Page Text
________________
भरहराया
पणवन्नरयणभूसियकुंडलविलिहिज्जमाणगंडयलो । गीवापिणद्धगेविज्जसोहिओ चारुसिरिवच्छो ।। २१९८ ॥ हारड्ढहारतिसरयपलंबपालंबरुइरकयमज्झो । केऊरतुडियकडयालिकलियरमणिज्जभुयजुयलो ॥ २१९९ ।। पसरंतकंतिसंपसरमुद्दियापिंगलंगुलीनिवहो । ललियकडिसुत्तमंडियवरलक्खणकडियडाभोगो ।। २२०० ।।। नाणाविहमणिमंडियमहरिहआविद्धवीरवरवलओ। किं बहुणा विवहाभरणभूसिओ कप्परुक्खो व्व ॥ २२०१ ॥ दिप्पंतअहियसोहो, आयंसघरम्मि नियपियाहिं समं । रममाणो च्चिय लग्गो, सरीरसोहं पलोएउं ।। २२०२ ।। एत्थंतरम्मि पडियं मुद्दारयणं करंगुलीहितो । भवियव्वयानिओएण कह वि अवियाणयंतस्स ।। २२०३ ।। तत्तो कमेण राया, देहावयवाण उत्तमं सोहं ! साभरणाण नियंतो, तमंगुलिं नियइ गयमुई ।। २२०४ ।। चिंतइ तओ न सोहइ, निरलंकारा करगुंली एसा । साभरणंगुलियाणं, मज्झे कागि व्व हंसीण ॥ २२०५ ॥ ता एस च्चिय एवं, सोहाइ विवज्जिया उ अन्ना वि । इय चिंतिय ओसारइ, बीयाओ वि मुद्दियारयणं ।। २२०६ ।। सा वि तहेव विसोहा, दिट्ठा सव्वं पि तो अलंकारं । परिवाडिए मुयंतो, चडिओ संवेगरंगम्मि ॥ २२०७ ।। चिंतइ जहा न देहं, विरायए किं पि मुक्कलंकारं । कव्वं पिव कुकइकयं वन्नयहीणं व चित्तं वा ।। २२०८ ।। अहह अहो देहमिणं, सहावसोहाविवज्जियं चेव । ता को इमस्स उवरिं, कारिमरूवस्स पडिबंधो ।। २२०९ ।। सव्वं चिय असुइगिहं, देहं जं एत्थ सुप्पसत्था वि । कप्पूराइपयत्था, उवउत्ता जंति असुइत्तं ।। २२१० ।। अन्नं च असुइसंभयमेयमसुइम्मि पावियं वुड्ढि । असुइस्स भरियमसुई, नवहिं दुवारेहिं पज्झरइ ॥ २२११ ।। किंच - जं अस्थि किं पि मज्झे, इमस्स बहिचम्मवेढियसरूवं । जइ तं न होज्ज छुट्टिज्ज कह णु तो वायसाईण ।। २२१२ ।। विट्ठाकुंभसरिच्छो, ता देहो एस नत्थि संदेहो । भूसिज्जइ बाहिं पवरवत्थलंकारमल्लेहिं ।। २२१३ ॥ रोगजरास्रोगनिवासवासभवणे असासयसरूवे । रसरुहिरमंसमेयट्ठिमज्जसुक्काण ठाणम्मि ॥ २२१४ ॥ मलमुत्तपुरीसानिलसिंभानलपित्तकलमलनिहाणे । एत्तो च्चिय न सरीरे, होइ विवेईण पडिबंधो ।। २२१५ ।। (जुयल) जइ ता ससरीरे वि हु ममत्तभावो न जुत्तिजुत्तो त्ति । तो कह जुत्तो होही, पियपत्तिसरीरसंबंधो ॥ २२१६ ॥ नियदेहसोक्खहेऊ, इच्छिज्जइ सव्वमेव संसारे । तस्स असारत्ते किं, हवेज्ज अन्नं भवे सारं ।। २२१७ ॥ सद्दाईया विसया वि तुच्छरूवा असासया चेव । एएहितो सोक्खं, पामाकंडूयणसुहं व ॥ २२१८ ।। परिणामदारुणं चिय, विवेयबुद्धीए चिंतियं भाइ । अहव न निम्मलदिट्ठी, पासइ विवरीयमिह अत्थं ॥ २२१९ ॥ जे बहलकामलोवहयलोयणा तेसि धवलकमलम्मि । जच्चसुवन्नसमप्पभमिमं ति जंजायए बुद्धी ॥ २२२० ॥ (विसेसयं) ता किं इमिणा रज्जेण रिद्धिसंभारजणियचोज्जेण । किं वा रमणीहिं विलासलासजणचित्तरमणीहि ॥ २२२१ ।। परिहरिय सव्वमेयं, ता पडिवज्जामि तायअणुचरियं । सासयसुहेक्कहेडं असेससावज्जपरिहारं ।। २२२२ ।। धन्ना हु भायरो मे सव्वे जे पुव्वमेव रज्जाई । परिहरिउं पडिवन्ना, जिणंतिए उत्तमं धम्मं ।। २२२३ ।। ते सकयत्था ते पुन्नभायणं ते विढत्तजम्मफला । अणवज्जकज्जनिरया, चयंति जे सव्वसावज्ज ।। २२२४ ।।
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |