Page Text
________________
१८१
सिरिमुनिसुव्वयजिणिदचरियं एक्कं महाणुभावा एए पडिबज्जिया मए होति । अन्नं च तीए चित्तं जाणिज्जउ केरिसं होइ ।।५८०२।। गाढाणुरागमइयं पत्थणयं एरिसं सुणेऊण । किं रज्जइ तीए मणं सुदंसणे अह न थेवं पि ।।५८०३॥ इयचितिऊण भणियं तेसि सम्मुहमिमं वणसिरीए । तुम्हाणुवरोहेणं कहेमि गंतुण कुमरीए ॥५८०४॥ इय भणिऊणं तीए कहियम्मि इमम्मि रायधूयाए। भणियं तीए वणसिरि मए सुयं तुह कहतीए ।।५८०५।। एरिसमणिद्ववयणं अन्नो जइ कहइ तो अहं कन्ने ! ठविउं चिट्ठामि व उद्दिउं व अन्नत्थवच्चामि ॥५८०१॥ तो वणसिरीए भणियं सामिणि ! जाणामि एरिसमहं पि । जं सिरिवम्मकुमारे अणुरत्तमणाए तुह धणियं ।। अन्नपुरिसस्स गहियं नाम पि न कन्नसोक्खसंजणयं । किंतु सुदंसणपुरिसेहि मज्झ दिन्ना बहू सवहा ।।५८०८॥ तुह संतिया मए तो तेसि सवहाण भंगभीयाए । तुह कहियमिणं अन्नह अणभिमयं तुज्झ कह बेमि ।।५८०९।। ता काऊण पसायं कहेहि जं किंपि उत्तरं तेसि । देमि तओ बेइ इमा जं किचि वि रुच्चए तुज्झ ।।५८१०।। अह आगंतुं तीए तेसि पुरिसाण साहियं एवं । कहियम्मि तुम्ह वयणे मए पुरो रायधूयाए ।।५८११।। तीए मह पासाओ भणाविया एरिसं तओ तुब्भे । जह मह वयणं गंतु सुदंसणस्सेयमक्खेह ॥५८१२॥ जत्तं ताव इमं चिय अब्भत्थंतो तुमं सयं चेव । जं किरपडिवज्जिज्जसि अणुराओ जस्स तुह एसो ।।५८१३।। सिरिवम्मो पुण कुमरो अदिट्ठपुव्वो तहेव सो मज्झ । नाम पि नो वियाणइ सयंगया तत्थ तस्स अहं ॥५८१४।। किं रुच्चिस्सामि न वा एयं पि न ताव जाणए को वि । गहगहियं होई जहा तह जायं तह वि मे हिययं।५८१५। सिरिवम्ममेव कुमरं चिट्ठइ झायंतमेयमणवरयं । कयसामग्गी वि अहं गंतुमणा जइ वि चिट्ठामि ।।५८१६॥ तह वि हु नियजणणीए तत्थेव य कइवयाइं दियहाइं। चिट्ठामि विलंब कारिया तओ तेत्तिय दिणाण ।।५८१७।। मज्झम्मि नियं चित्तं संबोहेउं नियत्तइस्सामि । सिरिवम्मकुमाराओ तो तुज्झ कहावइस्सामि ।।५८१८।। एयं कुमरीवयणं तुम्हे गंतूण कहह निय पहुणो । तेहि भणियं इहेव य तेत्तियदियहाइं चिट्ठामो ॥५८१९।। तो वणसिरीए भणिया ते एवं जह इहट्ठिया तुब्भे । किं व करिस्सह कज्जेण विरहिया एत्तियदिणाणि।।५८२०।। जइ अम्ह सामिणीए मणं भविस्सइ सुदंसणस्सुवरि । तो पेक्खिस्सह तं सिग्धमागयं दंतउरनयरे ।।५८२१।। अह अन्नहा तया पुण चंदउरीए पुरीए संपत्तं । तं निसुणिस्सह तत्थेव संठिया बहुया बहुयलोयाओ।।५८२२ अह तेहिं सुदंसणपेसिएहि पुरिसिएहि वणसिरी भणिया। संपज्जिस्सइ जइ मणसमीहियं सामिणो अम्ह ।५८२३। तो नियमा अदलिदं तुज्झ कुडुंब पि कारइस्सामो । हसिऊण वणसिरीए तओ य ते एरिसं भणिया ॥५८२४॥ इन्हि चिय अदलिई अम्ह समग्गं पि चिट्ठइ कुडुंबं । सिद्धे इमम्मि कज्जे होज्जह अदलिद्दया तुब्भे ।।५८२५।। इय वणसिरीए भणिया ते वि हु हसिऊण निग्गया तत्तो । मोत्तूण तत्थ पुरिसं सिक्खं दाऊण कन्नम्मि ॥५८२७ । दंतउरपुराभिमुहं सयं तु वच्चंति मंदमंदगई। पत्थुयकज्जअसिद्धि वि णिच्छिऊणं निराणंदा ।।५८२७।। एत्तो य वसंतसिरी वासवदत्तस्स निवइणो धूया। तइयम्मि दिणे चलिया चंदउरि पुरीए मग्गम्मि ॥५२८२८।। पणिहिपुरिसेण गंतु पट्ठीए सुदंसणस्स पुरिसाणं । पविसंताणं दंतउरपुरवरे साहियं एयं ॥५८२९।। तेहिं तु कहियमेयं गंतूण सुदंसणस्स कुमरस्स । सोऊण सो वि एयं चउरंगबलेण विउलेण ।।५८३०।। संवहिउं सिग्धं चिय दंतउराओ पुरिओ नीहरिओ । वट्टाबंधस्स कए रागंधो धाविओ तीसे ॥५८३१।। सा य वसंतसिरी पुण पिउणो देसं वि लंघिउं सव्वं । देसंतरम्मि पत्ता नरवइणो सूरपालस्स ।।५८३२।। एत्थंतरेसु दंसणकुमरो वि विलंघिऊण नियदेसं । सीमाए संपत्तो चिट्ठइ गहिऊण आवासं ॥५८३३॥
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |