Munisuvratasvamicarita

SR No.: 001564
Original Sutra Author: Chandrasuri
Author: Rupendrakumar Pagariya, Yajneshwar S Shastri, R S Betai
Publisher: L D Indology Ahmedabad
Publication Year: 1989
Total Pages: 376
Language: Sanskrit
Classification: Book_Devnagari, Literature, & Story
File Size: 9 MB

Page 48

सिवकेऊचरियं
इय कहिए सो पुरिसो नेउं मइसागरस्स पासम्मि । पुव्वुत्तं सव्वं पि हु कहाविओ वारुएण तओ ।।४४१।। मइसागरेण नीओ सिग्धं सो भुवणपाल-पासम्मि । अक्खाविओ य सव्वं तं एगंते पुरो तस्स ।।४४२।। तो तं विसज्जिऊणं पुरिसं मइसागरेण विन्नत्तं । मज्झ वयणस्स को वि हु तुम्हाणं पच्चओ मिलइ ॥४४३।। कुमरेण तओ भणियं पुव्वं पि अपच्चओ मह न को वि । तुह जंपियम्मि होंतो संपइ जाओ पुण विसेसो॥४४४।। पुण कइवयदिवसाणं पज्जंते वसुहगामओ पुरिसो । संपत्तो मइसागर-पासम्मि कहेइ वत्तमिमं ।।४४५।। जयधम्मकुमारेणं नियवल्लह-भज्जसंतिया दासी । रूववई-नवजोव्वणजुत्ता भुत्ता हढेण तओ ।।४४६।। भज्जाए नाऊणं पट्टविया झत्ति वसुहगामम्मि । किर भुवणपालकुमरस्स संतिओ वन्नओ तत्थ ।।४४७।। इय बुद्धीए वल्लहराओ वि भणाविओ इमं तीए। मग्गं तस्स वि एयं मा जयधम्मस्स अप्पेज्जा ॥४४८॥ गुत्तगिहे रक्खेज्जह सह जयधम्मेण इह भलिस्समहं । तेण वि उज्जुत्तणओ तं तह पडिवन्नमवि अप्पं ॥४४९।। जयधम्मकुमारेणं नाऊणं तत्थ पेसिया पुरिसा । मग्गाविया य दासी तेण कयं उत्तरं एयं ।।४५०।। सा नत्थि एत्थ गामे कत्थइ अन्नत्थ तं गवेसेह । तं पुरिसेहिं गंतु कहियं जयधम्मकुमरस्स ॥४५१।। जयधम्मेणं तत्तो परिग्गहो तत्थ पेसिओ वहुओ। इय सिक्खविउं जह सा गवेसियव्वा पइगिहं पि ।।४५२।। तम्मि समग्गे गामे तुब्भेहिं तओ हवेज्ज जइ एसा । तो वल्लहरायजुयं बंधेउं तं समाणेज्जां ॥४५३।। तो गंतु वसुहगामे परिग्गहो पइगिहं गवेसेइ। तं दासिं दळूणं बंधेउं गिन्हए तत्तो ॥४५४॥ एवं कुव्वंताण वि जयधम्मनराण कि पि न हु भणियं । वल्लहराएण ठिओ मोणं काऊण सो तत्थ ॥४५५।। तो ते पुरिसा लग्गा वल्लहरायस्स बंधिउं तत्तो। सो नियसमुदायजुओ आउह हत्थो ठिओ समुहो ॥४५६।। तेसिं पुरिसाण तओ जाए जुज्झम्मि तेहिं सह तत्थ । अट्टहिं जाणेहिं जुत्तो वल्लहराओ मओ तत्तो॥४५७।। गामो वि तेहिं सव्वो ल्हूसेउ धणकर्णेहि परिमुक्को । एक्कखणद्धेण कओ तो वल्लहरायगिहिणीए ।।४५८।। एत्थ अहं पेसविओ तुम्ह समीवम्मि वत्त-कहणत्थं । तो तीसे आएसो दिज्जउ जो को वि दायव्वो ॥४५९।। सो वि मइसागरेणं नेऊणं भुवणपाल-पासम्मि । अक्खाविओ समग्गं वसुहग्गामम्मि जं वित्तं ॥४६०॥ तो कुमरेणं भणियं वल्लहरायस्स रोहिणी एत्थ । पेसेऊणं वाहणमाणा विज्जओ दुयं ताव ॥४६१।। मइसागरेण एवं सहस त्ति कयं कुमार-वयणेण । कुमरेण वि रज्ज-गहे नियचित्ते निच्छओ बद्धो ।।४६२॥ मइसागरेण सद्धि मंतेऊणं तओ उवाएहिं । सव्वो वि राय-लोओ अणुरत्तो अत्तणो विहिओ॥४६३॥ रज्जे पमाणपुरिसा जे के वि हु ताण कन्नकुहरम्मि । जयधम्माइसरूवं पवेसियं बुद्धि-जोएण ॥४६४॥ ते वि हु वंछंति मणे रज्जं कुमरस्स भुवणपालस्स । अच्चंत-विरत्तमणा जयधम्मे विजयधम्मे य ॥४६५।। न हु विजयखेडनयरे तप्पभिई भुवणपालकुमरो वि । पेसेइ नियं पुरिसं पासम्मि उ विजयधम्मस्स ।।४६६।। वसुहग्गामम्मि वि ल्हसियम्मि भणिओ न कि पि जयधम्मो । तेण परिन्नायम्मि वि जुवरन्ना विजयधम्मेण ।४६७। इय वच्चंते काले दुइज्जसंवच्छरस्स पज्जते । सिरिसच्चधम्मरन्नो देहे रोगो समुप्पन्नो ॥४६८।। लग्गा य पवरवेज्जा रन्नो देहे कुणंति तेगिच्छं । न हवइ को वि विसेसो विज्जेहिं तओ समग्गेहिं ॥४६९।। अन्नोन्नं मंतेउं पहाण-पुरिसाण अग्गओ कहियं । अम्ह असज्झो राया तो तेहिं निवारिया वेज्जा ॥४७०॥ तुम्हेहि न कहियव्वं कस्स वि पुरओ सरूवमेयं ति । एयं चिय वत्तव्वं जह राया सुदरो होही ॥४७१॥ पडिवन्नं वेज्जेहिं पहाण-पुरिसाण एरिसं वयणं । सकुडुबे वि न कस्स वि पुरओ एवं कहेंति इमे ॥४७२।। तो विजयधम्मपुरिसा सया वि जे एंति राय-पासम्मि। कज्जम्मि समुप्पन्ने ते तत्थ समागया तइया ॥४७३।।