Page Text
________________
१६४
सिरिचंदप्पहजिणचरियं मह पुण न लिप्पइ च्चिय अप्पा एयाहिं सपरबुद्धीहिं । मिच्छा अणाइभववासणाए संपाइयाहिं मणे ।। ५१८७ ।। कारिमपुत्तलया जं हरंति बालेन बुद्धिसंपन्ने । किं पोढमंजरो कं जिएण वेयारिओ कहिं वि ।। ५१८८ ॥ एस पिया इय मंबा इमो सुओ पिययमा मह इमा य । एसा वियप्पबुद्धी निव्विसय च्चेय तत्तेण ।। ५१८९ ।। एगतेण पिओ च्चिय न को वि परमत्थओ जणो दिट्ठो। अहवा विअप्पिओ च्चिय भवम्मि अणवट्ठियसरूवे ॥ ५१९० कज्जं अहिगिच्चेगस्स जो पिओ सो वि तव्विणासम्मि । जायइ पेसो अन्नस्स तह वि इट्ठो उदासो वा ।। ५१९१ ।। तहा - जो च्चिय मित्तं एगस्स सो वि अन्नस्स वइरिओ होइ । ता को कस्स हविज्जा मित्तममित्तो व निच्छयओ ॥ ५१९२ एयं च सव्वमेवं अन्नह कह मज्झ हिययदइयाओ । जायाओ जायाओ विरायविसयाओ एत्ताहे ।। ५१९३ ।। जं चिय रागावत्थाइ सुंदरं तं पि मंगुलं भाइ । रागविमुक्के चित्ते अणुहवगम्मं च तत्तमिणं ॥ ५१९४ ।। ता कुण मा उव्वेयं राय तुम होसु तत्तदढदिट्ठी । न छलइ मोहपिसाओ जओ नरं तत्तमंतदढं ।। ५१९५ ।। एवं अणुसासेउं निययसुयं सेसए य भणइ निवे । भो भो ममं खमेज्जह जं भणिया कक्कसं तुब्भे ।। ५१९६ ।। कज्जवसेणं किंचि वि कइया वि पहुत्तणाभिमाणाओ। अभिमाणियं खु सोक्खं निवाण परमत्थओ न जओ ॥ ५१९७ असुरो सुरो व इत्थी नरो व नियओ परो व जो कोइ । दिट्ठो सुओ व असुओ अहिट्ठओ खमउ मह सव्वो ।। ५१९८ मज्झ वि तेसु खम च्चिय एवं सव्वासु जीवजोणीसु । पविलुत्तरागदोसस्स होउ सामाइयं सुद्धं ॥ ५१९९ ॥ एवं पभणंतो च्चिय कयप्पणामो मणाणुसंधीए । सिद्धाण सदेहाओ अवणेई आभरणगाई ।। ५२०० ।। लुंचइ य पंचमुट्ठीहिं निययकेसेऽणुराहनक्खत्ते । तं च पडिच्छइ सव्वं सक्को निय उत्तरीएण ॥ ५२०१ ।। आभरणाई समप्पइ तप्पुत्तस्सेव चंदरायस्स । अणुजाणावित्तु जिणं केसे उण खिवइ खीरोए ।। ५२०२ ।। एत्थंतरम्मि देवाण माणुसाणं च सक्कवयणेण । उवसंतो निग्घोसो खिप्पं सह तूरसद्देण ।। ५२०३ ।। पडिवज्जइ व चरित्तं तो भयवं सयलपावचाएण । काऊण नमोक्कारं सिद्धाणं लोयपच्चक्खं ॥ ५२०४ ॥ भणियं च - काऊण नमोक्कारं सिद्धाणं अभिग्गहं तु सो गिण्हे । सव्वं मे अकरणिज्जं पावं ति चरित्तमारूढो ।। ५२०५ ।। एवं पुव्वंगाणं चउवीसाए अहियाइं पुव्वाइं । च्छप्पुव्वद्धहियाइं परिवालेऊण किर रज्जं ।। ५२०६ ॥ निम्ममचित्तो सामी पडग्गलग्गं तणं व चइऊण । लोगुवयारनिमित्तं पडिवन्नो उत्तमचरित्तं ॥ ५२०७ ।। (जुयल) तप्पडिवत्ति समं चिय मणपवज्जवनाणमुत्तमं तस्स । उल्लसइ जं भणिज्जइ समए रिउविउलमइभेयं ।। ५२०८ ॥ भणियं च - तिहिं नाणेहिं समग्गा तित्थयरा जाव हुंति गिहवासे । पडिवन्नम्मि चरित्ते चउनाणी जाव छउमत्था ॥ ५२०९ ।। पुट्ठीए जं विलग्गं सहस्समहनरवराण तं पि जिणो । पव्वावइ सामाइयपडिवत्तिं कारवेऊण ।। ५२१० ।। चंदो वि जिणवरिंद दद्दु परिमुक्कवत्थलंकारं । खंधम्मि देवदूसं से खिवई लक्खमोल्लं जं ॥ ५२११ ॥
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |