Page Text
________________
१६३
चंदप्पहजिणदिक्खावण्णणं ताणं च पुरो मागहदेवा वाणीहिं हिययइट्ठाहिं । उक्किट्ठाहिं थुणंता संचलिया मणुयगणसहिया ॥ ५१६१ ॥ तहा हि - धिइबलनिबद्धकच्छो हंतूण परीसहाभिहं सेन्नं । सोहित्ता अप्पाणं तवग्गिणा जच्चकणगं व ॥ ५१६२ ।। ज्झाणाण उत्तमेणं निरासवो होइऊण अपमत्तो । वितिमिरमणुत्तरं दिव्वकेवलनाणमुवलभिउं ।। ५१६३ ।। भवजलहिपोयभूयं अचिंतचिंतामणिं व अइदुलहं । तित्थं पवत्तिऊणं समत्थजणजणियउवयारं ॥ ५१६४ ॥ तवखग्गेणं लुणिऊण दुट्ठकम्मट्ठवइरिसेन्नं च । पावसु तं परमपयं सासयमउलं सिवमबाहं ।। ५१६५ ।। जयजयनंदा जयजयभद्दा जयजयजिणिंदभदं ते । अजियं जिणेहिं तं इंदियाइदुइंतसत्तुगणं ।। ५१६६ ॥ सम्मदंसणमाईजियं च पालेहि वसहि य असंको । सिद्धिवसहीए हणिउं रागद्दोसे महामल्ले ।। ५१६७ ।। धम्मो होउ अविग्धं भवओ आसीसवयणमिच्चाइ । पुणरवि पयंपमाणा जजयजयसदं पउंजंति ।। ५१६८ ॥ (कुलयं) एवं देवुक्कलिया देवुज्जोओ य देवकहकहओ। देवावायनिवाओ जाओ देवट्टहासो य ॥ ५१६९ ।। तहा - केई देवा मंचाइमंचरम्मं करंति चंदउरिं । सन्भिंतरबाहिरियं सोहंती केइ भत्तिपरा ।। ५१७० ।। केई हिरण्णवासं वासंति तहिं परे य गंधुदयं । अन्ने य रयणआभरणमल्लचुन्नाइ वासंति ।। ५१७१ ।। जह देवा तह मणुया विविहालंकारभूसियसरीरा । परहियविचित्तवत्था कुणमाणा विविहचेट्ठाओ ।। ५१७२ ।। संचलिया सह रमणीहिं गायमाणीहिं नच्चमाणीहिं । जिणसंथवं करेंती जयजयजयरावहलबोलं ॥ ५१७३ ।। जिणसिबियाए पच्छा सहस्समहनरवईण संलग्गं । नियनियविभूइअणुसरि सरइ य नेवच्छलंकारं ।। ५१७४ ।। नियनिय पहठ्ठपरिवारविहियसिबियाइ वाहणारूढं । नियसत्तिसरिसदाणाणंदियनीसेसअस्थियणं ।। ५१७५ ।। धम्मरुइदेवआगमणकालजिणदेसणाए पडिबुद्धं । (..........) उवट्ठियं सामिमग्गेण ।। ५१७६ ॥ (विसेसयं) चंदो राया य जिणस्स नंदणे सयलपरियणसमेओ । सुहिसयणमंतिसामंतमंडलीयाइ परियरिओ ॥ ५१७७ ॥ अंतेउरं च सयलं बंधववग्गो य जिणवरिंदस्स । सह सयलपुरजणेणं जाणवएणं च संचलिओ ॥ ५१७८ ॥ तिहुयणजणेण एवं अणुगम्मतो जिणो सहइ तत्थ । परिचत्तेण भवेण व तोसवणत्थं विलग्गेण ।। ५१७९ ।। पेच्छंतो कत्थ वि पेक्खणाइ देवाण माणुसाणं च । जयजयरवसम्मिस्सो निसुणतो विविहसंथवणे ।। ५१८० ॥ आयन्नंतो कत्थ वि य दिव्ववाणी उ देवमंतिस्स ! कत्थइ कविस्स कव्वाइं सव्वदिव्वाई भव्वाई ।। ५१८१ ।। कत्थ वि सत्त रिसीणं सुमंतिगईओ मंडमहुराओ । कत्थ वि देवित्थीणं मंगलगीईओ रम्माओ ॥ ५१८२ ।। एमाइ विभूईए सदेवमणुयासुराए परिसाए । अणुगम्मतो भयवं नीहरिओ नयरिमज्झेणं ।। ५१८३ ।। सहसंबवणुज्जाणे सव्वोउयपुप्फफलसमिद्धम्मि । पत्तो य पोसमासस्स किन्हतेरसिए अवरन्हे ।। ५१८४ ॥ निरवज्जभूमिदेसे य तत्थ सिबियाओ ओयरेऊण । सुरवइबाहुविलग्गो अतुलबलपरक्कमो भयवं ॥ ५१८५ ।। दठूण चंदरायं नियतणयं सोयपूरियप्पाणं । भणइ जिणो मज्झ कलेवरम्मि तुह फुरइ जणय ! मई ।। ५१८६ ।।
Jain Educatia 3ternational
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |