Page Text
________________
२७४
सिरिमुनिसुव्वयजिनजम्मवण्णणं तिन्नि य चउसालाइं पवराई विउव्वयंति भवणाई। तेसि मज्झे सीहासणाई मणिरयणचित्ताई ॥८८२३।। नवणीयतूलकोमलफासेहिं मसूरएहिं सहियाहिं । वरपट्टसुयपच्चत्थुयाइं सह पायवीढेहिं ।।८८२४।। तिन्नि विउव्वंति तओ नियकरयलसंपुडेण तित्थयरं। तित्थयरमायरं पुण संगिन्हेऊण बाहाहि ।।८८२५।। दाहिणकयलीहरचाउसालसीहासणम्मि नेऊण । भयवंतं तित्थयरं समायरं सन्निवेसित्ता ।।८८२६।। अब्भंगित्ता सयपाग-सहस्सपागेहिं सुरहि-तेल्लेहि। उन्वट्टित्ता य महासुगंधिणा गंधवट्टेण ।।८८२७।। नेति तओ पोरथिमकयलीहरचाउसालमज्झम्मि । तत्थ वि निसियावित्ता मणिमयसीहासणे पवरे ।।८८२८।। मज्जावित्ता गंधोदएण पुप्फोदएण उदएण । सव्वालंकारविभूसियं च किच्चा तहेव तओ ।।८८२९।। उत्तरकयलीहरचाउसालसीहासणम्मि नेऊण । निसियावित्ता तित्थेसरं समं निययमाऊए ॥८८३०।। तत्तो ताओ सद्दावेऊणं आभिओगिए देवे। एवं वयंति जह भो देवाणुपिया ! इओ तुन्भे ।।८८३१।। खिप्पामेव य गंतूण चुल्लहिमवंतपव्वयवणाओ। गोसीससरसचंदणतरूणकट्ठाई आणेह ॥८८३२।। अह ते एवं मज्झिमरुयगागयदिसिकुमारि देवीहिं । आणत्ता हिट्ठमणा तहेव आणंति कट्ठाई ।।८८३३।। अह ताओ देवीओ अरणिं सरगेण निम्महेऊण । अप्पाइत्ता अगणि संधुक्कित्ता तओ तत्थ ।।८८३४।। पक्खिविऊणं गोसीससरसचंदणतरूणकट्ठाई। पज्जालिऊण समिहाकठेहि कुणंति तो होमं ।।८८३५।। काऊण भूइकम्मं बंधेऊणं च रक्खपोट्टलियं । नाणारयणविचित्ते तत्तो दो वट्टपाहाणे ।।८८३६।। घेत्तूण लोगनाहस्स कन्नमूलम्मि टिट्टियावेति । पभणंति य वारतियं भवउ भवं! पव्वयाउ ति ।।८८३७।। तत्तो तित्थयरं करयलेहि गहिऊण तस्स जणि तु । बाहाहिं गिन्हिऊणं जम्मणभवणम्मि आणेउं ।।८८३८।। सयणिज्जे सोवेउं तीसे पासे ठवेंति तित्थयरं । तत्तो पासठियाओ परिगायंतीओ चिट्ठति ।।८८३९।। एत्थंतरम्मि सक्को सहसक्खो पागसासणो मघवं । सोहम्मकप्पसामी पुरंदरो वज्जपाणी य ।।८८४०।। दाहिणलोगड्ढपहू एरावणवाहणो सुरिंदो य । बत्तीसविमाणावासलक्खरक्खापसत्तो य ।।८८४१।। वरकंचणमयचंचलकुंडलविलिहिज्जमाणगंडयलो । आलइयमालमउडो अरयंवरवत्थधारी य ।।८८४२।। भासुरवरबोंदिधरो पालंबपलबमाणवणमालो। पवरिड्ढी पवरजुई पवरबलो पवरकित्ती य ।।८८४३।। कप्पे सोहम्मम्मि सोहम्मवडिसए विमाणम्मि । सोहम्माए सहाए सीहासणगंसि सक्कंसि ।।८८४४॥ चुलसीए सामाणियसहसाण चउण्ह लोगपालाण । नियपरिवारजुयाणं अट्ठन्हं अग्गमहिसीणं ।।८८४५।। तिण्हं परिसाण तहा तेत्तीसाए (य)तायतीसाणं । सत्तण्हं अणियाणं सत्तण्हं अणियहिवईणं ।।८८४६।। चुलसी तिसहस्साणं चउग्गुणाणायरक्खदेवाणं । अन्नेसि पि बहूणं सोहम्मगकप्पवासीणं ।।८८४७।। वेमाणियदेवाणं देवीण य आभिओगियाणं च। सामित्तं भट्टित्तं आहेवच्चं करेमाणो ।।८८४८।। वरनट्टगीयवाइ (य) तंतीतलतालघणमुइंगरवं । पेच्छणयं पेच्छंतो दिव्वाइं भोगभोगाइं ।।८८४९।। भुंजतो जा चिट्ठइ ता तस्स सुरेसरस्स सहस त्ति । नाणामणिरयणेहिं रुचिरं सीहासणं चलइ ।।८८५०।। तं चलियं पासित्ता सक्को ओहि पउंजए झत्ति । भगवंतं तित्थयरं आभोगति ओहिणा तत्तो ॥८८५१।। परितुट्ठहिट्ठहियओ आणंदियपरमपीइसोमणसो। ऊसवियरोमकूवो धाराहयनीवकुसुमं व ।।८८५२।। संभमवसओ सट्ठाणचलियमउडाइसव्वलंकारो। अब्भुट्टित्ता सीहासणाउ ओरुहइ पायवीढो ।।८८५३।। मणिरयणमंडियाओ वेरुलियवरिटुरिट्ठघडियाओ। ओमुयइपाउयाओ भामंडलभासमाणीओ ।।८८५४।। एगाए साडियाए काऊणं तयणु उत्तरासंगं । अंजलिमउलियहत्थे मत्थयदेसम्मि नेऊण ॥८८५५।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |