Chandappahasami Chariyam

SR No.: 001587
Original Sutra Author: Jasadevsuri
Author: Rupendrakumar Pagariya, Jitendra B Shah
Publisher: L D Indology Ahmedabad
Publication Year: 1999
Total Pages: 246
Language: Prakrit
Classification: Book_Devnagari, Story, & Biography
File Size: 17 MB

Page 111

८०
सिरिचंदप्पहजिणचरियं
जो रन्नजिन्नकूवो, सो मणुयभवो तहिं च तुच्छजलं । जं तं तब्भवियमसारविसयसोक्खं मुणेयव्वं ॥ २०६६ ॥ तणपूलिया य जा सा, विसयसुहत्थं उवायपडिवत्ती । जीहाए बिंदुलिहणा, जा उण सा विसयसुहसेवा ।। २०६७ ।। एवं च ठिए भद्दा ! जा तुम्ह न आगया वरविमाणे । सव्वट्ठसिद्धिनामे तित्ती तित्तीसअयरेहिं ।। २०६८ ।। अच्चंतमणुत्तराण वि, सद्दाईयाण देवभवियाण । उवरिं सा कह एही, तुच्छेसु मणुस्सभोगेसु ।। २०६९ ।। इय भणिऊण पुणरवि, वेयालियनाम पवरमज्झयणं । सामी तन्निस्साए परूवई तं च सूयगडे ॥ २०७० ॥ संबुज्झह किन्न बुज्झहा, संबोही खलु पेच्छ दुल्लहा । नो हू वणमंति राइओ, नो सुलहं पुणरावि जीवियं ।। २०७१ ॥ वित्तं पसवो य नायओ, तं बाले सरणं ति मन्नई । एए मम एसु वी अहं, नो ताणं सरणं ति विज्जई ।। २०७२ ।। इच्चाई वित्तेहिं, अट्ठाणउईहिं भासियं एयं । तिहिं उद्देसेहिं फुडं, वेयालियं छंदबंधेणं ।। २०७३ ॥ एएसिं वित्ताणं, कोई पढमेण चेव संबुद्धो । बीएण कोइ तइएण कोइ कोई चउत्थेण ॥ २०७४ ॥ एवं च जाव सव्वे, अट्ठाणउई वि ते वरकुमारा । अट्ठाणउईवित्तेहिं, संबुद्धा तह य पव्वइया । २०७५ ।। संगोवियाणि रज्जाणि तयणु पव्वज्जमब्भुवगमेसुं । तेसु भरहेण दूओ, उ पेसिओ बाहुबलिणो वि ।। २०७६ ।। अत्थाणे उवविट्ठस्स बाहुबलिणो समिच्च सो पासं । भणइ भरहस्स आणं, पडिच्छ अप्पेसु वा रज्जं ॥ २०७७ ॥ तं वयणं सोऊणं, नाऊणं भाउए य पव्वइए । जंपेइ आसुरुत्तो, बाहुबली दूयसंमुहमिणं ॥ २०७८ ॥ जइ नाम बालया ते, तुह पहुणा कह वि गाहिया दिक्ख । वीवाहिऊण तो किं, मम पि तं गाहिउं ममह ।। २०७९ ।। नाहं असमत्थो जुज्झियव्वए नेय एरिसगिराण । बीहेमि अहं ता भो, गंतूण कहेसु नियपहुणो ॥ २०८० ॥ अन्ने च्चिय ते पक्खी, जे किर करतालियाहिं नासंति । भेरिरवजज्जरसुई, देउलपारेवया अम्हे ।। २०८१ ।। ता एसु तुरियपयमेव गिन्ह रज्जं मदीयमेत्ताहे । बाणासणिसेणिसिरीए सोहियं समररूवमिणं ॥ २०८२ ॥ अवि य - वज्जंतवीरमद्दलहुडुक्कपडुकरडिपाडरमणीयं । कंसालतालतिलिमाइ विविहआउज्जरवमुहलं ॥ २०८३ ।। वज्जंतबुक्कटंबक्कसद्दबहिरिय नहंगणाभोगं । बहुविहपढंतमागहजयकारियगरुयसामंतं ।। २०८४ ।। उदंडपुंडरीयप्पहावपडिहणियसूरकरपसरं । चउरंगसेन्नसंखुद्धसत्तुसीमंतिणीनिवहं ॥ २०८५ ॥ वावल्लभल्लसेल्लाइपयडपहरणपयंडभडनिवहं । उच्छलियवीररसरायदाणतूसंतबंदियणं ॥ २०८६ ॥ सुहडकरखग्गखंडियपडिभडरुहिरोहविहियअभिसेयं । जयलच्छिनिलयमंगीकरेसु गुरुसमररज्जमिणं ॥ २०८७ ॥ (कुलयं) किं च न जइ संगामं, कुणसि तुमं सह मए तया होही । किं भरहखेत्तमज्झे, मइ अजिए निज्जियं तुमए ।। २०८८ ।। इय भणिऊणं दूओ, विसज्जिओ सो वि सामिणो गंतुं । साहइ सव्वं कुविओ, तो भरहो भणइ सेणाणिं ।। २०८९ ।। ताडावसु झ त्ति तुमं, पयाणभेरिं तहा करावेसु । सव्वं पि गमणसज्जं, सामगि सयलसेन्नस्स ॥ २०९० ।। पेच्छामि जेण गंतूण तस्स अइगरूयदप्पमाहप्पं । रणरहसुम्माहमहंतसत्तिसंभावणासारं ।। २०९१ ।। आएसाणंतरमेव तेण संपाडियम्मि सव्वम्मि । सुपसत्थम्मि मुहुत्ते, सयं तओ भरहनरनाहो । २०९२ ।।