Page Text
________________
अजियंजयनरव
जय चारित्ताणंतरमणपज्जवनाणलाभचउनाण ! । जय घाइकम्मनिम्महणलद्धवरकेवलन्नाण ! ।। ११०५ ।। जय भवभीममहाडइ निवडिय भविओहपरमसत्थाह ! ! जय सुप्पभाव ! भवभाविभावपरिहारसंतुट्ठ ! ॥ ११०६ जय दड्ढ रज्जुसंठाण धरियवेयणिय-नामगोयाऊ । भवियावबोहकज्जेण नाह ! कारुण्णजोगाओ ।। ११०७ ।। जय निहणियमयणमहल्लमल्लनिस्सल्लसुकयकल्लाण ! । जय जिणनाह ! सयंपहा, सिवप्पहं देसु मे अणहं ॥ ११०८ तुह देव ! को समत्थो, अणंतगुणरयणरोहणगिरिस्स । काउं गुणसंथवणं, भत्तीए तहा वि मह पसिय ॥ ११०९ ।। इय भूरिभत्तिउल्लसियबहलरोमंचकंचुयच्छाओ । थोउं जिणेसरं सह सुएण सट्ठाणमुवविट्ठो ॥ १११० ।। पत्थावं लहिऊणं, सीसे आबद्धअंजलीबंधो । अजियंजयनरनाहो, पुच्छइ जिणनाहमभिउत्तो ।। ११११ ।। भयवं ! कहमेस जिओ, सरूवओ विमलफलिहरूवो वि । गुरुदुक्खहेउ भूयं, संचिणइ किलिट्ठ कम्मचयं ॥ १११२ सो भणइ जिणवरिंदो, जोयणनीहारिणीए वाणीए । सुण अजियंजयनरवरा, जं पुढं उत्तरं तस्स || १११३ ।। जीवस्स कम्मबंधणहेउ सिद्धा हवंति खलु पंच । मिच्छत्तमविरई तह, पमायजोगा कसाया य ।। १११४ ।। तेसु य मिच्छत्तमिणं, जमसद्दहणं खु तत्थभावाणं । विवरीयसद्दहाणं, अहवा संसीइ करणं च ।। १११५ ।। तत्था य इत्थ भावा, विन्नेया जे जहट्ठिया हुंति । देवगुरुधम्ममग्गा, तत्ताणि य तप्पसिद्धाणि ॥ १११६ ।। तेसिं असद्दहाणं, नाहियवाइत्तणेण जं कुणइ । जीवो तेण निबंधइ, अणंतदुहकारणं कम्मं ।। १११७ ।। जो वि अदेवाइसु देवबुद्धिमाई करेइ धम्मी वि । विवरीयसद्दहाणे, सो वि हु उवचिणइ कम्माइं ॥ १११८ ।। जओ - भक्खमभक्खं पेयमपेयं किच्चं अकिच्चमेवेह । मन्नतो दिसमूढो व्व जाइ अन्नत्थ अन्नमणो ॥ १११९ ॥ संसयकरणो वेवन्ननिययवित्ती अओ इओ विसया । जीवस्स कम्मबंधो, जायइ घणदुक्खसंजणणो || ११२० ।। जो उण सम्मत्तधरो, असंसओ अविवरीयसद्दहणो । सो उण कम्मपबंधं, विच्छिदइ थेवकालेण ॥ ११२१ ।। पाणाइवायमाईण सव्वदोसाण कुगइमूलाण । जं जीवो न नियत्तिं, करेइ एसा अविरईओ ॥ ११२२ ।। एईए मज्जमहुमंसऽणंतपंचुंबराइपरिभोगे । अनिवारियनियइच्छा, चिणिति अइतिव्वकम्माइं ॥ ११२३ ।। जइ वि न सव्वपवित्ती, संभवइ तहा वि तयनिवित्तीए । जीवाण कम्मबंधो, बहुओ थोवो उ विरईए ।। ११२४ ।। अट्ठविहो सत्तविहो, य छव्विहो एगभेयओ तह य । बंधो जीवस्स भवे, जम्हा गुणठाणगवसेण ॥ ११२५ ॥ जम्मि य अंतमुहुत्ते, आउं बंधेज्ज परभवपउग्गं । अट्ठविहो तत्थ भवे, बंधो जीवस्स सव्वस्स ॥ ११२६ ॥ सत्तविहो उण बंधो, सेसे कालम्मि आउरहियस्स । छव्विहबंधो उण सुहुमसंपरायम्मि चडियस्स ।। ११२७ ॥ सो उण दुसमयठिइओ, नेओ ठिइ जणगकारणाभावा । अणुभागट्ठिइबंधा, कसायहेऊ सया जम्हा ॥ ११२८ ।। जो पुण करेइ विरई, पावट्ठाणाण सव्वओ चेव । विसएसु अगिद्धप्पा, तस्स न तप्पच्चओ बंधो ॥ ११२९ ।। मज्जासत्तो विसएसु मुच्छिओ जं कसायवसवत्ती । निद्दाविगहाभिरओ, अकुसलकम्मेसु अभिरमइ ॥ ११३० ।। सद्धम्मकम्मसिढिलो, जीवो सो उण भणिज्जइ पमाओ । एयस्स वि आयत्तो, बंधइ घणचिक्कणं कम्मं ।। ११३१
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |