Page Text
________________
सिरिचंदप्पहजिणचरियं
दट्ठूण तं सहत्थेण हत्थिरागं पहाणकुसुमेहिं । संपूइऊण राया चडिऊण विणिग्गओ कडए || ३२६५ ॥ जाव अरिसेन्नसमुहो वच्चइ ता पिट्ठओ समणुसरिओ । रहवरमारूढेणं जुवराएणं महाराओ || ३२६६ ॥ जइ रहगएण रविणा अणुगम्मइ सुरवहू सुरगयत्थो । तइया तयणाणुगओ, निवो वि ता लहइ तस्सुवमं ॥ ३२६७ ॥ भीमरो विहु तुंगं, नगं व आरुहिय पवरनागिंदं । तं अणुगच्छइ सत्तूण भयकरो तस्स व पयावो ॥ ३२६८ ॥ विलसंतत्थसमूहं, मणोरहं पिव रहं समारूढो । नीहरिओ तयणु महीरहो वि राया सउच्छाहो || ३२६९ ।। एवं अन्ने विनिवा नियनियचउरंगसेन्नपरियरिया । परिवारिंति नरिंदं, चउसायरतीरविक्खाया ।। ३२७० ।। तयणु समुच्छलियपयाण तूरसद्देण मंगलं तेहिं । सेणाजणेहिं सेणाइ लब्भए केण वि न माणं || ३२७१ ||
तहा
१२६
1
चलियस्स तस्स वामासि वायसं सइ सिवाई रसमाणा । कुरुलंतो वामो वायसो य तह खीररुक्खम्मि || ३२७२ || गंभीरमहुरनायं से मुंचइ रासभो वि वामठिओ । कत्तो विइ व्व भारद्दाओ य पयाहिणं कुणइ || ३२७३ || तक्कालं तह करिणो, गिण्हंति मयं झरंतगंडयला । मयगंधलुद्धपरिभमिरभमरसंघायरुद्धमुहा ।। ३२७४ ।। सुहाण व तक्कालम्मि तह य जाओ स कोवि उच्छाहो । अभिलसियकज्जसिद्धी जेणं बद्धा सउणगंठी || ३२७५ एमाइबहुविहेहिं, परिचिंतियकज्जसिद्धिपिसुणेहिं । सउणेहिं बिउणिउच्छाहतोसिओ जाइ जाव निवो || ३२७६ || ता पुहइपालराया वि पउमनाहं सुणित्तु समुवितं । सन्नहिऊण ससेणो अमरिसओ सम्मुहो एइ || ३२७७ ।। असिवं सिवारवं सो, न दक्खिणं गणइ माणइ न छीयं । अच्चंतविरुद्धं पि हु पए पए जायमाणं पि ।। ३२७८ ।। कन्हाहिखंडियं न य मग्गं मुंचइ न कंटइ तरुत्थं । मन्नइ फरुसं करयररवं पि कार्य करेमाणं || ३२७९ ।। न य परिभावइ पुच्छाई पज्जलंताइं पवरतुरयाणं । घोरं अक्कंदरवं पि मन्नए नेय अमरिसिओ || ३२८६ ॥ पडिलोमया वि मणपवणगोयरा जा य सयलसेन्नस्स । तं पि न चिंतइ न य रुहिरवुट्ठिमवहारइ नहाओ || ३२८१ ॥ अह पलयपवणपेल्लियपुव्वावरजलहिपाणियाणं व । दोन्ह वि बलाण जायं, पढमरहं सुहडसंघडणं ॥ ३२८२ ॥ अन्नन्नलोयणसमरभिडणसद्धालुया वि भडनिवहा । धरिया तुरयखुरक्खयरेणूहिं खणं दयाए व्व || ३२८३ || वग्गंता रणरंगगणम्मि अन्नोन्नसम्मुहासुहडा | सोहंति नड व्व करेणुदाणजलसमियरेणुम्मि || ३२८४ ।।
संतहए गज्जंतगयवरे वज्जमाणआउज्जे । सद्दमयं पिव समयम्मि तम्मि जायं बलजुगं पि ॥। ३२८५ ॥ हत्थारोहण रहीण आसवाराण पत्तिनिवहाण । जस्सिच्छा जेण समं, रणम्मि सो तं समाहवइ ।। ३२८६ | संगाममग्गकुसला आढत्ता जुज्झिउं महासुहडा । अथिरेहिं वि पाणेहिं थिरं जसो अहिलसेमाणा || ३२८७ ॥ जो च्चिय सामिपसायं पडिच्छमाणाण आसि मुहराओ । सो च्चिय रिउसरजालं पडिच्छमाणाण जाओ सिं || ३२८८ नियधणुविमुक्कबाणोहमंडवारुद्धतरणिकरनियरा । जोहा जुज्झता वि हु, संतावं तत्थ न मुणंति ॥ ३२८९ ॥
अवि य
कस्स वि अस्सगयस्स वि करिकुंभविभेयकारिणो असिणो । सहइ तओ निवडतो, मुत्तोहो पुप्फनियरो व्व ।। ३२९० ।।
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |