________________
१६९
जयन्तीप्रकरणवृत्तिः । गाथा २।३
अह दाणसीलतवविहिकप्पुहुममंजरीसु संलीणा । भव्वा हवंति सिवसुहफलोवलंभेण सुकयत्था ॥१॥ आसंसं चईऊणं धम्मं दाणाइयं कुणन्ताण । संवेगरंजियमणा, कुणंति देवा वि पसंसं ॥२॥ अनियाणो जिणधम्मो अचिन्तचिन्तामणी जओ तेण । मोक्खपहपत्थियाणवि, सुरनरसोक्खोवलम्भो वि ॥३॥ जिणधम्मखीरसायरमुत्तिसु सुहभावणासु चिट्ठन्ता । जलजीवा वि सुवित्ता हवन्ति मुत्ता महग्घविया ॥४॥ बारसहिं भावणाहिं दिणमणिमुत्तीहिं उल्लसंतीहिं । विहडियमोहतमोहो पसरइ खलु केवलालोओ ॥५॥ जं अकयतवच्चरणा, अदिन्नदाणा अदीहसीला वि । भावणभावियचित्ता, केवलपत्ता सिवं जन्ति ॥६॥ जह भरहमहाराया, वेरग्गक्कन्तभावणाकलिओ। निद्दलियकम्मदलिओ केवलनाणेण संवलिओ ॥७॥ $ जंबुद्दीवे दीवे अवरविदेहम्मि अन्तखेत्तम्मि । विजयम्मि पुक्खलावइनामे पुंडरिगिणी नयरी ॥८॥ तत्थासि वइरसेणो, राया तित्थयरनामकम्मेण । उप्पन्नो तिन्नाणो सुरवरकिज्जन्तसम्माणो ॥९॥ निम्मलजसप्पवाहो तस्स सुओ गुणनिही वइरनाहो । पढमो तत्तो बाहू सुबाहू पीढो महापीढो ॥१०॥ लोगन्तियविन्नविओ, वच्छरमच्छिन्नसोवन्नदाणेण । संतप्पिऊण लोयं राया सिरिमं वइरसेणो ॥११॥ अहिसिंचिऊण रज्जे पढमं नियपुत्तयं वइरनाहं । निक्खंतो केवलसिरिं पत्तो तित्थं पवत्तेइ ॥१२॥ छक्खंडसाहणेणं पत्तो चक्कित्तणं वइरनाहो । निद्दलियवइरिदप्पो तिहुयणविक्खायमाहप्पो ॥१३।। भवियकमलायराणं पडिबोहणमिहिरमंडलसणाहो । अह एगया पुरीए समोसढो वइरसेणजिणो ॥१४॥
Jain Education International 2010_02
For Private & Personal Use Only
www.jainelibrary.org
