहं नियबन्धवपराभवं कहवि न करिस्सं ॥२४॥ एवं भणिए तेणं सा चिन्तइ बन्धवस्स लज्जाए । मं अवमन्नइ एसो सुहओ दक्खिन्नजलही वि ॥२५।। रागन्धाण जियाणं विरहानलपज्जलन्तदेहाणं । हुन्ति हरिणंककिरणा फुरन्तउक्काझलक्क व्व ॥२६।। तो नियदइयविरत्ता दुरन्तचित्ता दयाए परिचत्ता । विसजोगा भत्तारं एसा पेसइ जमागारं ॥२७॥ सयणाणं मज्झगया कवडकुडी करुणकरुणसद्देण । रोयइ विमुक्तकंठं हिययट्ठियदुट्ठचिट्ठा सा ॥२८॥
Jain Education International 2010_02
For Private & Personal Use Only
www.jainelibrary.org
