Page Text
________________
२६
सिरिचंदप्पहजिणचरियं पायारोवरि परिसक्किरहिं विम्हियमणेहिं दठूण । तस्स वीरोचियचरियं, कहियं जयधम्मरायस्स ॥ ६५२ ।। वद्धाविज्जसि नरवर ! केण व कत्तो वि एक्कवीरेण । आगंतूण तुह रिऊ, महिंदराओ खयं नीओ ॥ ६५३ ॥ तुह पुन्नेहिं व आगरिसिएण एगागिणा वि हरिणेव । गयजूहं व बलं से, सयलं वि कयं हयप्पहयं ॥ ६५४ ।। तं सोऊण नरिंदो, तुट्ठो तुट्ठिप्पयाणमेयाण । दाऊण पओलीओ, उग्घाडावित्तु सव्वाओ ।। ६५५ ।। सव्वबलेण समेओ, समागओ तस्स चेव पासम्मि । कयउचियप्पडिवत्ती, एवं भणिउं समाढत्तो ॥ ६५६ ॥ चरिएहिं चिय सिट्ठो, तं मह सप्पुरिस उत्तिमनरो त्ति । तुम्हाणमकारणबंधवाण किं वन्नणं करिमो ।। ६५७ ॥ विअलक्खनगरवासी, वंदाओ विमोइओ जणो तुमए । नियजीवियनिरवेक्खं, अम्हुवयारं करितेण ।। ६५८ ॥ इय एवमाइ काऊण तस्स अणलियगुणोहसंथवणं । घेत्तूण करेणारोविऊण नियए गइंदम्मि ।। ६५९ ॥ महईए विभूईए, पवेसिओ पुरवरस्स मज्झम्मि । ठाणट्ठाणपयट्टियपहाणबहुहट्टसोहम्मि ।। ६६० ॥ अभिनंदिज्जंतो वुड्ढनारिआसीससंपयाणेण । अच्चिज्जंतो वरपुरपुरंधिनयणुप्पलदलेहिं ॥ ६६१ ॥ अब्भुयगुणत्थुइहिं, थुणिज्जमाणो पढिज्जमाणो य । इच्छहियलद्धपरिओसदाणसंतुट्ठभट्टेहिं ॥ ६६२ ॥ संपत्तो निवभवणं, पवेसिओ तत्थ मंगलसएहिं । जणयंतो आणंद, समग्गलोयस्स इंदो व्व ॥ ६६३ ॥ सयमेव राइणा दावियम्मि सीहासणम्मि उवविट्ठो । चरणप्पणामपुव्वं, जयधम्मनिवस्स विणयपरो ॥ ६६४ ॥ धरिऊण तत्थ खणमेत्तमेक्कमह ण्हाणमंडवं नीओ । रण्णा सहप्पणा पहाविओ य परिहाविओ वत्थे ॥ ६६५ ॥ नाणालंकारेहिं, महग्घमोल्लेहिं तह अलंकरिओ । अहियं विरायमाणो, दीसइ सो कप्परुक्खो व्व ।। ६६६ ॥ अह भोयणावसाणे, सुहसेज्जाए ठिओ सपणएणं । भणिओ रन्ना सुपरिस ! निसुणसु मह एक्कविन्नत्तिं ॥ ६६७ अहमज्ज पुण्णवंताणमहियपुण्णो गुणीण महियगुणो । सुपवित्ताणं सुपवित्तयाए अहिययरमिह ठाणं ॥ ६६८ ॥ जाओ तुब्भागमणे मणोरहाण वि अगोयरगयम्मि । केवलउज्जलचिरकालचरियसच्चरियजणियम्मि ॥ ६६९ ॥ किंच - नासिंतो नीसेस, रिउतिमिरभरं खणद्धमत्तेण । जणयंतो अम्हच्चयजणमणचक्कोहआणंदं ॥ ६७० ।। अम्हे न याणिमो च्चिय, चिरुवज्जियविउलपुन्नभाराओ। कत्तो य मज्झ इह तं, समागओ सहसकिरणो व्व ॥ ६७१ मज्झ असत्तीए इमा, पडिवक्खरसायलम्मि निवडती । तुम्हे च्चिय उद्धरिया, रज्जसिरी ता तुहेव इमा ॥ ६७२ एत्तो अहं तु आएसकारओ तुज्झ चेव पाइक्को । होहामि निययविक्कमविढत्तमुव जनिवलच्छि ॥ ६७३ ॥ सुणिऊण नरिंदगिरं, एवं कुमरो वि लज्जिओ अहियं । पभणइ सावट्ठभं, देव ! न जुत्तं तए भणियं ॥ ६७४ जओ - जइ अणुचरेण किंचि वि, साहिज्जइ तुज्झ कज्जमइगरुयं । सो किं तस्स पहावो, अहं पि तुह अणुचरो चेव ।। ६७५ ता मा एत्थत्थे कुण, वियप्पमेसा तुहेव रायसिरी । उवभुंजसु तं पत्तं, मइ पाइक्कम्मि पासठिए ॥ ६७६ ॥ एवं परोप्परं ते, सज्जणभणईहिं पणयसाराहिं । तत्थ ठिया चिरकालं, तो कुमरो रायभणिएण ॥ ६७७ ॥
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |