________________
२५८
जंबुचरियम् भव्वकुमुओहपडिबोहपच्चलो पावतिमिरनिट्ठवणो । आसी ससि व्व सयलो सूरी पज्जुन्नवरनामो ॥७९६॥ जो दंसणनाणचरित्तसीलतवसंजमेसु कुसलमई । जइयणगुणगणकलिओ मुत्ती(त्तो) धम्मो य(व) अवयरिओ ।।७९७।। तस्स य पयंमि जाओ आयरिओ वीरभद्द नामो त्ति । परिचिंतियदिन्नफलो आसी सो कप्परुक्खो त्ति ॥७९८॥ सेसेण व भुवणभरं धरियं लीलाए नियगणं जेण । जिणभवणसाहुसावय[एँ] निच्चं चिय वच्छलो जो य ॥७९९।। संदंसणे य जस्स य परिमुइओ होइ जो अभव्वो वि । अमयं व जस्स वाणी सुहजणणी सव्वसत्ताणं ॥८००॥ जस्स य सीसो पयडो पयडियमू(गू)ढत्थसत्थपरमत्थो । दसणचारित्तधरो सूरी पज्जुन्ननामो त्ति ॥८०१।। अन्ने वि जस्स बहवे सीसा जइयणगुणेहिं परिकलिया । संजाया धम्मरया सदसणनाणचरणड्डा ॥८०२॥ गुणपालणेक्कनिउणेण साहुणा पवयणत्थभत्तेण । सीसेण तस्स रइयं चरियमिमं जंबुनामस्स ॥८०३।।
पणयामरिंदसुंदरिधम्मेल्लुव्वेलकुसुमकयसोहे। उसभाइजिणिंदाणं सव्वेसिं नमह पयकमले ॥८०४॥ पणमामि सव्वसिद्धे नमिमो तह गणहरे य आयरिए । पणमामि य उज्झाए पणओ तह सव्वसाहूणं ॥८०५॥ संमत्तं च चरित्तं केवलनाणं च दंसणं नमिमो । मइनाणं सुयनाणं मणपज्जव-ओहिनाणं च ॥८०६॥ जिणपन्नत्तं धम्मं, नमामि तह सव्वसत्तसुहजणणं । जणमणजणियाणंदा वाणी य जिणिंदचंदाण ॥८०७॥
Jain Education International 2010_02
For Private & Personal Use Only
www.jainelibrary.org
