Page Text
________________
२४०
जुगाइदि
अओ न जुत्तं मह घरे गंतुं न या वि संसाराहिलासी कम्मभरपणोल्लिओ सुरगिरिसमभारे साहुगुणे महत्तमवि वोढुं समत्थो । 'ता कि करेमि त्ति चितियंतस्स तस्स साभावियामई समुप्पण्णा । एस एत्थ उवाओ - - समणेह असुहमणवयण कायदंडा तिन्नि वि जिया । अहं पुण एएहिं चेव जिओ अओ सेसजणजाणावणत्थं अप्पणो सुमरणत्थं च दिंडं वहामि । तहा लोइंदियमुंडा साहुणो सव्वविरया अहं पुण खुरमुंडो ससिहागो थूलपाणाइवायविरओ य भवामि । तहा निक्किचणा समणा भगवंतो मज्झ पुण किंचणं कणयपवित्तयं कन्नेसु अंगुलियाए कणयकंचणिया य भवउ । किं च-अट्ठारससीलंगसहस्स सारसिरिखंडगंधसुगंधिणो साहुणो अहं पुण सीलेण दुग्गंधो, अओ वासेमि वासाईहि वत्थाणि सरीरगं च। विणिज्जियमहामोहा य वरमुणिणो अहं च मोहेण पुण छन्नो अओ छत्तयं सिरोवरि धरेमि । अणुवाहणा साहुणो मज्झ पुण उवाहणाओ हवंतु । सेयवत्थधारिणो मुणिवसभा मज्झ पुण कसायकलुसियमणस्स कसायाणि हवंतु वत्थाणि । तह सावज्जभीरूणो बहुजीवसमाउलं जलारंभं दूरं दूरेण अणगारा परिहरेंति । मज्झ पुण पहाणं पियणं च परिमियजण हव । एवं सो सम्मत्तमूलपंचाणुव्वयधरो तप्पढमपयट्टियपरिव्वायगपासंडियवेसधारी जइ जण - विलक्खणो न गिही न या वि पव्बईओ । भगवओ निस्साए महीमंडलं विहरिउमारुद्धो ।
तं पुण विलक्खणवेसं उभडागारं साहुसमासण्णदेससंठियं दट्टूण जणो समल्लियइ धम्मं च पुच्छइ । सो वि साहुगुणपुरस्सरं सवित्थरं अणगारधम्मं ताण पुरओ पन्नवे । ते भांति -- " तुमं किं न करेसि जइ धम्मं ?" सो भणइ -- "गुरुकम्मो न तरामि काउं"। जाहे ते तेण धम्मदेसणाए अक्खित्ता भवंति ताहे सामि समीवं पट्टवेइ । भयवं पि साधम्मं गाइ एवं सामिणा सह विहरंतस्स कयाइ गरूयं सरीरकारणं संजायं मिरीइस्स । असंजओ त्ति न किं चि पडियारं कुणंति साहुणो । तओ सो गरुयवाहिपीडिओ केणावि अपडियरिज्जतो चितिउमारद्धो--"अहो मे इहभवे चेव उदिण्णं असुहकम्मफलं नियगा वि परं व पेच्छंति साहुणो । अहवा न साहूण दोसो सव्वसावज्जविरया भगवंतो कहं मे भट्टपइण्णस्स संसारसूयरस्स वेयावच्चं कुणंति मज्झ वि न जुत्तं कारियंतो अप्पणो समाणगुणं मंदधम्माणं सहाययं किं पि जोएमि जेण सो गिलाणस्स में परितप्पइ" । एवं विचितयंतो वाहिविहुरियमाणसो कह कह वि पउणी भूओ ।
अण्णा समागओ भगवओ समीवे दूरभविओ कविलो नाम रायउत्तो । निसुओ सामिसमीवे धम्मो न भाविओ चित्ते, विलक्खणं दट्ठूण गओ मिरिइस्स समीवे पुच्छिओ धम्मो । सो भणइ -- " नत्थेत्थ धम्मो गच्छ भगवओ समीवे" । पुणो वि गओ । अमयभूयं पि नियकम्मदोसेण न रुइयं भगवओ वयणं । पुणो वि समागओ । मिरिई भणइ -- “ किं तुह समीवे जो वा सो वा धम्मो नत्थि ?" मंदधम्मो दूरभविओ मह समो चेव एस चेव कोइ विहिणा घडिओ | हवउ मह चेव सहायगो" त्ति चितिऊण भणियमणेण - - " कविला ! इत्थं पि धम्मो इहं पि धम्मो ।" एवं च भणतेण निव्वत्तिओ सागरोवमकोडाकोडीपमाणो गुविलो भवोदही । भणियं च-
दुभासिएण एक्केण मिरिई दुक्खसागरं पत्तो । भमिओ कोडाकोडी सागरसरिनामधेज्जाणं ।। २६८५ ।।
दिक्खिओ कविलो जाओ सहाओ परिव्वायगपासंडपरूवणेण
वड्ढियं मिच्छत्तं ॥२६८६ ।।
अण्णा गामागर-नगर- खेड - कब्बड - मडंब - दोणमुह-पट्टणासम-संनिवेस-संवाह - संकडं महीमंडलं विहरंतो बहुसमणसमणिसहिओ विणीयनयरीए पुरिमतालुज्जाणे अहाफासुए पएसे समोसढो । जुयाइ जिणवरो समप्पिऊण पाडिहारिय पीढ - फलगमाइयं साहूण सहरिसमागंतूण वद्धाविओ निउत्तपुरिसेहि भरहाहिवो ।” जस्स णं देवाणुप्पिया दंसणं पत्यंति जस्स णं देवाणुप्पिया नाम गोयस्स वि सवणयाए किमंग पुण दंसणयाए हरिसवस - विसप्पमाणहियया भवंति' से णं निग्गंथस्स पवयणस्स देसए नायए पट्ठावए अणेगसमणसय सहस्साहिवई समणगहगणचंद परिवड्ढए चोत्तीसबुद्धाइसय संपन्ने आगासगएणं चक्केणं आगासगएणं छत्तेणं आगासगएणं फलियामएणं सपायपीढेणं सिंहासणेणं । सेयवरचामराहि
Jain Education International
For Private & Personal Use Only
www.jainelibrary.org
| SR No. | 001593 |
| Book Title | Jugaijinandachariyam |
| Original Sutra Author | Vardhmansuri |
| Author | Rupendrakumar Pagariya, Dalsukh Malvania, Nagin J Shah |
| Publisher | L D Indology Ahmedabad |
| Publication Year | 1987 |
| Total Pages | 322 |
| Language | Sanskrit |
| Classification | Book_Devnagari, Literature, & Story |
| File Size | 8 MB |