Page Text
________________
.१८
सिरिमुनिसुव्वयजिणिंदचरियं सो अम्हे च्चिय पुरिसो विणासकाले सयं न पच्चक्खो । जाओ कत्थइ निया बुद्धी वा वारिया तेण ।।५३९।। जयधम्मकुमरनामं पयासियं दोसकरण-विसयम्मि। सव्वत्थ वि तेण सयं अलक्खिएणं जणाण पुरो॥५४०।। तो आह भुवणपालो दोस-पसिद्धी सयं पि तस्सऽत्थि । अइगस्या तुमए पुण विसेसओ राय-लोयस्स ।।५४१।। इह नयरे सव्वस्स वि मणम्मि वीसामिया उवाएण। ता कि पुणो वि एसो कओ किलेसो तए एत्थ ।।५४२।। तो पभणइ मंति-सुओ तस्सवराहा नियम्मि देसम्मि। जे संजाया ते च्चिय इह नाया राय-लोएण ॥५४३।। तहि तओ वहुएहि विनाएहि न ताण होइ चित्तेसु । को वितहाभिनिवेसो जाव न जाओ नियंगे वि ।।५४४।। को वि अवयारलेसो तज्जणिओ तेण कारणेणेयं । निव सुयकयं मए जह समदुक्खा होंति ते सव्वे ।।५४५।। समदुखाणं चित्तं होइ समं पत्थुए जहा कज्जे । समसीलवसणाणं सत्थेसु कहिज्जए पीई ।।५४६।। ईहेज' कि पि काउं जं कज्ज पलहुयं व गरुयं वा । तं सवारंभेणं कायव्वं सीह-नाएण ।।५४७।। इय मइसागर-वयणं सोऊणं रंजिओ मणे कुमरो । एयं गिहे विसज्जइ कुणइ सयं भोयणाइयं ।।५४८।। कय-भोयणाइ-किच्चो मंति-सुओ कुमर-मंदिरे पत्तो। अवसरनिसन्न मेयं नमिऊण निसीयइ सठाणे ।।५४९।। विन्नवइ य तं जह रायमंदिरे किन्न गम्मए इन्हि । आह कुमरो इयाणि तइ संपत्ते गमिस्सामो ॥५५० ।। इय भणिऊण कहतरमारद्धं भुवणपालकुमरेण । तं हरिसराय-कहियं निय-चित्ते धारयंतेण ।।५५१।। कय भोयणमाईया समयम्मि गया नरिंद-गेहम्मि । सब्वे पहाण-पुरिसा नाऊण अणागयं कुमरं ।।५५२।। सिग्धं चिय तग्गेहे पुरिसं पेसंति आहवणहेउं । कुमरो वि तक्खणे च्चिय समागओ ताण पासम्मि ।।५५३।। उवविट्ठो ते पुच्छइ मउलिय-मुह-कमल-कंति-संभंतो। राय-सरीर-सरूवं साहेति तहेव ते तस्स ।।५५४।। जइ पंच सत्त व दिणे महया किच्छेण अम्ह सामित्तं । पालेइ सच्चधम्मो जहत्थ नामो महाराया ।।५५५।। उड्ढं तु मंद-उन्ने अम्हे एसो चइस्सए नूणं । देहं च रोग-संगम-दोसेण व दूसियं देवो ।।५५६।। इय अंसु-जल-कणोल्लिय-नयणाणं ताण निसुणिउं वयणं । कुमरो वि कुणइ निविडत-जल-लवे लोयणे नियए ५५७ वत्थंचलेण परमज्जिऊण नियलोयणाइं ते सव्वे । जा कि पि वत्तुकामा कुमरस्स मुहं पलोयंति ॥५५८।। ता भुवणपालकुमरो करंगुली-फुसिय-नयण-सयवत्तो। जंपइ जहा नरिंदो दूर-ठिएणं मए पणओ ॥५५९।। दो तिनि वि वाराओ मज्झम्मि सरीर-कारणस्स परं । तस्स सुहासुहभावो न जाणिउं सक्किओ को वि?।।५६०।। वेज्जा पुच्छिज्जता पुण एवं चिय सया वि मह पुरओ । साहेंता जह सिग्घं होही राया विगयरोगो ।।५६१।। अह सुमइ-मंति-पमुहेहिं जंपियं अज्ज चेव वेज्जेहिं । मुक्का नरिंद-जीविय-पच्चासा अम्ह पुरओ वि ।।५६२।। तो भणइ भुवणपालो को वि गओ राय-पेसिओ पुरिसो । एत्तो आहवणत्थं जुवरन्नो विजयधम्मस्स ।।५६३।। तो वयइ सुमइ-सचिवो अज्जं विय अम्ह पढमदिवसमुहे । रन्ना सयमाएसो दिन्नो तस्साहवणहेउं ।।५६४।। अह तं वयइ कुमारो तह कुणह जहा उवेइ सिग्धं पि । इह अम्हं चल्लपिया अह तं सचिवो पुणो भणइ ।।५६५।। एत्तो च्चिय आहूया चिट्ठह अम्हेहिं कुमर! इह तुभे । जह मंतिऊण तुम्हेहिं सह इमं कीरए कज्ज ।।५६६।। तो वेइ कुमारो संपयं पि मंतेह मंतियव्वं जं। अम्हेहि समं जम्हा न विलंब-खमं इमं कज्ज ।।५६७।। तो सुमइमहामंती पहाण-पुरिसाण पासइ मुहाइं। ते बैंति तं तुम चिय कुमरस्स कहेह अम्ह मयं ।।५६८।। अह भणइ सुमइमंती कुमार-सम्मयमिमं समग्गाण । एयाण महापुरिसाण जइ तुम होसि नरनाहो ।।५६९।। पडिसेहइ तं वयणं कुमरो पढमं गुणे पसंसंतो। चुल्लपिउणो तओ सो सुमइप्पमुहेहि सव्वेहिं ।।५७०।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |