Page Text
________________
चंदप्पहजिणजम्मवण्णणं
१४५ एमेव सपरिवारा अट्ठ उ सक्कस्स अग्गमहिसीओ। सीहासणस्स पुरओ, सएसु ठाणेसु ठायंति ॥ ३७७५ ॥ उत्तरदारेसुं पविसिऊण सामाणियाण देवाणं । चउरासीइसहस्सा, निविसंति सएसु ठाणेसु ।। ३७७६ ।। दाहिणदारेणं पविसिऊण भद्दासणेसु ठायति । परिसागयदेवाणं, बायालीसं सहस्साई ।। ३७७७ ।। अवरदिसाए सत्त उ अणीयनाहा तहा अणीयाई । पविसित्तु ठंति नियनियसुहासणेसुं पहट्ठमणा ।। ३७७८ ।। चउरासीइसहस्सा, पुव्वेणं दाहिणेण एवइया । एवइय उत्तरेणं, अवरेणं चेव एवइया ।। ३७७९ ॥ पविसित्त आयरक्खगदेवा. भद्दासणेस नियएस । सन्नद्धबद्धकवया गहियाओ पहरणा ठंति ।। ३७८० ॥ अन्ने वि बहू देवा, देवीओ नियनिएसु ठाणेसु । पविसित्तु ठंति भद्दासणेसु सव्वासु वि दिसासु ॥ ३७८१ ।। . आरुहिएसं तेसं, पणच्चमाणं व पालयविमाणं । मिउपवणपहयनिम्मलधयवडसंदोहबाहहिं ।। ३७८२ ॥ तक्खणमेत्तेणं चिय, बत्तीस विमाणसयसहस्साणं । अहिवइणो संपत्ता, सपरियणा सक्कभवणम्मि ॥ ३७८३ ।। सोऊण तहा पत्ता, घंटाटंकारघोसणासई । कप्पसुरसेलसागरदीवंतरभवणदेवा वि ॥ ३७८४ ।। वज्जंततूरनिवहं, नच्चंतविलासिणीसमूहं तं । गायंतगायणोहं चलियं सहसा वरविमाणं ।। ३७८५ ॥ अह तम्मि चलियमेत्ते, चलंति सव्वे वि सुरगणा मुइया । अन्नोन्नपेल्लणेणं, समंतओ वरविमाणस्स ॥ ३७८६ ॥ कोऊहलेण एगे अवरे भत्तीए केइ वि भएण । अन्ने अन्नावेक्खा, अन्ने सक्कस्स आणाए ।। ३७८७ ।। केई हएण केई गएण केई मिगेण वसहेण । सीहेण केइ गंडेण, केई विमाणेणं ।। ३७८८ ।। अवरे वरालएणं, चलंतजीहेण केइ उरगेण । जाणेण केइ गरुडेण केइ अवरे मऊरेण ।। ३७८९ ।। इय एवमाइबहुविहसुहाणुभावावरुद्धसुहभोया । जाणेहिं वाहणेहि य चलंति सग्गाओ देवगणा ॥ ३७९० ।। तट्ठाणाओ चलिया असंखदीवोदही अइक्कमिउं । नंदीसरम्मि पत्ता, रइकरसेलस्स सिहरम्मि ।। ३७९१ ॥ काउं जोयणमाणं, पालयनामं तयं वरविमाणं । निययग्गमहिसिसहिओ, सपरियणो नवरि सो सक्को ।। ३७९२ ॥ आरुहइ तुरियतुरियं, चलंतदिप्पंतकुंडलपहाहिं । दीवसीहाहिं व मग्गं, पयासमाणा उ देवाणं ।। ३७९३ ।। चंचंतचारुचूडामणिप्पहादुगुणियंगगुरुतेओ। पमुइयपसंतचित्तो भरहे तं गेहमागम्म ।। ३७९४ ।। जणणिं जिणं च रहसुग्गमंतरोमंचकंचुइयगत्तो । आयाहिणाओ तिउणं, पयक्खणीकरिय भत्तीए ।। ३७९५ ॥ धरणियलनिहियकरयलदिप्तवरुत्तमंगजाणुजुओ। अभिवंदिऊण सक्को, जिणजणणिं थुणइ महुरगिरो ॥ ३७९६ ॥ नमिमो कमकमलजुयं, नरचिंतामणिधरीए तुह देवि ! । परितुलियकप्पपायवपभावनरधारिणी तं सि ।। ३७९७ ॥ सव्वाओ वि दिसाओ, गहगणतारागणाणि पसवंति । न कयाइ चंदबिंबं, पुव्वदिसाओ जणइ अन्ना ।। ३७९८ ॥ तं कामदुधा घेणू, तं विज्जा दिन्नसयलफलसारा । सयलजणाणंदयरी, सामिणि ! सामाए चंदरूई ।। ३७९९ ।। किं ते थुणामि सामिणि ! किं वा न थुणामि किं न पणमामि । जा सयलजगपियामहमाया तं संपयं जाया ।। ३८०० ।। धन्ना सि तुमं सामिणि ! जा जिणनाहं धरेसि कुच्छीए । को तेयसा जलंतं, सूरं किर धारिउं तरइ ।। ३८०१ !! इयविहगुणविभूसियसुवन्नमणहारिणीहिं वायाहिं । हारलयाहिं व सोहं, माऊए थुई कुणइ सक्को ॥ ३८०२ ।।
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |