Page Text
________________
सिरिमुनिसुव्वयजिणिंदचरियं
तो तक्खणे वि एसा नियं जीयं चयइ नत्थि संदेहो । एईए वि विन्नाए गब्भो वि विणस्सए नूणं ।।५१२२।। गब्भो पुण एईए पहाणसुमिणेण सूइओ अस्थि । सो होही सयलस्स वि इमस्स सामी महियलस्स ।।५१२३।। उग्गपयावो निद्दलियसयलदरियारिदप्पमाहप्पो। जमिमस्स पढम संभवदिणम्मि दिट्ठो मुहपविट्ठो।।५१२४।। मुमिणम्मि रयणिपच्छिमजामे सेज्जाए सुहपसुत्ताए। देवीए दिणनाहो तेयड्ढो नियतमपसरो ।।५१२५।। नासियतारयनियरो उच्छाइयहरिणलंछणच्छाओ। तेण असामन्नगुणो संभाविज्जइ इमो गब्भो ॥५१२६ ।। देवीए गब्भस्स य दोन्हं पि मए विणासरक्खट्ठा । निययं सरूवमेवं पयासियं अग्गओ तीसे ।।५१२७।। निय भाउणो वि पासाउ जेण अम्हाण उवरि पडिबंधो। देवीए अइगरुओ तो मं दट्ठण निच्चेटें ।।५१२८।। संजायगरुयदुक्खा मज्य समीवं समागया देवी । वायपयाणाईयं उवयारं काउमारद्धा ।।५१२९।। मुच्छाविगमे वि हु मे असमंजसभामियाइं सुणिऊण । कयगुरुमणसंतावा जाया पम्हुट्ठभाउदुहा ।।५१३०।। दट्ट्ण वि निहणगयं सहोयरं तस्स दुक्खमेईए। न मणं पि मणे जायं मम दुक्खेणं सदुक्खाए ।।५१३१।। *जह पवरदव्वहाणीए अन्नमणुन्नयरदव्वहाणी । जायाए तिरोहिज्जइ उप्पायंती मणे दुक्खं ।।५१३२॥ तह भाउमरणदुक्खं समुब्भवंतं मणम्मि देवीए । मह मणसुन्नत्तणजणियगरुयदुक्खेण अंतरियं ।।५१३३।। तो जिणमित्तो सीसं धुणिऊणं वज्जकुंडलनरिंदं । विन्नवइ देवं एसा न हु बद्धी होइ अन्नस्स ।।५१३४॥ एसगरुओ अणत्थो देवेणं रक्खिओ नियमईए । एमेवयनिग्गमिही अज्ज वि देवो कइदिणाई ॥५१३५।। जं आसि भयं तुम्हाण माणसे देव तं गयं ताव । मन्नामि अहं इन्हि किं कीरइ दुम्मणा देवी ।।५१३६।। तो वज्जकुंडलेणं भणियं जिणमित्त अज्ज वि चउत्थं । दियह एयं देवीए भाउणो परभवगयस्स ॥५१३७।। तो अम्ह निमित्तं जइ देवीए फिट्टए कह वि दुक्खं । उग्घडइ तह वि तीए मणम्मि लहु भाउमरणदुहं ॥५१३८।। जिणमित्तो भणइ तओ संजायं संपयं हयप्पसरं । तं भाउमरणदुक्खं देवीए एत्तिय दिणेहिं ।।५१३९।। होतं चिय ताव न तं संभाविज्जइ कहं पि अह होइ । तो थेवं चिय किं चि वि तम्हा मुच्चउ कवडमेयं ॥५१४०।। सेसो वि जणो सब्बो कीरउ साणंदमाणसो इन्हि । निय आलावाईहि देवी वि ह लहउ परमसुहं ।।५१४१।। तो वज्जकुंडलनिवो जंपड जिणमित्तजारिस भणसि । तं अस्थि तारिसं त्रिय तह वि अणत्थस्स संदेहे ।।५१४२।। पडियारो काययो सुबुद्धिपुरिसेहिं ता तुमं गंतुं । पभणसु पभायसमए देवि जह अज्ज रयणीए ॥५१४३।। सुत्तेण मए दिट्ठो सुमिणो किर गोत्तदेवया रन्नो । आगंतुं मं पभणइ जह इह नयरे जिणहराई ।।५१४४॥ चिट्ठति जाइं काई वि तेसि मज्झाउ पइदिणं चेव। एक्केक्कम्मि जिणहरे जइ पूयं कुणइ कामरई ।।५१४५।। देवी एगग्गमणा अचिंतमाणीय सयणगिहतत्ति । ता जाव समत्थिज्जइ सबजिणहरेसु जिणपूया ।।५१४६।। तो पढमे च्चिय दियहे पूयारंभस्स जायए राया । सत्थमणो सयमेवय उवेइ जिणमंदिरेसुं पि ।।५१४७।। इय भणिऊणं देवी सा सहसच्चिय असणीया ! अहम वि तो पडिबुद्धो ठिओ य जग्गंतओ चेव ॥५१४८।। चितंतो य तहेयं सच्चं सुमिणं किमयमह वि तहं । वीमंसियं मए तो जह कीरउ ताव जिणपूया ।।५१४९।। सव्वजिणमंदिरेसुं तो जइ सच्चो हवेज्ज सुमिणत्थो । तो लठं अह वितहो तहावि धम्मो कओ होइ ।।५१५०।। इय निच्छिऊण पच्छा समागओ हं तुहं तिए इन्हि । कहिओ सुमिणो य मए जं उचियं देवि! तं कुणह ।।५१५१॥
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |