________________
पूजाष्टके अवशिष्टकथा ॥
इय जिणवरपूयाए अट्ठविहाए वि सफलं सोउं । पभणइ हरिचंदनिवो भयवं अइसुहफला पूया ॥१॥ ता एयाए जुत्तो कायव्वो आयरेण ताय मए । अज्ज वि असमत्थो हं मुर्णिदधम्ममि उज्जमिउं ।।२।। इय भणिए मुणिवइणा निच्चलचित्तेण भद्द होयव्वं । एसा वि हु जिणपूया होही तुह सिवफला चेव ॥३॥ पुणरवि संसियहियओ पुच्छइ राया मुणीसरं नमिउं । भयवं किं कयपावो पावइ सुद्धी गिहत्थो वि ॥४॥ कयपावो वि विसुज्झइ पच्छायावेण तावियसरीरो । जह सो सुरपियपुरिसो नियलाभे मुणिवराहिंतो ॥५॥ को सो सुरपियपुरिसो कह पत्ता तेण उत्तमा सुद्धी । भयवं साहसु एयं अइगरुयं कोउयं मज्झ ॥६।। जह संपत्ता रिद्धी नरिंद जह तेण पाविया सिद्धी । तह तं सुरपियपुरिसं साहिज्जं तं निसामेह ॥७॥
१. भणिओ सो । २. सिद्धि । ३. निहिनाणे ।
Jain Education International 2010_02
For Private & Personal Use Only
www.jainelibrary.org
