Page Text
________________
१२७
पउमनाहनिवो भग्गे धणुम्मि तुट्टे गुणग्मि रित्ते य भत्थए जाए । अन्नोनं केसि पि हु छुरियाजुझं तओ जायं ।। ३२९१ ।। आमूलनिमग्गेहिं, पच्चंग पूरिओ सरेहिं रिऊ । पारोहजुओ व्व तरू निक्कंपो सहइ अरिसमुहो ।। ३२९२ ।। मंसोवचयं सरुहिरासवेण मत्ताण डाइणीण तहिं । नच्चंतीण कबंधा, संजाया नट्टसूरि व्व ।। ३२९३ ।। निवडंतनिरंतरपाणजालसंछइयमुत्तिणा तत्थ । रणभीएण व रविणा, कत्थ वि य पलाइऊण गयं ।। ३२९४ ॥ एमाइभीमरूवे संगामे तत्थ वट्टमाणम्मि । सिरिपउमनाहरन्नो, बलेण भग्गं इयरसेन्नं ॥ ३२९५ ॥ एत्थंतरम्मि सिरिपुहइपालरन्नो रएण सेणाणी । उट्ठइ आसासिंतो, निययफलं बलमउम्मत्तो ॥ ३२९६ ।। नामेण चंदसेहरराया भणइ य किमेस तुम्हाण । उचिओ मग्गो भो भो पलायणं कुणह जं भीया ।। ३२९७ ।। जइ दिव्ववसा जायइ, कह वि हु सूराण रणमुहे वसणं । तह वि हु न ताण मोत्तूण विक्कम कमइ अन्नकमो ।। ३२९८ ता मा अत्थाणे च्चिय कणह भयं रणधुरं मइ धरते । तुम्ह वि न दिपव्वं, नण पिट्ठं कइय वि रिवहिं ।। ३२९९ अथिरेहिं तओ पाणेहिं थिरयरो जइ जसो अहिगमेज्जा । किज्जेज्ज व बहुकिच्चं, ता मरणे किं अकल्लाणं ।। ३३०० संधीरंतो एवं रणविमुहं एस नियबलं पत्तो । चंडभुयदंडकड्ढियकोयंडविमुक्कसरनियरो ॥ ३३०१ ।। तयणु सरपहरजज्जरमवहत्थियपोरुसं व नियसेन्नं । कलिऊण तेण विहियं, सेणाणी पउमनाहस्स ॥ ३३०२ ।। पत्तो रहाहिरूढो तस्स रहत्थस्स सिंहिकेउ व्व । तरणिस्स गरुयरणरसदुप्पेच्छो सम्मुहो भीमो ॥ ३३०३ ।। (जुयल) अन्नोन्नब्भाहयसत्थजालउल्लसियसिहिफुलिंगोहं । तिक्खसरविसरखंडियपरोप्पराबद्धधयनिवहं ।। ३३०४ ॥ तो दोण्ह वि ताण तहिं, जायं तमलं रणं सधीराण । छाइयगयणंगणमक्कबाणगणनटसरनियरं । ३३०५ लहिऊण अंतरं कह वि तस्स भीमस्स भासुरं मउडं । ससिसेहरो निवाडइ, सचिंधमवि अद्धयंदेण ।। ३३०६ ।। तो मोत्तूणं ससरं, सरासणं कोवपरिगओ भीमो । तह झ त्ति परियणेणं तं हणइ उरत्थले वइरिं । ३३०७ ।। सह सामिजयासाए, जह ल्हसिओ तक्खणं रहाहिंतो । रुहिरुप्पीलं वयणेण उव्वमंतो महाघोरं ।। ३३०८ ।। (जुयलं) पुरओ ल्हसियं तं पेच्छिऊण पहुणो पयावमिव गरुयं । केऊ केउ व्व जणं, तासिंतो पविसई सहसा ।। ३३०९ ।। आसीविसो व्व गरुडेण सो वि भीमेण हरियदप्पविसो । निन्नासिओ रहेणं, तो रुट्ठो धावइ सुकेऊ ।। ३३१० ।। सो वि महासेणेणं, खंडाखंडिं कओ महत्थेण । दुद्धरवज्जासणिणा, जहा गिरी पलयमेहेण ॥ ३३११ ।। तं छिन्नपक्खमह पक्खियं व पडियं महीए दठूण । पत्तो विरोयणो जो, विरोयणो वइरिकुमुयाण ॥ ३३१२ ।। सो वि गयत्थो हत्थिट्ठिएण सेणाए सह सुसेणेण । विमुहो सम्मुहखित्तेहिं विरइओ बाणनिवहेहिं ॥ ३३१३ ॥ कत्थच्छइ भीमरहो सो जस्स बलेण पउमनाहनिवो । किर जणिही वइरिबलं, इय भणमाणो सगव्वगिरं ॥ ३३१४ ।। बाणासणिं मुयंतो, महारहो तयणु धाविओ सहसा । नियपक्खवसणदंसणउद्दीवियमच्छरो अहियं ।। ३३१५ ।। तो भीमरहो वि सगव्ववयणमायन्निऊण से कुविओ। एसो अहं ति भणिरो सरवरिसं काउमाढत्तो ।। ३३१६ ।। दो वि धणुव्वेयवेऊ, अवरोप्परखलियसरगणा दो वि । दो वि रणकम्मकुसला, दो वि जए लद्धमाहप्पा ॥ ३३१७ ॥ तह जुज्झिउं पयट्टा, जह ताण रणं पलोइय सुरा वि । विम्ह विम्हरियनिमेस व्व जाया अणिमिसच्छा ॥ ३३१८ ॥
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |