________________
१८७
जयन्तीप्रकरणवृत्तिः । गाथा ४।५।६
विणयगुणरयणसहिया सुहिया दुहिया वि ताण बन्धुमई । पइदिवसं मुणिपुंगवपयकमलाराहणिक्करया ॥२४॥ तह अत्थि दासचेडो नामेणं थावरु त्ति विक्खाओ । ताण प्पिओ विस्सासट्ठाणं जो कज्जसिद्धिकरो ॥२५।। वडवयाभिहाणं नयरब्भासम्मि गोउलं तस्स । पीऊसदाणदच्छं खीरोयसहोयरं आसि ॥२६॥ सिट्ठी सागरदत्तो गन्तूणं तत्थ दुद्धघयमाई। आणाविऊण दिणाणाहयाण वियरेइ बहुवारं ॥२७॥ बन्धुमई वि य साहूणं अन्तिए सुणिय जिणमयं सम्मं । थूलजियघायविरइं गिन्हइ सम्मत्तसञ्जुत्तं ॥२८॥ तियससरिय व्व निम्मलदयावहा सव्वया वि गम्भीरा । अणुकूलं वयरन्ती खमाणुया दिव्वमाहप्पा ॥२९।। कारुन्नपुन्नहियया जयणाए कुणइ गेहवावारं ।
बन्धुमई सिट्ठिसुया जिणमयसवणेण संविग्गा ॥३०॥ भणियं च
"जयणा धम्मजणणी जयणा धम्मस्स पालणी निच्चं । तव्वुड्डिकरी जयणा एगंतसुहावहा जयणा" ॥३१॥ [संबो.प्र./गा.५३६] जयणाए जमुणाए दयावगाहेण कीरमाणेण । अवणेइ पावपंकं बन्धुमई साविया निच्चं ॥३२॥ अत्थंगयम्मि सायरचन्दे नायरजणेण मुणिचन्दो । सिट्ठिपए संझुविओ ईसरसिरलद्धसुपइट्ठो ॥३३।। घरकज्जाई तस्स य चिन्तइ तह थावरो सिणेहेण । अणुकूले पवट्टन्तो पुव्वपवाहेण गंग व्व ॥३४॥ मयणसरसल्लियंगी थावरचेडम्मि सम्पया रत्ता । रोद्दज्झाणोवगया दिणम्मि अन्नम्मि चिन्तेइ ॥३५॥ |जिस्सं भोगमहं निस्संकं थावरेण कह ? सद्धि । वावाइयमुणिचन्दा कह ? गिहसामि इमं काहं ? ॥३६।।
Jain Education International 2010_02
For Private & Personal Use Only
www.jainelibrary.org
