Page Text
________________
२३४
सिरिवम्मकुमारचरियं
तत्थगयस्स उजं किं पि जायमेयस्स तं समग्गं पि । जाणंत च्चिय चिट्ठह तुब्भे वि तओ न भणियव्वं ॥७५२८।। इय भणिऊणं सचिवम्मि उवरए भणइ कुमरसिरिवम्मो। वित्थरभणियस्स इमस्स मंति ! को एत्थ परमत्थो मंती पभणइ कुमरो सुदंसणो दुविणीयभावेण । बाहिट्टियाए माऊए गम्भसंभइओ तह य ।।७५३०।। रज्जस्स अजोग्गो च्चिय लहू उ न तहा तओ उ सो जोग्गो । भणति तओ सिरिवम्मो एवं चिय तुम्ह वत्तव्वं ? ।। आमं ति मंतिभणिए सिरिवम्मो भणइ तत्थ पडिवयणं । तुम्हेहिं दूसणदुगं सुदंसणे जं समुल्लवियं ।।७५३२।। तत्थेगंतेण सयं परिचत्तं दूसणं अविणयस्स । दुइयं तु दूसणं पि हु न होइ निउणं मुणंताण ।।७५३३।। जणणी जणओ य जओ दोण्हं पि हु भाउयाण एगाई। मज्झेण बाहिरेण य न विसेसो कीरए तेसिं ।।७५३३।। तत्तो य भणइ मती अस्थि विसेसो कुमार! अतिगरुओ। बाहिं जाए गन्भे संकट्ठाणं वहइ लोओ ॥७५३५।। अह पभणइ सिरिवम्मो कमपरिहारे अकीरमाणम्मि । संका न का वि जायइ कीरते तम्मि पुण संका ।। उप्पाइज्जइ तुम्हेहि चेव लोए अविज्जमाणा वि। जह जेठे जोग्गम्मि वि संते लहुओ कओ रज्जे ।।७५३७।। कि कारणमिह एवं वियक्कमाणो जणो सयं चेव । तं संभरेइ कहइ व तस्स पुरो एवमन्नो वि ॥७५३८।। जस्सासि संसओ सो वि निच्छयं कुणइ एत्थ वत्थम्मि। कमलंघणे उ अकए वयणवयासो न कस्स वि य ।। पुण पभणइ सुवियारो कुमार ! लोओ न जंपए जइ वि । जाणइ तहा वि एवं अमुणंतो को वि इह नत्थि॥७५४०॥ सिरिवम्मो भणइ तओ सचिव ! सरीरम्मि जाई अंगाई। मत्तपूरीसविसज्जणटाणाई लज्जणिज्जाइं॥७५४१।। ताइं वियाणइ लोओ परोप्परं ताव तह वि गोवेइ । वत्थाईहिं न पयडीकाऊण सयं पि दंसेइ ॥७५४२।। तम्हा तुम्ह वि एवं जाणिज्जंतं पि निययवयणिज्जं । गोविज्जंतं चिय पवरमियरहा होति दोसयरं ।।७५४३।। लोइयदिट्टतेणं एवं पडिबोहिओ महामंती । भणइ सुवियारं एयं नामं चिय केवलं मज्झ ॥७५४४।। अत्थो एयस्स पुणो कुमार ! गहिओ तए च्चिय समग्गो । ता जंच्चिय वयसि तुमं तं चिय किच्चं इह न इयरं ।। तो पभणइ सिरिवम्मो जइ तुम्ह वि सम्मयं सचिव ! एयं । तो विनविऊण निवं कारेह इमं सयं चेव ॥७५४६।। राया वि जवणियंतगरओ कुमारस्स जुत्तिवयणाई। सोऊण समग्गाई सविम्हओ धुणइ नियसीसं ।।७५४७।। अह उढिऊण मंती विनविऊणं महाबलं निवई । जुवरायपए ठावइ सुदंसणं तक्खणे चेव ।।७५४८।। बंधेउं धिप्पंते सुदंसणे तस्स संतियं किं पि । जं आसि पुरा गहियं रह-करि-हय-करहमातीयं ।।७५४९।। तम्मज्झाओ बहुयं समप्पियं वालिऊण तस्सेव । सिरिवम्मकुमारेणं नियं च वत्थाइयं दिन्नं ॥७५५०॥ नयरम्मि सारिवद्दे गंतुं मोयाविओ तओ अप्पा। रन्ना महाबलाओ तेण वि रह-करि-हयातीहिं ॥७५५१।। सम्माणेऊण विसज्जिओ गओ सारिवद्दनयरम्मि । सिरिवम्मो रायसुओ तत्थ वि पुव्वं व भणियव्वं ।।७५५२।। सव्वं पि विभूतीए नयरपवेसो विवाहकरणं च । सव्वेसु जिणहरेसुं अट्ठहिं दियहेहिं ण्हवणाई ।।७५५३।। प्रयापेच्छणयाई रहजत्ता चउविहस्स संघस्स । पडिलाहणं च नवरं रयणवईए करग्गहणं ।।७५५४।। अह सूरपालराया सहानिसन्नो दिणम्मि अन्नम्मि । दाहिणपासम्मि ठियं संभासइ कुमरसिरिवम्मं ॥७५५५।। दंतऊरपुरठियाणं तुम्हाण मए सुवन्नलक्खेण । मरगयरयणं गरुयं गहियं देसंतरनराओ ।।७५५६।। तं देवयाअहिट्ठियमच्चिज्जइ केवलं चिय सया वि । न उणो आहरणाइसु उवगरइ कहि पि गायत्ता।।७५५७।। तम्मि निहालिज्जते फुरंधणविमलकिरणजालम्मि । पडिहासए चउब्भुयलच्छीपडिमाए आगारो ।।७५५८।। दंसिस्सए इयाणि आणावेऊण तुम्ह पुरओ तं । तो जंपइ सिरिवम्मो तं बहुमुल्लेण गहियं ति ।।७५५९।। तो अम्ह दंसणिज्जं जम्हा संभवइ पवररयणाण । मुल्लं एत्तियमेत्तं पि किंतु जं देवयामुत्ती ॥७५६० ।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |