Munisuvratasvamicarita

SR No.: 001564
Original Sutra Author: Chandrasuri
Author: Rupendrakumar Pagariya, Yajneshwar S Shastri, R S Betai
Publisher: L D Indology Ahmedabad
Publication Year: 1989
Total Pages: 376
Language: Sanskrit
Classification: Book_Devnagari, Literature, & Story
File Size: 9 MB

Page 242

सिरिमुनिसुव्वयजिणिदचरियं
२०९ गुलखेडसंठिएसुं सब्वेसु वि दूसलो तओ भणइ । भोयणसयणनिमित्तं ठाणं तुम्हाण इणमेव ।।६७११।। चिट्ठइ अम्ह नरिंदस्स मंदिरं जइ पुणो समग्गं पि। कडयं आणावह तो तेण समं एउ आवासो ।।६७१२।। अह सिरिवम्मो पभणइ कडयं सव्वं पि अज्ज वि न एत्थ। आणाविस्सामि अहं जम्हा चिट्ठति समरहया।।६७१३।। तत्थ बहू नरतुरया चालिज्जताण ताण इन्हि पि । जं जायइ बहुपीडा तेसिं कज्जेण कडयं पि ॥६७१४।। ठाइस्सइ तत्थेव य कइवयदियहाइं जाव रुज्झंति । तेसिं अंगे घाया तो पभणइ दूसलो एवं ॥६७१५॥ जइ एवं तो चिट्ठउ तत्थेव कुमार तुम्ह आवासो । जं वज्जाउहदेवीभवणम्मि अहं पि अट्ट दिणे ॥६७१६।। पूयं काराविस्सं जम्हा अम्हाण वंछियमिमीए । दिन्नं सिग्घं पि तओ देमो ओयाइयं तीसे ।।६७१७।। इन्हि तुम्हेहि परं पारद्धा चिट्ठए जिणहरेसु । पूया काउं तत्तो थेवे वि दिणे विलंबिस्सं ॥६७१८।। पच्छा तुम्हे वि निराकुले अहं नेमि देविभवणम्मि। आह तओ सिरिवम्मो तं जुत्तं जं विलंबेसि ॥६७१९।। पूयाकरणं देवीए मंदिरे एरिसं पुण न जुत्तं । देवीपूयं अम्हाण दंसिउं जं समीहेसि ।।६७२०।। जं जेटुसुक्कपडिवयदियहो अज्जेस सत्तहिं दिणेहिं । अन्नेहिं तओ होही f जणहरपूयापरिसमत्ती ॥६७२१।। नवमीदिणम्मि एत्तो अम्हे पच्छा सुहं गमिस्सामो। जइ पुण अन्ने वि दिणे चिट्ठामो अट्ठ एत्थेव ॥६७२२।। तो होइ समासन्नो समओ मेहागमस्स तत्थ जलं । जइ पडइ तओ गमणं जायइ दुक्खेण कडयस्स ।।६७२३।। तो दूसलेण भणियं तम्मि दिणे तुम्ह संगयं किं पि । जं पडिहासइ तं चिय करेज्ज तुम्हे इयाणि तु ॥६७२४।। चिट्ठइ इह धवलहरे चिट्ठउ तत्थेव तुम्ह आवासो। इय दूसलस्स वयणं पडिवज्जेऊण सिरिवम्मो ॥६७२५।। आइसइ निए पुरिसे तत्थेव य रसवईए करणत्थं । जाइ तओ निग्गंतुं सेसेसु सयं जिणहरेसु ॥६७२६।। तेसु जिणबिंबमंडणपूयणपरिहावणं बलिविहाणं । आरत्तियं च दद्रु वंदेऊणं तओ देवे ।।६७२७।। निवभवणगमणसमए विणयणओ मुणिजणं निमंतेइ । पडिलाभणानिमित्तं आहारेणं चउविहेण ।। ६७२८।। ते बेंति वट्टमाणो जोगो तो सावए निमंतेइ । पभणंति ते वि एवं एयं चिय भोयणं दिन्नं ॥६७२९।। लट्ट् अम्ह तएज्ज कुमार ! वावारिया सहायत्ते । अम्हे जिणपडिमाणं न्हवणाइविहिम्मि सुहजणए ॥६७३०॥ इच्चाइ उत्तराई कुणमाणे भीडिऊण ते सड्ढे । भोयणहेडं मन्नाविउं सयं कुमरसिरिवम्मो ॥६७३१।। पत्तो निवधवलहरे वसंतसिरिसंजुओ मुणी सड्ढा । नियनियठाणम्मि गया अह सिद्धं रसवई नाउं ।।६७३२।। सिरिवम्मो दूसलमाणवेइ मणिसावयाहवणहेउं । अह दूसलेण पट्ठावियम्मि हक्कारए तेसि ॥६७३३।। पत्तो खणंतरेणं सणियं सणियं खणेण मुणिवग्गो। कुमरेण वसंतसिरी हक्कारेऊण तो भणिया ॥६७३४।। तुह पुण्णुदएण इमे समणा समणी य आगया एत्थ । आहारदाणमेसि तो देहि तुमं जहिच्छाए ॥६७३५।। कुमराएसेण तओ उठेऊणं इमा तह करेइ । बहुयं देंतीए वि हु तीए गहियं मुणिजणेण ॥६७३६।।
थेवं चिय किं पि तवो आयंबिलनिविगइय जुयमुणिणो। कहिऊणं पडिसे हियमियरं लट्ठ पि सव्वं पि ।।६७३७।। तत्तो सावयवग्गं सगोरवं भोइऊण नीसेसं । काउं तंबोलाई सम्माणं बेइ तो कुमरो ।।६७३८।। तो जोडियकरजुयलो अन्ने वि य सत्तवासरे एवं । तुम्हेहि विहेयव्वो अम्हाणमणुग्गहो एसो ॥६७३९।। इय पडिवन्ने वयणे विसज्जिउं सावए तह विहेउं । भुत्ताभुत्तसपरियणसुदंसणाईण तत्तिं च ।।६७४०।। अनिवारियसत्ताई पयट्टिऊणं पुरस्स दारेसु । गिहपडिमा पूएउं भुंजइ सह दूसलाईहिं ॥६७४१।। दिणसेसं गमिऊणं जिणपडिमं पूइऊण संझाए । रयणीए सयणगओ पुच्छइ भज्ज वसंतसिरि ।।६७४२।। अज्ज जिणमंदिरेसुं तए पिए ! पेक्खियं ण्हवणमाई । दिन्नं मुणीण दाणं तं भण तुह केरिसंभाइ ।।६७४३।।