________________
जयन्तीप्रकरणवृत्तिः । गाथा २३
सिंहासणे निसन्नो सुपसन्नो पारितोसियं दाणं । आरामियस्स वियरइ अमउडसव्वंगलंकारं ॥६९॥ सुपभायमज्झ सुदिणं रज्जं जम्मं च जीवियं सहलं । अवयरिओ गुणसिलए जं अइकप्पडुमो वीरो ॥७०॥ तं रायगिहं नयरं कुणंतु पइगेहमूसियपडायं । कुंकुममिस्सियचंदणच्छडाहि सिच्वंतरायपहं ॥७१॥ दिसि दिसि चउक्कचच्चरपुप्फयरेहिं बहलियामोयं । कारानिहित्तदुक्खियबंधणमुच्चंतजियलोयं ॥७२।। तह उग्घोसह नयरे वीरजिणिंदस्स वंदणनिमित्तं । आगच्छह नायरया सुरिन्दसच्छहमिद्धीए ॥७३॥ आयसिऊणं एवं मज्जणभवणम्मि वच्चइ नरिंदो । न्हाओ कयबलिकम्मो दिव्वालंकारसिंगारो ॥७४॥ सेणियराया सिंगारियम्मि जयकुंजरम्मि आरूढो । जिणवंदणम्मि चलिओ अइयणचउरंगदलकलिओ ॥७५।। सो वि य विणीयपुत्तो विम्हियचित्तो वि चिन्तए एवं । तिहुयणकयपयसेवो वीरो देवाहिवो देवो ॥७६॥ जं एस महाराया तस्सेव वंदणत्थमुज्जुत्तो । सो वि जाणे अवयरिओ चउविहदेवेहि परियरिओ ॥७७॥ तो धणियं धन्नोऽहं सहलं मह जीवियं च जम्मं च । जं जणियजणाणंदं वीरजिणिदं नमंसिस्सं ॥७८॥ अह तस्स गयणमग्गे आइच्चाणं विमाणकोडीहिं । हवइ य माणससरवरविम्हयकमलायरोल्लासो ॥७९॥ गुणसिलए उज्जाणे ओसरणे जिणवरस्स दिट्ठम्मि । पंचविहाभिगमेणं पविसइ सेणियनरिंदो वि ॥८०॥ तिपयाहिणी करित्ता वीरजिणिदं विसुद्धभत्तीए । सक्कत्थएणं वंदइ आसीणो उचियट्ठाणम्मि ॥८१॥
25
Jain Education International 2010_02
For Private & Personal Use Only
www.jainelibrary.org
