Page Text
________________
२१२
सिरिवम्मकुमारचरियं
लेहम्मि एत्तियं चिय लिहियं एत्थागयं वसंतसिरी । अम्हेहिं परिणीया वासवदत्तो पिया तीसे ॥६८१०॥ वासवपुरम्मि अम्हे हक्कारंतो य चिट्ठए इण्हि । सेसं तु सुदंसणवइयराइयं किंपि नो लिहियं ।।६८११।। ता कि पि जाणसि तुम कह हूओ सो सुदंसणो कुमरो । तो जहवत्तं सव्वं तस्स मए साहियं सम्मं ॥६८१२।। सोऊण तओ राया सपरियणो हरिसपरवसो जाओ। जंपइ जहा कुमारो निरहंकारो अहो दूरं ॥६८१३।। इय जंपिऊण रन्ना लिहाविओ एस तक्खणे लेहो । जेमावियस्स हत्थे ससंबलो अप्पिओ मज्झ ।।६८१४।। दिन्ना य इमा सिक्खा जह सिरिवम्मो तए महगिराए। इय भणियव्वो मा तं कस्स वि गच्छेज्ज वीसंभं ।।६८१५।। तह गरुयपयत्तेणं रक्खिज्जह अत्तणो सया देहं । इय निवसिक्खे गहिउं ठाणाओ तओ अहं चलिओ ॥६८१६।। अज्ज इहं संपत्तो अह तं सम्माणिउं विसज्जेइ । कुमरो सयं तु गंतुं वसंतसिरिमेवमुल्लवइ ॥६८१७।। पहसंतो जह पेइयहरगमणुक्कंठियाए जो तुमए । सुयणु! विहिओ उवाओ तहेव सो तुज्झ लहु फलिओ।।६८१८।। तो आह वसंतसिरी पिययम! परिहासओ वि मा एवं। पुण पभणिस्सह तुब्भे न मए पिउघरगमणहेउं ।।६८१९।। इय विनत्ता तुब्भे किंतु जहा तुम्ह तत्थ पगयाण । रूवाइगुणे दलृ पियराई मज्झ तूसंति ।।६८२० ।। हक्कारिया वि तेहिं वच्चह तुब्भे न तत्थ जंतेण । निठुरयाए दोसो तुम्हाण वि मा इमो होउ ।।६८२१।। इय आलावं काउं खणं पि कुमरो समं पिययमाए । संवहिऊणं वच्चइ सयं जिणिदाण भवणेसु ॥६८२२।। तयणु वसंतसिरी वि हु हक्कारेऊण तत्थ वरदत्तं । वासवउरे गमिस्सइ सिरिवम्मो तस्स इइ कहिउं ।।६८२३।। संवहिऊणं वच्चइ तेणेव समन्निया जिणहरेसु । न्हवणाइ पेक्खिऊणं कुमरो तीए सह नियत्तो ।।६८२४।। निवपासायम्मि गओ निव्वत्तियभोयणाइनियकिच्चो । सेज्जाए गओ चिट्ठइ जाव खणं ताव संपत्तो।।६८२५।। दूसलसेणाहिवई लेहं गहिऊण पुरिससहियं तं । सिरिवम्मस्स समप्पइ हत्थे जपइ य तह एवं ।।६८२६।। जह एसो मम लेहो पट्टविओ सूरपालनरवइणा । तुम्हं आहवणत्थं हत्थम्मि इमस्स पुरिसस्स ।।६८२७।। अवहारिऊण लेहं तं कयमुत्तरामिमं कुमारेण । पिउणो आणा अम्हं इण्हि वासवउरे गंतुं ॥६८२८।। तत्तो विणियत्तो पुण करिस्समेयं पि कि पि न अजुत्तं । इय वोत्तूणं एवं विसज्जए विहियसम्माणं ।।६८२९।। तत्तो खणंतरेणं विन्नत्तो पुण वि दारवालेण । रन्ना महाबलेणं पट्टविओ चिट्ठए पुरिसो ।।६८३०।। अह कुमराएसेणं पवेसिओ तेण सो समागंतुं । अप्पेउं कुमरकरे लेहं तो तं नमसेइ ॥६८३१।। कुमरो वि करं दाउं पट्ठीए तस्स तं निमंतेइ । उचियासणेण सो वि हु उवविसिउं पंजलीहोइ ।।६८३२।। कुमरो वि वियडिऊणं लेहं पेक्खेति तत्थ लिहियमिणं । अम्हेहि तुम्ह पासे पट्ठविओ चिट्ठए पुरिसो ।।६८३३।। नामेणं सिरिहरिसो पमाणभूओ य अम्ह रायउले । तत्तो जं किंपि इमो जंपइ तुब्भेहिं तं सव्वं ।।६८३४।। सोउं अणुट्ठियव्वं तत्थ वियप्पो न कोइ कायव्वो। इय लेहत्थं अवहारिऊण तं पुच्छए कुमरो ।।६८३५।। तुम्हं सिरिहरिसो इय नामं? आमं ति जंपए एसो । तं आह पुणो कुमरो संदेसं कहह नियपहुणो ।।६८३६।। तो जपइ सरिहरिसो कहेमि तुम्हे सुणेह उवउत्ता । रन्ना महाबलेणं तुम्हाण कहावियं एयं ।।६८३७।। अम्ह सुदंसणकुमरो पुत्तो एक्को य वल्लहो तह य । किंतु परं आणाए न वट्टए एस कहया वि ।।६८३८।। मंतीण महापुरिसाण पासओ एस गवारं पि । सिक्खाविओ न सिक्खइ तहावि वियरइ जहिच्छाए ।।६८३९।। नाऊण तो सहावं उत्तारेऊण निययचित्ताओ। मुक्को देसच्चायं न कारिओ मंतिवयणेण ।।६८४०।। एसो अइदुहतो दमिओ तुम्हेहिं सुइरकालाओ । तो अम्हे परितुट्ठा तुम्हाणमिमेण कज्जेण ॥६८४१।। दाहामो नियधूयं परिणयणत्थं अणन्नसमरूवं । पियदसण त्ति नामं सुदंसणस्सेव लहुभइणि ।।६८४२।।
।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |