________________
॥ दसमो उद्देसओ ॥
इत्थंतरे य भणियं सहरिसमणुरायनिब्भरमणाए । लज्जोणयवयणाए दत्तसिरीनामभज्जाए ॥१॥ पियसहिओ एस म्हं होज्ज पिओ नूण वानरसरिच्छो ।
जह सो पच्छायावं पत्तो तह पाविही एसो ॥२॥ तओ इमं च निसामिऊणं वियसंतवयणकमलेण भणियं जंबुणामेण-'को सो मुद्धे ! वानरो कहं वा पच्छायावसंपत्तो ?' त्ति । तीए भणियंअवि य- मज्जंतथोरवारणकवोलमयदाणसंचलियसलिला ।
गुरुमहिसवंद्रपमुइयकीलंतुच्छलियकल्लोला ॥३॥ अत्थि जलनियरपुन्ना बहुजलयरसेविया अइमहंता । भागीरहि त्ति सरिया बहुभंगा दुट्ठमहिल व्व ॥४॥ तीए [य] तडे ऽत्थि वरो तुंगो साहापसाहपडिपुन्नो । वंजलदुमो महप्पा कलिओ फलकुसुमनियरेण ॥५॥ एक्कं वानरजुयलं कीलंतं कह व तं समारूढं । पडिओ य पमाएणं कह वि हु सो वानरो तत्थ ॥६॥ जाओ य दिव्वरूवी पडणपभावेण सो वरो पुरिसो । दिट्ठो य वानरीए दिव्वरुई सो वरजुवाणो ॥७॥ तीए वि तओ(?) खित्तो अप्पा जाया सा इत्थिया य वररूवा । दट्ठण हरिसियाई दिव्वकुमारोवमं रूवं ॥८॥ वानरनरेण भणिया सा नियदइया पुणो वि अत्ताणं । खिप्पउ सुयणु ! दुमाओ देवत्तं जेण पावेमो ॥९॥
JainEducation International 2010_02
For Private & Personal Use Only
www.jainelibrary.org
