Page Text
________________
सिरिमुनिसुव्वयजिणिदचरियं
१७७ गंतूण तत्थए सो कयप्पणामोवगहिओ तीए । परिचुंबिऊण य सिरे निवेसिओ आसणे उचिए ।।५६७५।। काऊण पीइपुब्बं आलावं कं पि सह सजणणीए । तयणुन्नाओ तत्तो नमिउं सेसाण देवीणं ।।५६७६ ।। लद्धासीसो तासि पासाओ निग्गओ निवसमीवं । पत्तो दिन्नं तेणा वि तस्स जुवरायववलहरं ॥५६७७।। तत्थ कयमज्जणविही आगंतुं बालसेवयजणेहिं । पणओ बहुएहिं तओ कुमरेण वि तेहिं सबेहिं ।।५६७८॥ सह आलावो विहिओ जहोचिओ ताण तोस संजणओ। अह पत्तनिवाएसे विसज्जिऊणं जणं सेसं ॥५६७९।। नियपरियणपुरिसेहिं संजुत्तो केत्तिएहिं वि तओ सो। देवालयमज्झठियस्स पूयमाणस्स जिणपडिमं ॥५६८०।। रन्नो पासम्मि गओ भत्तीए पणमए तओ पडिमं । थुणइय जह सत्तीए निवो वि पूयं करेऊण ।।५६८१॥ देवे वंदेऊणं कुमरेणं समंतओ विणिक्खिमिउं । गंतुं भोयणसालाए भोयणं कुणइ सह तेण ॥५६८२।। परिवारेण य सेसेण संजुओ विहिय भोयणो तत्तो। सिलियावसरं काउं विसज्जए कुमरपमुहजणं ।।५६८३।। दिणसेसं गमिऊणं संज्झा समयम्मि देइ आएसं । निय सेवयपुरिसाणं जहा पभायम्मि तुब्भेहिं ।।५६८४।। कारेयव्वा पूया इह नयरगएसु चेइयहरेसु । एवं काऊण तओ आगंतुं मज्झ कहियव्वं ॥५६८५ ।। तेहिं वि तहेव काउं आगंतुं नरवरस्स विन्नत्तं । राया वि कुमरसहिओ पासइ पूयं जिणहरेसु ।।५६८६।। अन्नम्मि सोहणदिणे जुवरायपयम्मि ठावए कुमरं। अइगरुयविभूईए कमागयं देइ देसं च ।।५६८७।। देसम्मि निरूबेउं कुमरो मइमंदिरं सचिवपुत्तं । चिट्ठइ तत्थेव सयं निवई विणएण सेवंतो ॥५६८८।। वच्चइ निच्चं पि जिणिदमंदिरे पूयए य पडिमाओ । वंदइ भत्तीए तओ गुरुणो य समागए तत्थ ।।५६८९।। सुणइ खणं वक्खाणं जाओ एवं कमेण अइकुसलो। जिणवयणे सिरिवम्मो करेइ कइया वि बुहगोट्ठि ।।५६९०।। वाहइ कया वि आसे करेइ कीलं कया वि हत्थीहिं । आरुहइ कया वि रहं धावइ कइया वि पाएहि ।।५६९१।। कइया वि खग्गखेडयहत्थो कइया वि कलियकोयंडो। कुणइ कलाणब्भासं कासि पि कया वि सो कुमरो॥५६९२।। निय पासायम्मि ठिओ समं वयंसेहिं कुणइ कइया वि । परिहाससुंदरकहं इय वच्चंतेसु दियहेसु ।।५६९३।। वम्महकेलिकुलहरं कमेण नवजोव्वणं समणुपत्तो । सुविभत्तसव्वदेहं वित्थरियविलासलायन्नं ।।५६९४॥ जह जह सरीरसोहा पसरइ तह तह गुणा वि सविसेसं। पसरंति तस्स भुवणे जाया मरिसव्वअणुदियह।।५६९५।। पसरताणं तेसि च दाउमवयासमहिलसंतेहिं । दुज्जणयणवयणेहि संकुइयं झत्ति सव्वत्थ ॥५६९६।। तस्स ससिणो व्व गुणकिरणपसरणा सत्तु-मित्त-निवनिवहा । कमल-कुमुयायरा इव संकुइया वियसिया तह य जो को वि सेवयजणो नरिदसामंतमंडलियपमुहो। नरपुंगवस्स रन्नो पविसइ दारम्मि सो सम्बो ॥५६९८।। सेसो य जणो न कयाइ जाइ जो रायसन्निहाणम्मि । सो वि विणा वि हु कज्जेण तस्स कुमरस्स पासम्मि।।५६९९।। दसणआलावत्थी वच्चइ निच्चं पि न य चिराओ वि । तत्तो निग्गंतुं को वि वंछए तयणुनाओ वि ।।५७००।। महया किच्छेण गओ वि नियगिहे कुमरगुणकहानिरओ। चिट्ठइ चिरं पि कज्जंतरेसु न पयट्टए कह वि ॥५७०१।। उज्जाणाइसु वच्चइ जया कयाइ वि पहाणतुरयम्मि । आरूढो अहव मयंधसिंधुरक्खंधदेसम्मि ।। ५७०२।। तइया नयरस्स जणो इत्थी बालाइओ समग्गो वि । कत्थागच्छइ कुमरो अइकंतो केणव पहेण ।।५७०३।। इच्चाइ वाहरंतो धावइ पट्ठीए को वि को वि पुणो । निय मंदिरग्गसिहरे आरोहइ को वि पायारे ।।५७०४।। अन्नो वि को वि कत्थइ विणियत्तं ते वि तम्मि एमेव । तइंसणअवियन्हो वियरइ नयरीजणो निच्चं ।।५७०५।। अन्नम्मि दिणे नरपुंगवस्स अत्थाणमंडवगयस्स । सामंतमंतिमंडलिय-सुहडकोडीपरिवुडस्स ॥५७०६।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |