Page Text
________________
सिरिचंदप्पहजिणचरियं
एवं पभणतो सो, निच्चं चिय जाव न कुणए नीडं । ता तत्थेव पसूया, एसा जायाइं अंडाई || २७४३ || अमरिसिएण समुद्देण ताई हरियाई अन्नदियहम्मि । वेलाए पसरियाए, तीए पिओ तो उवालद्धो || २७४४ || तुह कडुयवयणतविएण जलहिणा नाह ! मह सुया हरिया । गरुया विराहिया हुंति सुंदरा नेय कइया वि || २७४५ || रोसभरभरियचित्तेण तेण तो भणियमेरिसं वयणं । उयराओ तस्स कड्ढेमि नियसुए जेण ते हरिया || २७४६ || भणिऊण इमं नियपक्खजुयलमह बोलिऊण जलहिजले । झाडइ पंक्खम्मि पुणो पुणो वि गयणट्ठिओ चेव || २७४७ एवं च पंक्खझाडणबोलणमणवरयमेव कुणमाणं । तं दठ्ठे चडयाई वि पक्खिणो तत्थ सम्मिलिया || २७४८ ॥ पुच्छंति पयत्तेणं, सो वि य तेसिं कहेइ सब्भावं । नियजाइपक्खवाएण ते वि तह काउमाढत्ता ॥। २७४९ ।। एत्थंतरम्मि कत्तो वि पक्खिराओ समागओ गरुडो । तं पक्खिगणं तह पासिऊण पुच्छेइ संभंतो ।। २७५० ।। ते वि य सोवालंभं कहंति संते वि अम्ह तइ नाहे । एवं पराभवं कुणइ एस जलही अमज्जाओ ।। २७५१ ।। तो सो गंतुं साहेइ वासुदेवस्स निययसामिस्स । अग्गियबाणं निसिणित्तु सो वि तत्थागओ खिप्पं ।। २७५२ ।। तं दट्ठूण समुद्दो वि पायवडिओ हु विन्नवइ एवं । खमसु ममेक्कऽवराहं पुणो वि नेवं करिस्सामि ॥। २७५३ ।। एवं च -
नियअंडयहरणामरिसएण चडएण टिट्टिणावि । संजणियसोससंकस्स जलहिणो किं न पडिविहियं ॥। २७५४ ॥
१०६
उक्तं च
शत्रोर्बलमविज्ञाय, वैरमारभते तु यः । स पराभवमाप्नोति समुद्र इव टिट्टिभात् ।। २७५५ ।।
इय सुणिऊण जणाओ गलगज्जि काउमेस आढत्तो । को सो वसुंधरो किं, च तेण निप्फज्जइ कहेह || २७५६ || जो वि महोवरि धरणो, आणीओ णेण तेण वि न किंचि । गंजियपुव्वो एसो वि जेण मह मुणइ सामत्थं ।। २७५७ ।। ता अच्छह वीसत्था, तुब्भे कत्तो वि मा भयं कुणह। स वसुंधरस्स सीसं घेत्तूणाणेमि धरणस्स ॥। २७५८ ॥ इय भणिऊण विसज्जिय, जणं च संजत्तियं करावेउं । संगरजोग्गं नीहरइ अन्नदियहम्मि नयराओ ।। २७५९ ।। उक्खंदेणं पडिओ, गंतूणं धणयरायकडयम्मि । परिवारो वि य से पुव्वभेइओ जुज्झइ न जाव || २७६० ।। ताव इमो सयमेव य, नियपुत्ताईहिं सह समोत्थरिओ । पारद्धो जुद्धेउं, अग्गाणीएण सह किंचि ॥। २७६१ ॥ एत्थंतरम्मि नाउं जुज्झतं तं वसुंधरो भणइ | धरणनिवं देव ! इमो नीहरिओ अज्ज नयराओ || २७६२ || अग्गाणीएण समं, संलग्गो जुज्झिउं च एत्ताहे । परिवारेणं चत्तो, परिमियपुत्ताइसंजुत्तो || २७६३ ॥ भाया य इमस्स मए, जो लहुओ समरकेउनामेण । सो तुम्ह चरणसेवापरायणो चेव एस कओ ॥। २७६४ ।। संगामंगणवट्टिस्स तस्स नामेण चेव भडनिवहो । मुंचति सुहडवायं अन्नो य न तारिसो कोइ ।। २७६५ ॥ ताजइ वि तुज्झ कडए, जलहिसमे एस सत्तुमुट्ठिसमो । पडिओ इह आगंतूण तह वि लहुओ न गणियव्वो ।। २७६६ मारइ मारिज्जतो सुव्वइ एसा वि जं किर पसिद्धी । एगागी य न एसो पुत्ताईया जओ बीया ।। २७६७ ॥ नोवद्दवेइ ता जाव देवपायाण एस कडयजणं । सुहडेहिंतो पाडाविऊण ता निग्गहावेह || २७६८ ॥
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |