________________
10
श्रीधर्मविधिप्रकरणम् एयंमि ठिओ सामी, चउविहसंघस्स चउव्विहं धम्मं । साहिस्सइ इय तेहिं, कयाइँ चत्तारि दाराई ॥२०॥ गुरुतोरणाइँ तेसु य, पडागधयसुंदराइँ कुव्वंति । रयणमयाइं वरकणय-वंदियाईहिँ चित्ताई ॥२१॥ उभओ पासेसु तहा, पउमपिहाणे पहाणफलिहमए । तोरणअहे य कलसे, ठवंति वरवारिपडिपुन्ने ॥२२॥ कसिणागुरुकप्पूर-प्पमुहाणं दज्झमाणदव्वाण । मणहरगंधजुयाओ, कुव्वंति य धूवघडियाओ ॥२३॥ तत्थ दुवाराण पुरो, वावीओ विउवियाउ रम्माओ । उउलच्छीभवणाई, विहियाइं नंदणवणाई ॥२४॥ चलपल्लवकरसंनिय-आहूय जणो य पढमसालस्स । मज्झे असोयरुक्खो, विहिओ बत्तीसधणुहुच्चो ॥२५।। हिट्ठा य तस्स पीढं, विचित्तरयणेहिँ निम्मियं विहियं । सिंहासणं च तदुवरि, दसदिसिपसरंतमणिकिरणं ॥२६॥ एसो तिगुत्तिगुत्तो, निज्जियदंडत्तओ तिकालविऊ । तिहुयणगुरु त्ति रइयं, विमलं छत्तत्तयं उवरिं ॥२७॥ एगु च्चिय वीरजिणो, पोओ भवसायरम्मि इय कहिउं । धरणीइ अंगुली इव, समुज्झि(च्छि)ओ धम्मधयमिसओ ॥२८॥ भामंडलं च पिट्ठीइ, निम्मियं रयणकिरणबिंबइयं । वरदुंदुहीओ तह तत्थ, ताडिया सहरिससुरेहिं ॥२९॥ सक्कीसाणिदा वि हु, दोसु वि पासेसु चंदकरधवलं । चालंति चामरजुयं, तह वुट्ठी हवइ कुसुमाण ॥३०॥ पुरओ वि धम्मचक्कं, पयडियं घडियममलरयणेहिं । तिजयगुरुतेयनिज्जियसेवागयतरणिबिंबं व ॥३१॥ पुव्विल्लवीयसालंतरम्मि, पुव्वुत्तरमि दिसिभाए । देवच्छंदो य कओ, जिणिदविस्सामणकएण ॥३२॥
15
20
25
Jain Education International 2010_02
For Private & Personal Use Only
www.jainelibrary.org
