Page Text
________________
सिरिचंदप्पहजिणचरियं
८४
चउवीसइं सहस्सा, कप्पडगाणं तहा मडंबाणं । विविहरयणागराई, तहेव वीसइसहस्साई ॥ २१७२ ।। दोणमुहाण सहस्सा, नवनउई इब्भजणसमिद्धाणं । तह पवरपट्टणाणं, अडयालीसं सहस्साई ।। २१७३ ।। इय पुव्वभवोवज्जियविसिट्ठपुन्नाणुभावसंजणियं । भरहाहिवस्स लच्छि, को वन्नेउं किर समत्थो ॥ २१७४ ।। तस्स य सुहंसुहेणं, सत्तत्तरिपुव्वसयसहस्साई । आजम्माओ गयाइं, कुमारभावम्मि पुन्नाई ।। २१७५ ॥ एगं वाससहस्सं, पयंडमंडलियनरवइत्तम्मि । निज्जियरिउणो जायं, कमेण तो चक्कवट्टित्तं ॥ २१७६ ।। तम्मि य वाससहस्सेणूणा छ च्चेव पुव्वलक्खाओ। वोलीणा अन्नदिणे, आयंसघरम्मि स पविट्ठो ।। २१७७ ।। जं विरइयं पि दप्पणनिम्मलफलिहमणिसिलसमूहेहिं । सोहइ सुसंधिबंधप्पभावओ एगखंडं च ।। २१७८ ॥ जं च मणिभित्तिसंकंतमणुयमाईण रूवयालीहिं । संचरमाणीहिं विहाइ पयडजीवंतचित्तं व ॥ २१७९ ॥ दीसइ सव्वत्तो च्चिय जम्मि पविढेहिं अत्तणो रूवं । संपुन्नंगोवंग, उड्ढमहोतिरियभागेसु ॥ २६८० ॥ फासो वि जस्स नीसेसदेहपल्लत्थिजणणसुसमत्थो । अइसीयलो वि निज्जिय, नवणियाँलाइ संफासो ॥ २१८१ ॥ पणवन्नकुसुमपयरम्मि जत्थ रुंटतमहुयरग्घाओ। रेहइ पडिबिंबगओ, दावितो बहुगुणं व अप्पाणं ॥ २१८२ ।। (गीइया) कसिणागुरुकप्पूराइदव्वसुसमिद्धधूवघडियाण । घाणिदियमणसंतोसकारओ जत्थ गंधो वि ।। २१८३ ।। इय एवमाइगुणगणपहाणसंजणियसोक्खसंभारं । आयंसघरसरूवं केत्तियमेत्तं पवंचेमो ।। २१८४ ।। सीहासणे नीसन्नो, इत्थीरयणेण संजुओ तत्थ । सेसाओ वि पत्ता से, रमणीओ रम्मरूवाओ ॥ २१८५ ॥ ताण च - काओ वि हंसति काओ वि रमंति काओ वि जयजय भणंति । गायंति तारमहुरं अन्नाओ किन्नरीओ व्व ॥ २१८६ ।। काओ वि वल्लई सारविंति वायंति वेणुमन्नाओ । तालं धरंति अन्नाओ भरहभावेसु कुसलाओ ॥ २१८७ ।। सुललियपयविन्नासं, वियड्ढजणजणियतोससंवासं । कव्वं व दिव्वनट्ट, काओ वि दंसंति हेलाए ॥ २१८८ ।। अन्नाओ लडहलहरीभंगुरभूभंगसंगचंगाओ । दावितिं नियसरूवं, वम्महसरपसरविद्दवियं ।। २१८९ ।। उत्तुंगकढिणचक्कलपीणपओहरजुएण नोल्लन्ती । पइपेम्मपरव्वसयाइ काइ अद्धासणे ठाइ ।। २१९० ।। कीय वि केसकलावो, मुक्को पत्तो नियंबसंबंधं । बद्धो पुणो वि जं निवपियाओ न खमंति अवराहं ।। २१९१ ।। अन्नाओ गुत्तकिरियाकारयबिंदुच्चुयाइभणिएहिं । नियनयणेहिं व हिययं, हरंति सवणंतपत्तेहिं ।। २१९२ ॥ । अवराओ पुप्फतंबोलरुद्धकरपल्लवाओ से पुरओ । मयणवियारे विवहे, पयासमाणीओ चिट्ठति ।। २१९३ ॥ वीयंति चामरेहिं, काओ वि छत्तं धरंति काओ वि । अवराओ तस्स अंगे, विभूसणाई निवेसंति ॥ २१९४ ।। विन्नाणनाणकोउयकलाविलासेहिं हावभावेहिं । अक्खेवं जणयंतीहि ताहिं परिवारिओ राया ॥ २१९५ ।। इंदो व्व देवलोए, वियारए सुरवहूहिं परियरिओ। पुन्नोदयसंभारेण सयललोयस्स अब्भहिओ ॥ २१९६ ।। अवि य - विविहमणिरयणमंडियकिरिडसंजणियसीसगुरुसोहो । तिलगुज्जोइयभालयलसयलमुहलद्धपरभागो ।। २१९७ ।।
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |