________________
अट्ठप्पगारिपूजोवरि अट्ठदिटुंतजुत्तं मुणिवइणा वि हु रण्णो सीसे दाऊण निययकरकमलं । भणिओ भवनिद्दलणो होसु तुमं धम्मलाहेण ॥३५॥ नीसेसे वि य मुणिणो भत्तीए नमंसिऊण नरनाहो । उवविट्ठो गुरुमूले धम्मं सो सुणइ भवभीओ ॥३६॥ पंचमहव्वयरूवो जइधम्मो वीत्थरेण से कहिओ । सावगधम्मो वि तहा पंचेव अणुव्वयाईओ ॥३७॥ तह जिणवरस्स पूआ सविसेसी सावगाण कायव्वा । संसारोवहिमहणी जणणी निव्वाणमग्गस्स ॥३८॥ नमिऊण मुणिवरिंदं जंपइ साहेह नाह जिणपूआ । कइविहभेआ भणिया किं व फलं तीए विहियाए ॥३९॥ इय भणिए मुणिनाहो जंपइ नरनाह सुणसु जिणपूआ । कइविहभेआ भणिया जं च फलं तीए विहियाए ॥४०॥ वरगंध-धूय-चुक्खक्खएहिं कुसुमेहिं पवरदीवेहिं । नेविज्ज-फल-जलेहिं जिणपूआ अट्ठहा होइ ॥४१॥ अंगं गंधसुगंधं वनं रूवं सुहं च सोहग्गं । पावइ परमपयं पि हु पुरिसो जिणगंधपूयाए ॥४२॥ जह जयसूरनिवेणं जायासहिएण तइयजम्मंमि । संपत्तं निव्वाणं जिणिंदवरगंधपूयाए ॥४३॥
१. नीसेसा वि य । २. संसारोदहि । ३. नाण । ४. जलेहि य । ५. जिणपूआणेगहाभणिया । ६. सुयंधं । ७. सुयं । ८ जंमिमि । ९. पूयाओ ।
Jain Education International 2010_02
For Private & Personal Use Only
www.jainelibrary.org
