Page Text
________________
सिरिचंदप्पहजिणचरियं
विविहंगरक्ख - सामंत - मंति-भड - चडगराइलोएण । आभरणवत्थलंकरियवारविलयाण निवहेण ॥ ४८७ ॥ परिवारिया विरायंति तत्थ ते दो वि रायजुवराया । नियदेव - देविसहिया, सक्कजयंत व्व समवेया ॥ ४८८ || अवि य
२०
नियनियउरत्थलट्ठियमुत्ताहारेसु पत्तपडिबिंबा । दंसंति व नेहकथं, परोप्परं हिययसंवासं ॥ ४८९ ॥ देसागयविविहोवायणाणि मंडलियरायपहियाणि । चिट्ठेति पलोअंता, पिइ - पुत्ता तत्थ अत्था ॥ ४९० ॥ एत्थंतरम्मि सहसा, अत्थाणत्थं जणं समग्गं पि । अवहरियमणं मीलियनयणमकम्हा करेमाणो ॥ ४९१ ।। गुरुतरसम्मोहमहंधयारजणणाओ सव्वओ चेव । भुवणं पओससमउ व्व को वि असुरो समागंतुं ॥ ४९२ ॥ अवहरिऊण कुमारं, हारुज्जलकिरणरुइरवच्छयलं । नियपुन्नसंचयच्छाइयं च कत्थ वि गओ ज्झ त्ति ॥ ४९३ (विसेसयं) तक्खणमेवोवहए मोहतमे नरवई सभं दद्धं । पुत्तविहूणं सव्वं, सभाजणं भणिउमादत्तो ॥ ४९४ ॥
भो भो ! किमेवमच्चब्भुयं इमं जायमेत्थ अत्थाणे । अत्थाणे च्चिय अवहारकारणं मज्झ जायस्स ।। ४९५ ।। भो भो सामंता अंगरक्खगा मंतिणो अमच्चजणे । पेच्छंताण वि अम्हाण कत्थ पुत्तो महं नीओ ? || ४९६ ।। रे रे पाइक्का लहु कहेह पुत्तं जओ विणा तेण । रविण व्व मज्झ भुवणं, तमसावरियं व पडिहाई ॥ ४९७ || गरुयपरक्कमसारा वि होइऊणं नरेसरा तुब्भे । मह तणए हीरंते, कहण्णु अपरक्कम व्व ठिया || ४९८ ।। नियबुद्धिविहवनिज्जियसुरगुरुणो मंतिणो कहं तुम्ह । सा बुद्धी पम्हुट्ठा, हीरंते मज्झ तणयम्मि ॥ ४९९ ॥ अहह महामोहविमोहियाण तुम्हम्ह पेच्छमाणाणं । सव्वाण वि मज्झगओ, पुत्तो केणावि कह हरिओ || ५०० || अहवा जायमिमं चिय, निदरिसणं पयडमेव मज्झ सुओ। जह अवहरिओ केण वि, जमो वि जीवं तहा हरइ ।। ५०१ अह जाणिउं जणाओ, अजिया वि सुयावहारवुत्तंता । सोएण तक्खणं चिय, विजिया वि मणुम्मणा जाया ।। ५०२ आगंतूणय रन्नो, सयासमेसा वि गरुयदुक्खत्ता । वियलंतअंसुसलिलोहसित्तथणवट्ठपावरणा || ५०३ ।। तह कह वि करुणसद्देण पलविउं तत्थ गाढमाढत्ता । तह तप्पलावसुणणेण तेण तिरिया वि दुक्खविया ॥ ५०४ बिउणयरुद्दीविय सोयपसरविवसीकओ नरिंदो वि । तं विलवंतिं दठ्ठे, अहिययरं विलविउं लग्गो ।। ५०५ ।। हा हा पिओ म्हि तुह आसि वच्छ ! ता मं विमोत्तु कत्थ गओ । उइए वि सहसकिरणम्मि सोयतिमिरं पवित्थरिडं || ५०६ वरमुवरि मज्झ पुत्तय ! पडउ गिरी जेण तक्खण च्चेया । वच्चामि चुण्णियंगो, दुहसयवीसारणं मरणं ॥ ५०७ मा पुण एसा अच्चंतदुस्सहा नरयजायणातुल्ला । जीवंतसल्लमिव तुह विओयवज्जासणी पडिया ।। ५०८ || ऊ तमेव मे वच्छ ! लच्छिकित्तीण तह य सोक्खाण । तइ वच्चंते तं पढममेव सव्वं गयं जाण ।। ५०९ ॥ ता एहि एहि मह देहि दंसणं सदयमाणसो होउं । सिग्घं पसीय पुत्तय ! जणणिं पि उविक्ख मा एवं ॥ ५१० कइया तयंगरूवं, विउले नयणुप्पले विसालं च । वच्छयलं बाहुजुयं च नयरपरिहोवमं अम्हे ॥ ५११ । अमियरससंदिमहुरयरभासियं ईसिहसियरमणीयं । जियवियसियारविंदं तुह मुहयंदं च पेच्छामो ॥ ५१२ || (जुयलं ) तं किंचि वि पुणदिणं सा रयणी का वि उग्गयसुरिक्खा । किं होही दच्छामो, जत्थ सुयं पुन्नजोए ।। ५१३
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |