Charitra Darshan

SR No.: 002031
Original Sutra Author: N/A
Author: Ramanlal C Shah
Publisher: Mumbai Jain Yuvak Sangh
Publication Year: 2006
Total Pages: 344
Language: Gujarati
Classification: Book_Gujarati & Biography
File Size: 18 MB

Page 311

પથ્થર સાથે સાઈકલ ભટકાઈ. હું પડ્યો. પડતાં જ સાઇકલની બેકનો દાંડો મારી આંખમાં ઘૂસી ગયો. આંખ ફૂટી ગઈ. પુષ્કળ લોહી નીકળ્યું. તરત મને હૉસ્પિટલમાં દાખલ કર્યો. ઑપરેશન કર્યું. પણ આંખે દેખાતું ન થયું તે ન જ થયું. લડાઈમાંથી હું પાછો આ સેન્ટરમાં આવ્યો. યુનિટ કમાન્ડર તરીકે ત્યાર પછી આ બેલગામના સેન્ટરમાં ત્રણ બ્રિટિશ કર્નલ આવી ગયા. પછી આવ્યા પેલા કર્નલ ચાર્લ્સ. એમણે મને પૂનાની મિલિટરી હૉસ્પિટલમાં લઈ જઈને આંખનું ફરીથી ઓપરેશન કરાવી આપ્યું તોપણ એ આંખે દેખાતું થયું નહીં.”
તું કેટલી લડાઈમાં ગયો છે ?
જુદા જુદા ઑફિસરો સાથે હું યુરોપ, આફ્રિકા, બર્મા, સિંગાપોર વગેરે ઘણી જગ્યાએ ગયો છું. સર, હું ઘણું બધું ફર્યો છું. હવે મને બહાર જવાની કોઈ ઇચ્છા થતી નથી. “ઓફિસર લોગની નોકરી કરતાં કરતાં મારી જિંદગી પૂરી કરવી, બસ એટલી જ ઇચ્છા છે.”
ધોડી, તારું વતન ક્યાં ?
સર, હું હૈદ્રાબાદનો છું. ત્યાં મારું કોઈ નથી. નાનપણમાં માબાપ ગુમાવેલાં, અનાથ હતો. લશ્કરમાં સૈનિક તરીકે ભરતી થવા આવેલો. તાલીમ લીધી, પણ આગળ વધી ન શક્યો. એથી નિરાશ થયો. પણ છેવટે ઑર્ડરલી તરીકે મારી ખાવાપીવાની ચિંતા ટળી.
તારી પત્ની, બાળકો કંઈ છે ?”
“ના સર, લડાઈમાંથી પાછા આવ્યા પછી મારે પરણવું હતું, પણ ત્યાં એક આંખ ગઈ એટલે મને કોણ પરણે ? એક ઓરત તૈયાર થઈ હતી, પણ તે પણ મારા પૈસા લઈને ભાગી ગઈ. બીજે પરણી ગઈ. એટલે મને થયું કે જો મારા નસીબમાં ઓરત જ ન હોય તો નકામાં ફાંફાં શું મારવાં? અહીં ઘણી શાંતિ છે, હું બહુ સુખી છું.”
અનુભવ-સમૃદ્ધ, કાર્યદક્ષ, આજ્ઞાંકિત, વફાદાર, પ્રામાણિક અને નિસ્પૃહ બેરર ધોન્ડીની જીવવા માટેની પોતાની એક પ્રકારની નસીબવાદી ફિલસૂફી હતી, અને તે પ્રમાણે તે પોતાનું શાંત જીવન જીવતો હતો.
ભારતનાં ઘણાં જુદાં જુદાં લશ્કરી મથકોમાં રહેવાનું મારે થયું છે. એમાં આપણું પ્રકીર્ણ કામ કરનારા અને વખતોવખત બદલાતા અશિક્ષિત બેરરો તરફ આપણું ખાસ કશું લક્ષ ન જાય, પરંતુ બેર૨ ધોન્ડી એક એવી વિશિષ્ટ કોટિનો બેરર હતો કે જેના વ્યક્તિત્વની છાપ ચિત્તમાં ચિરકાળને માટે અંકિત થઈ ગઈ છે.
(બેરરથી બ્રિગેડિયર'માંથી)
બેરર ધોન્ડી
૨૫૫